കത്രീനയും സൽമാനും കലക്കിയിട്ടുണ്ട്... : Trailer-Songs

ബോളിവുഡിലെ സൂപ്പർസുന്ദരി കത്രീന കെയ്ഫും സൂപ്പർസ്റ്റാർ സൽമാൻഖാനും ഒരു ചിത്രത്തിൽ ഒന്നിച്ച് അഭിനയിക്കുന്നുവെന്ന് വന്നാൽ തന്നെ ആ ചിത്രം സൂപ്പർഹിറ്റ് ആകുമെന്ന കാര്യത്തിൽ ഉറപ്പിക്കാം. ഇരുവരും ഒന്നിക്കുന്ന ഏറ്റവും പുതിയ ചിത്രമാണ് ടൈഗർ സിന്ദാ ഹൈ. ഈ ചിത്രത്തിലെ സ്വാഗ് സെ കരേൻഗേ സബ്ക സ്വാഗത് എന്നു തുടങ്ങുന്ന ഗാനവും ഗാനത്തിനു ചുവടുവച്ച് കത്രീനയുടെയും സൽമാന്‍റെയും നൃത്തവും ഇപ്പോൾ വൈറലായിരിക്കുകയാണ്. ഗാനരംഗത്ത് അതീവ ഗ്ലാമർ വേഷത്തിലാണ് കത്രീന എത്തിയിരിക്കുന്നത്. കത്രീനയും സൽമാനും അതിഗംഭീര ഡാൻസാണ് കാഴ്ചവച്ചിരിക്കുന്നതെന്ന് വീഡിയോ കണ്ടവർ ഒന്നടങ്കം പറയുന്നു.

ചൊവ്വാഴ്ച രാവിലെ യൂ ട്യൂബിൽ പോസ്റ്റ് ചെയ്ത ഗാനം ഇതിനോടകം ലക്ഷക്കണക്കിന് ആളുകളാണ് കണ്ടത്. ടൈഗർ സിന്ദ ഹൈ എന്ന ചിത്രത്തിലെ ആദ്യ പാട്ട് തന്നെ അങ്ങനെ ബോളിവുഡിൽ തരംഗം സൃഷ്ടിച്ചിരിക്കുകയാണ്. വിശാലും ശേഖറും ചേർന്ന് ഈണമിട്ട ഗാനം പാടിയത് വിശാൽ ദദ്‌ലാനിയും നേഹാ ഭാസിനും ചേർന്നാണ്. ഇർഷാദ് കാമിലിന്‍റേതാണു വരികൾ. വൈഭവി മെർച്ചന്‍റ് ആണ് സൽമാനും കത്രീനയ്ക്കുമായി ഡാൻസ് ചിട്ടപ്പെടുത്തിയത്. കായിക അഭ്യാസവും നൃത്തവുമായി നൂറോളം ജൂനിയർ ആർടിസ്റ്റുകളെയാണ് പാട്ടിൽ അണിനിരത്തിയത്. അലി അബ്ബാസ് സഫർ സംവിധാനം ചെയ്യുന്ന ചിത്രം യാഷ് രാജ് ഫിലിംസിന്‍റെ ബാനറിൽ ആദിത്യ ചോപ്രയാണ് ചിത്രം നിർമിക്കുന്നത്.