Deepika.com Career News :ബിഎസ്എൻഎലിൽ ജൂണിയർ അക്കൗണ്ട്സ് ഓഫീസർ.......

ബിഎസ്എൻഎലിൽ ജൂണിയർ അക്കൗണ്ട്സ് ഓഫീസർ

ഭാരത് സഞ്ചാർ നിഗം ലിമിറ്റഡ് ജൂണിയർ അക്കൗണ്ട്സ് ഓഫീസർ തസ്തികകയിലേക്ക് നേരിട്ടുള്ള നിയമനത്തിന് അപേക്ഷ ക്ഷണിച്ചു. രാജ്യത്തുടനീളം 28 സർക്കിളുകളിലായി 996 ഒഴിവുകളാണ് ഉള്ളത്. കേരളത്തിൽ 41 ഒഴിവുകളുണ്ട്. ഓൺലൈൻ മത്സരപരീക്ഷയിലൂടെയാണ് ഉദ്യോഗാർഥികളെ തെരഞ്ഞെടുക്കുന്നത്.

സർക്കിൾ ബേസ്ഡ് കേഡറിൽ ഉൾപ്പെടുന്ന തസ്തികയാണ് ഡയറക്ട് ജൂണിയർ അക്കൗണ്ട്സ് ഓഫീസറുടേത്. ഉദ്യോഗാർഥിക്ക് താത്പര്യമുള്ള സർക്കിളിലേക്ക് അപേക്ഷിക്കാം. ഒരു സർക്കിളിലേക്ക് മാത്രമേ അപേക്ഷിക്കാൻ സാധിക്കൂ. ഒരിക്കൽ തെരഞ്ഞെടുത്തു കഴിഞ്ഞാൽ പിന്നെ സർക്കിൾ മാറ്റാൻ അവസരം ഉണ്ടായിരിക്കില്ല. ഓൾ ഇന്ത്യ കേഡറിലേക്ക് സ്ഥാനക്ക‍യറ്റം ലഭിക്കുന്നതു വരെ നിയമനം ലഭിക്കുന്ന സർക്കിളിൽ ജോലി ചെയ്യണം.
യോഗ്യത- എംകോം/സിഎ/ഐസിഡബ്ല്യുഎ/സിഎസ് അംഗീകൃത സർവകലാശാല സ്ഥാപനങ്ങളിൽനിന്ന് 2017 ജനുവരി ഒന്നിന് മുന്പായി നേടിയിരിക്കണം.

പ്രായം- ഇരുപതിനും മുപ്പതിനും ഇടയിൽ പ്രായമുള്ളവർക്ക് അപേക്ഷിക്കാം. 2017 ജനുവരി ഒന്ന് അടിസ്ഥാനമാക്കിയാണ് പ്രായം കണക്കാക്കുക. എസ്‌സി, എസ്ടി വിഭാഗക്കാർക്ക് അഞ്ചും ഒബിസി വിഭാഗക്കാർക്ക് മൂന്നും വർഷം ഉയർന്നപ്രായത്തിൽ ഇളവ് ലഭിക്കും. അംഗവൈകല്യമുള്ളവർക്ക് പത്തുവർഷത്തെ വയസിളവ് ലഭിക്കും.

ശന്പളം- തെരഞ്ഞെടുക്കപ്പെടുന്നവർക്ക് എക്സിക്യൂട്ടീവ് 16,400- 40,500 രൂപ ശന്പള സ്കെയിൽ നിയമനം ലഭിക്കും. ഐഡിഎ, എച്ച്ആർഎ, മെഡിക്കൽ ബെനഫിറ്റ്സ് തുടങ്ങിയ ആനുകൂല്യങ്ങളും അടിസ്ഥാന ശന്പളത്തിന്‍റെ മൂന്നുശതമാനം വാർഷിക ഇൻക്രിമെന്‍റും ഉണ്ടായിരിക്കും.

