അഖിലേന്ത്യാ അന്തർ സർവകലാശാലാ ഫുട്ബോൾ: കാലിക്കട്ട് ക്വാർട്ടറിൽ
മിഡ്നാപൂർ: ബംഗാളിലെ മിഡ്നാപൂർ വിദ്യാസാഗർ സർവകലാശാല സ്റ്റേഡിയത്തിൽ നടക്കുന്ന അഖിലേന്ത്യാ അന്തർസർവകലാശാല ഫുട്ബോളിൽ കാലിക്കട്ട് യൂണിവേഴ്സിറ്റി ക്വാർട്ടറിലെത്തി. ഇന്നലെ നടന്ന മത്സരത്തിൽ ബർദ്വാൻ വാഴ്സിറ്റിയുമായി ഗോൾരഹിത സമനില നേടിയാണ് കാലിക്കട്ട് അഞ്ചു പോയിന്റുമായി ക്വാർട്ടറിലെത്തിയത്. നാലു ടീമുകളടങ്ങിയ ഗ്രൂപ്പിൽ നിന്നു കാലിക്കട്ട് രണ്ടാമതായാണ് ക്വാർട്ടറിലെത്തിയത്.
ബർദ്വാൻ യൂണിവേഴ്സിറ്റിയാണ് ഗ്രൂപ്പ് ജേതാക്കൾ. അമൃത്സറിലെ ഗുരുനാനാക്ക് ദേവ് യൂണിവേഴ്സിറ്റിയും ഭോപ്പാൽ ബർക്കത്തുള്ള യൂണിവേഴ്സിറ്റിയും പുറത്തായി. ഇന്നു ക്വാർട്ടറിൽ കാലിക്കട്ട് അണ്ണാമലൈ യൂണിവേഴ്സിറ്റിയെ നേരിടും.