രാജ്യത്തെ ഫോറൻസിക് പഠനവും പരിശീലനവും നിയന്ത്രിക്കുന്നതിന് കേന്ദ്ര ആഭ്യന്തര മന്ത്രാലയം ചുമതലപ്പെടുത്തിയിട്ടുള്ള ലോക് നായക് ജയപ്രകാശ് നാരായണ്‍ നാഷണൽ ഇൻസ്റ്റിറ്റ്യൂട്ട് ഫോർ ക്രിമിനോളജി ആൻഡ് ഫോറൻസിക് സയൻസ് (എൻഐസിഎഫ്എസ്). ഇൻസ്റ്റിറ്റ്യൂട്ട് നടത്തുന്ന രണ്ട് അഭിരുചി പരീക്ഷകളായ ഫോറൻസിക് ആപ്റ്റിറ്റ്യൂഡ് ആൻഡ് കാലിബർ ടെസ്റ്റ് (ഫാക്ട്), ഫാക്ട് പ്ലസ് എന്നിവയ്ക്ക് ജൂലൈ 15 വരെ അപേക്ഷിക്കാം. സെപ്റ്റംബർ 23ന് രാവിലെയും ഉച്ചകഴിഞ്ഞുമാണു രണ്ടു പരീക്ഷകളും ക്രമീകരിച്ചിരിക്കുന്നത്.
രണ്ടു മണിക്കൂർ ദൈർഘ്യമുള്ള ഓണ്‍ലൈൻ പരീക്ഷയ്ക്ക് കോഴിക്കോട്, അഗർത്തല, അഹമ്മദാബാദ്, ഔറംഗബാദ്, ഭോപ്പാൽ, ചണ്ഡിഗഡ്, ചെന്നൈ, ന്യൂഡൽഹി, ഗോഹട്ടി, ഹൈദരാബാദ്, കോൽക്കത്ത, ലക്നോ, മുംബൈ, പാറ്റ്ന, റാഞ്ചി എന്നിവിടങ്ങളിൽ സെന്‍ററുകളുണ്ട്.
ഫോറൻസിക് പ്രഫഷണലുകളുടെ യോഗ്യതാ പരീക്ഷയാണ് ഫാക്ട്. വിദഗ്ധരുടെ സേവനം ആവശ്യമുള്ള ഫോറൻസിക് ലബോറട്ടറികൾക്ക് തെരഞ്ഞെടുപ്പ് സുഗമമാക്കുകയാണ് ഈ പരീക്ഷകൾ കൊണ്ട് ഉദ്ദേശിക്കുന്നത്.
ബിരുദാനന്തര ബിരുദധാരികൾക്കുള്ള അടിസ്ഥാന യോഗ്യതാ പരീക്ഷയാണ് ഫാക്ട്. ഫാക്ട് പ്ലസ് നെറ്റ്/ ഗേറ്റ്/ജിപാറ്റ് തുടങ്ങിയ പരീക്ഷകൾ പാസായവർക്കുള്ളതാണ്. രണ്ടു പാർട്ടാണു ഫാക്ടിനുള്ളത്. ഒന്നാം ഭാഗം എല്ലാവർക്കും പൊതുവായുള്ളതാണ്. ആറു വിഷയങ്ങൾ ഉള്ളതാണു രണ്ടാം ഭാഗം. ഫോറൻസിക് ഫിസിക്സ്, ഫോറൻസിക് ബാലസ്റ്റിക്സ്, ഫോറൻസിക് ഡോക്യുമെന്റ് എക്സാമിനേഷൻ, സൈബർ ഫോറൻസിക്സ്, ഫോറൻസിക് കെമിക്കൽ സയൻസസ്, ഫോറൻസിക് ബയോളജിക്കൽ സയൻസസ് എന്നിവയിൽ നിന്നും ഇഷ്ടമുള്ളതു തെരഞ്ഞെടുക്കാം. ബന്ധപ്പെട്ട വിഷയങ്ങളിൽ എംഎസ്‌സിയാണു യോഗ്യത. ചില വിഷയങ്ങളിൽ ബിടെക്കുകാരെയും പരിഗണിക്കും.120 മാർക്കിന്‍റെ ചോദ്യങ്ങളായിരിക്കും ഉണ്ടായിരിക്കുക. നെഗറ്റീവ് മാർക്ക് ഇല്ല. അപേക്ഷാ ഫീസ് 800 രൂപ. സംവരണ വിഭാഗങ്ങൾക്കും പെണ്‍കുട്ടികൾക്കും 400 രൂപ. www.nicfs.gov.in. ഫോണ്: 011-27521091.