വൈൽഡ് ലൈഫ് സയൻസിൽ എംഎസ്സി
കേന്ദ്ര വനം, പരിസ്ഥിതി മന്ത്രാലയത്തിനു കീഴിൽ ഡെറാഡൂണിലെ സ്വയംഭരണ സ്ഥാപനമാണ് വൈൽഡ് ലൈഫ് ഇൻസ്റ്റിറ്റ്യൂട്ട് ഓഫ് ഇന്ത്യ. വൈൽഡ് ലൈഫ് സയൻസിൽ ഇൻസ്റ്റിറ്റ്യൂട്ട് നടത്തുന്ന എംഎസ്സി കോഴ്സ് ജൂണ് 29ന് ആരംഭിക്കും. ആകെ 20 സീറ്റുകളുള്ളതിൽ 15 എണ്ണം ഇന്ത്യൻ വിദ്യാർഥികൾക്കായി മാറ്റിവച്ചിരിക്കുന്നു.
5,32,800 രൂപയാണു കോഴ്സ് ഫീസ്. സമർഥരായ എട്ടു പേർക്ക് സ്കോളർഷിപ് ലഭിക്കും. സയൻസ്, മെഡിക്കൽ സയൻസ്, എൻജിനിയറിംഗ്, വെറ്ററിനറി സയൻസ്, അഗ്രിക്കൾച്ചർ, ഫോറസ്ട്രി, ഫാർമസി, സോഷ്യൽ സയൻസ്, കംപ്യൂട്ടർ സയൻസ് എന്നിവയിൽ ബിരുദം നേടിയവർക്കും അവസാന വർഷ വിദ്യാർഥികൾക്കും അപേക്ഷിക്കാം. 2017 ജൂലൈ ഒന്നിന് 25 വയസ് കവിയരുത്. സംവരണ വിഭാഗങ്ങൾക്ക് അഞ്ചു വർഷത്തെ ഇളവുണ്ട്.
ദേശീയ തലത്തിൽ നടത്തുന്ന നാഷണൽ എലിജിബിറ്റി ടെസ്റ്റിന്റെ (നെറ്റ്) അടിസ്ഥാനത്തിലാണ് അഡ്മിഷൻ. ഹൈദരാബാദ്, ബംഗളൂരു, ഭോപ്പാൽ, മുംബൈ, ഡൽഹി, ലക്നോ, ഡെറാഡൂണ്, കോൽക്കത്ത, ഗോഹട്ടി, ജമ്മു എന്നിവിടങ്ങളിൽ മേയ് ഏഴിനാണ് നെറ്റ്. 100 മാർക്കിന്റെ രണ്ടു മണിക്കൂർ ദൈർഘ്യമുള്ളതാണ് നെറ്റ്. 70 മാർക്കിന്റെ ഒബ്ജക്ടീവ് ടൈപ് ചോദ്യങ്ങളും 30 മാർക്കിന്റെ ഉപന്യാസ രീതിയിൽ ഉത്തരം എഴുതേണ്ട ചോദ്യങ്ങളുമാണ് ഉണ്ടാകുക. തെരഞ്ഞെടുക്കപ്പെടുന്നവരെ ഡെറാഡൂണിൽ പേഴ്സണൽ ആപ്റ്റിറ്റ്യൂഡ് ടെസ്റ്റിനു വിളിക്കും.
ഓണ്ലൈനായി മാർച്ച് രണ്ടു മുതൽ ഏപ്രിൽ 15 വരെ അപേക്ഷിക്കാം. ഫീസ് 1000 രൂപ. ഫോണ്: +911352646284. വെബ്സൈറ്റ്:https://www. wii.gov.in.
ഫോറസ്ട്രിയിൽ ബിഎസ്സി
അരുണാചൽ പ്രദേശിലെ ഇറ്റാനഗറിലുള്ള നോർത്ത് ഈസ്റ്റേണ് റീജണൽ ഇൻസ്റ്റിറ്റ്യൂട്ട് ഓഫ് സയൻസ് ആൻഡ് ടെക്നോളജി (എൻഇആർഐഎസ്ടി) നടത്തുന്ന ഫോറസ്ട്രിയിൽ ബിഎസ്സി കോഴ്സിന് അപേക്ഷിക്കാം. എൻഇആർഐഎസ്ടി എൻട്രൻസ് എക്സാമിനേഷൻ വഴിയാണ് അഡ്മിഷൻ. ഏപ്രിൽ 23നാണ് പ്രവേശന പരീക്ഷ. വടക്കു കിഴക്കൻ സംസ്ഥാനങ്ങളുടെ തലസ്ഥാനങ്ങളിൽ മാത്രമാണു പരീക്ഷാ കേന്ദ്രങ്ങൾ. അപേക്ഷാ ഫീസ് 750 രൂപ. സംവരണ വിഭാഗങ്ങൾക്ക് 400 രൂപ. മാർച്ച 10 വരെ ഓണ്ലൈനായി അപേക്ഷിക്കാം. ഫോണ്: 09707309326. വെബ്സൈറ്റ്: www.neeonline.ac.in.