നൂറു ജൂനിയർ ആർട്ടിസ്റ്റുകളുമായി "പൊട്ടാസും തോക്കും' : Trailer-Songs

നൂറോളം ജൂനിയർ ആർട്ടിസ്റ്റുകളെ അണിനിരത്തി മിബിഷ് ബിജു സംവിധാനം ചെയ്ത 'പൊട്ടാസും തോക്കും' എന്ന ഹ്രസ്വചിത്രം യൂട്യൂബിൽ റിലീസ് ചെയ്തു. നിതിൻ സൈമണിന്‍റേതാണ് തിരക്കഥ. ഒരു പള്ളിപ്പെരുന്നാളിൽ പ്രധാന കഥാപാത്രങ്ങളായ കുട്ടിക്കും ബുദ്ധിന്യൂനതയുള്ള പയ്യനും അഭിമുഖീകരിക്കേണ്ടി വന്ന ഒരു സംഭവത്തെ കുറിച്ചാണ് ചിത്രം പറയുന്നത്.

യഥാർഥ പള്ളിപ്പെരുന്നാളിന്‍റെ അന്തരീക്ഷം ഉണ്ടാക്കുവാൻ അണിയറ പ്രവർത്തകർ ഒരു പള്ളിയുടെ സമീപം പെരുന്നാളിന്‍റെ സെറ്റ് ഒരുക്കുകയായിരുന്നു. കളിപ്പാട്ട കടകൾ, ചെണ്ടമേളം, ലൈറ്റ്സ്, സ്റ്റേജ് എന്നിവയും, കൂടാതെ നൂറു ജൂനിയർ ആർട്ടിസ്റ്റുകളെയും ഇതിൽ ഉൾപ്പെടുത്തി.

'പൊട്ടൻ' എന്ന പ്രധാന കഥാപാത്രത്തെ അവതരിപ്പിക്കുന്നത് ഷൈൻ പള്ളത്ത് യേശുദാസ് ആണ്. കുട്ടിയുടെ കഥാപാത്രം അവതരിപ്പിച്ചിരിക്കുന്നത് ബേബി അലോണ ജോൺസണാണ്.
ഛായാഗ്രഹണം സിയാദ് എസ്. നാല് മിനിട്ടോളം ദൈര്‍ഘ്യം വരുന്ന ഒറ്റ ഷോട്ടും ഈ ചിത്രത്തിലുണ്ട്. ചിത്രസംയോജനം ചെയ്തിരിക്കുന്നത് ഷൈൻ ഷാജു കെയാണ്. ക്രിസ്‌റ്റി ജോബി പശ്ചാത്തലസംഗീതം ഒരുക്കിയിരിക്കുന്നു. ഫാ. വിൻസെന്‍റ് വാരിയത്ത് രചിച്ച് ഫാ. ടിജോ കോലോത്തുംവീട്ടിൽ സംഗീതം നൽകി ശ്രീനാഥ് ക്ലീറ്റസ് ആലപിച്ചിരിക്കുന്ന "കാഴ്ച്ചപോയൊരീ" എന്ന ഗാനവും ഹ്രസ്വചിത്രത്തിലുണ്ട്. പി ജി സേവ്യറാണ് 'പൊട്ടാസും തോക്കും' നിർമിച്ചിരിക്കുന്നത്. മ്യൂസിക്247നാണ് ഒഫീഷ്യൽ ഓൺലൈൻ പാർട്ണർ.