പരീക്ഷ- നിർദിഷ്ട യോഗ്യതയുള്ളവർക്കായി നടത്തുന്ന ഓൺലൈൻ മത്സരപരീക്ഷയുടെ അടിസ്ഥാനത്തിലാണ് തെരഞ്ഞെടുപ്പ്. 2017 നവംബർ അഞ്ചു മുതൽ പരീക്ഷ നടക്കും.
സിലബസ്- മൂന്നു മണിക്കൂർ ദൈർഘ്യമുള്ള രണ്ടു പേപ്പറുകളാണ് പരീക്ഷയ്ക്ക് ഉണ്ടായിരിക്കുക.

പേപ്പർ- 1 ജനറൽ ഇംഗ്ലീഷ് (ഷോർട്ട് ആൻസർ, ഒബ്ജക്ടീവ് ടൈപ്പ്-100 മാർക്ക്), ജനറൽ ആപ്റ്റിറ്റ്യൂഡ്/ അവേർനസ് (ഒബ്ജക്‌ടീവ് ടൈപ്പ്- 50 മാർക്ക്).

പേപ്പർ- 2 ഫിനാൻഷ്യൽ മാനേജ്മെന്‍റ്/ കോസ്റ്റ് അക്കൗണ്ടിംഗ്/ ടാക്സ് ആൻഡ് കൊമേഴ്സ്യൽ ലോ (ഒബ്ജക്ടീവ് ടൈപ്പം- 300 മാർക്ക്). പരീക്ഷ നടന്ന് മൂന്ന് പ്രവൃത്തിദിവസങ്ങൾക്കുശേഷം ഉത്തര സൂചിക പ്രസിദ്ധീകരിക്കും. നിശ്ചിത സമയത്തിനുള്ളിൽ ഉത്തരസൂചികയുമായി ബന്ധപ്പെട്ട പരാതികളും സംശയങ്ങളും ഉന്നയിക്കുന്നതിന് ഉദ്യോഗാർഥികൾക്ക് അവസരമുണ്ടായിരിക്കും. ഒരു ചോദ്യത്തിന് 500 രൂപ ഫീസ് ഈടാക്കുന്നതാണ്. തെരഞ്ഞെടുക്കപ്പെടുന്നവർ അഞ്ചു വർഷത്തെ ബോണ്ട് നല്കണം. നിയമനം ലഭിച്ചാൽ കന്പനി നിർദേശിക്കുന്ന പരിശീലനം പൂർത്തിയാക്കേണ്ടതാണ്. പ്രീ-അപ്പോയിന്‍റ്മെന്‍റ് ട്രെയിനിംഗ് ആദ്യശ്രമത്തിൽ വിജയകരമായി പൂർത്തിയാക്കാൻ കഴിയാത്തവർക്ക് ഒരവസരം കൂടി നൽകും. ട്രെയിനിംഗ് സമയത്ത് കന്പനി നിർദേശിക്കുന്ന സ്റ്റൈപ്പൻഡാണ് ലഭിക്കുക.

പരീക്ഷാ ഫീസ്- ജനറൽ, ഒബിസി വിഭാഗക്കാർക്ക് 1000 രൂപയും എസ്‌സി, എസ്ടി വിഭാഗക്കാർക്ക് 500 രൂപയും ഇന്‍റർനെറ്റ് ബാങ്കിംഗ്, ക്രെഡിറ്റ് കാർഡ്, ഡെബിറ്റ് കാർഡ് എന്നീ സൗകര്യങ്ങൾ ഉപയോഗിച്ച് ഫീസ് അടയ്ക്കാം.

അപേക്ഷിക്കേണ്ട വിധം- www.externalexam.bsnl.co.in എന്ന വെബ്സൈറ്റിലൂടെ ഓൺ ലൈനായാണ് അപേക്ഷ സമർപ്പിക്കേണ്ടത്. www.bsnl.co.in എന്ന വെബ്സൈറ്റിലും ലിങ്ക് ലഭ്യമാണ്. അപേക്ഷ സ്വീകരിക്കുന്ന അവസാന തീയതി ഒക്ടോബർ 15.