പോലീസ് ആക്‌ഷൻ സ്റ്റോറിയുമായി ‘നിപുണൻ’ : Kollywood News

മോഹൻലാലിന്‍റെ പെരുച്ചാഴി എന്ന ചിത്രത്തിലൂടെ ശ്രദ്ധേയനായ അരുൺ വൈദ്യനാഥൻ സംവിധാനംചെയ്യുന്ന തമിഴ് ചിത്രമാണ് നിപുണൻ. കന്നടയിൽ വിസ്മയ എന്ന പേരിലും ഒരേ സമയം നിർമിക്കുന്ന ഈ ചിത്രത്തിൽ ആക്ഷൻ കിംഗ് അർജുൻ പോലീസ് ഓഫീസറായി കേന്ദ്ര കഥാപാത്രത്തെ അവതരിപ്പിക്കുന്നു. ചിത്രത്തിന് കഥ, തിരക്കഥ, സംഭാഷണം എന്നിവ ഒരുക്കിയിരിക്കുന്നതും അരുൺ വൈദ്യനാഥനാണ്. ചിത്രം ഈമാസം14 ന് തീയറ്ററുകളിലെത്തും.

കന്നട സിനിമയിലെ സൂപ്പർഹിറ്റായ ലൂസിയയിലെ നായിക ശ്രുതി ഹരിഹരൻ ഈ ചിത്രത്തിൽ അർജുന്‍റെ ഭാര്യയാകുന്നു. പ്രസന്നയും വരലക്ഷ്മി ശരത്കുമാറും അർജുൻ അവതരിപ്പിക്കുന്ന പോലീസ് ഓഫീസറുടെ സഹപ്രവർത്തകരായി പ്രത്യക്ഷപ്പെടുന്നു. സുമൻ, വൈഭവ്, സുഹാസിനി മണിരത്നം എന്നിവരാണു മറ്റു പ്രമുഖ താരങ്ങൾ.

സത്യസന്ധനും ബുദ്ധിശാലിയുമായ രഞ്ജിത് കാളിദാസ് എന്ന ഡിഎസ്പിയുടെ വേഷമാണ് അർജുൻ ഈ ചിത്രത്തിൽ അവതരിപ്പിക്കുന്നത്. ആദ്യമായിട്ടാണ് ആക്ഷൻ കിംഗ് അർജുൻ സോൾട്ട് ആൻഡ് പെപ്പർ ലുക്കിൽ പ്രത്യക്ഷപ്പെടുന്നത്. അതിസാഹസികമായ ആക്ഷൻ രംഗങ്ങളായിരിക്കും ഈ ചിത്രത്തിന്‍റെ പ്രധാന സവിശേഷത.

പാഷൻ ഫിലിം ഫാക്ടറിയുടെ ബാനറിൽ തമിഴിലും കന്നടയിലും ഉമേശ്, സുധൻ സുന്ദരം, ജയറാം, അരുൺ വൈദ്യനാഥൻ എന്നിവർ ചേർന്ന് ഈ ചിത്രം നിർമിക്കുന്നു. അരവിന്ദ് കൃഷ്ണയാണ് ഛായാഗ്രഹണം നിർവഹിക്കുന്നത്.