സൗബിൻ ഷഹീർ ആദ്യമായി സംവിധാനം ചെയ്യുന്ന പറവയിൽ അതിഥി വേഷത്തിലെത്തുന്നത് മലയാളികളുടെ സ്വന്തം കുഞ്ഞിക്കയാണ്. ചിത്രം ഇന്ന് തീയറ്ററിലെത്തിയിരിക്കേ സംവിധാന രംഗത്തേക്ക് അരങ്ങേറ്റം കുറിക്കുന്ന തന്റെ പ്രിയ സുഹൃത്തിനു വേണ്ടി ഫേസ്ബുക്ക് പേജിലൂടെ ഒരു അഭ്യർഥനയുമായി എത്തിയിരിക്കുകയാണ് ദുൽഖർ.
പറവ ആദ്യദിനം കാണാൻ പോകുന്ന എല്ലാവരോടുമായി എനിക്കൊരു അഭ്യർഥനയുണ്ട് എന്നുപറഞ്ഞാണ് ദുൽഖറിന്റെ ഫേസ്ബുക്ക് പോസ്റ്റ് തുടങ്ങുന്നത്. ദയവായി സിനിമയിലെ രംഗങ്ങൾ ഒന്നും ഷൂട്ട് ചെയ്യരുത്, കഥാപാത്രങ്ങളുടെ ഇൻട്രൊഡക്ഷൻ, സംഘടന രംഗങ്ങൾ, പാട്ട് രംഗങ്ങൾ എന്നിവയൊന്നും ചിത്രീകരിക്കരുത് എന്ന് താരം ആരാധകരോട് അഭ്യർഥിക്കുന്നു.
"ആവേശം കൊണ്ട് ചെയ്യുന്നതാണ് ഇതെന്ന് എനിക്ക് അറിയാം. എന്നാൽ ഈ രംഗങ്ങൾ സോഷ്യൽ മീഡിയയിലോ ഇന്റർനെറ്റിലോ പ്രചരിച്ചാലോ? അത് വ്യാജപതിപ്പിനു തുല്യമാകില്ലേ..? ഡിവിഡി, ബ്ലൂ റേ എന്നിവ പുറത്തിറങ്ങിയാൽ അത് മറ്റൊരു വിഷയം. ആരെയും കുറ്റപ്പെടുത്തുന്നതല്ല. അതിൽ നിന്നും വിട്ടു നിൽക്കുവാൻ മാത്രം അഭ്യർഥിക്കുന്നു....' - ദുൽഖർ ഫേസ്ബുക്കിൽ കുറിച്ചു.
അതേസമയം, ആദ്യദിനം തന്നെ തീയറ്ററിൽ മികച്ച പ്രതികരണമാണ് പറവ നേടുന്നത്. സിനിമയുടെ കഥ, തിരക്കഥ, സംഭാഷണം നിർവഹിക്കുന്നത് സൗബിനും മുനീർ അലിയും ചേര്ന്നാണ്. കിസ്മത്ത് താരം ഷെയ്ൻ നിഗം, ഹരിശ്രീ അശോകന്റെ മകൻ അർജുൻ അശോകൻ, സൈനുദ്ദീന്റെ മകൻ ദിനിൽ സൈനുദ്ദീൻ, സിദ്ദിഖ്, ആഷിക് അബു, ജേക്കബ് ഗ്രിഗറി, സൃന്ദ അഷാബ് തുടങ്ങിയവരാണു ചിത്രത്തിലെ പ്രധാന കഥാപാത്രങ്ങൾക്കു ജീവൻ പകരുന്നത്.
ബാംഗ്ലൂർ ഡെയ്സ്, പ്രേമം എന്നീ സൂപ്പർഹിറ്റ് ചിത്രങ്ങൾക്ക് ശേഷം അൻവർ റഷീദ് എന്റർടെയ്ൻമെന്റ് ദ് മൂവി ക്ലബിന്റെ സഹകരണത്തോടെ നിർമിക്കുന്ന ചിത്രം കൂടിയാണ് പറവ.
Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.