സ്വച്ഛ്ഭാരത്, സ്വസ്ഥ്ഭാരത്; ശില്പശാല നാളെ
തേഞ്ഞിപ്പലം: സ്വച്ഛ്ഭാരത്, സ്വസ്ഥ്ഭാരത് പരിപാടിയുടെ ഭാഗമായി കാലിക്കട്ട് സർവകലാശാലയിൽ നാളെ ശിൽപശാല സംഘടിപ്പിക്കുന്നു. കോഴിക്കോട്, മലപ്പുറം ജില്ലകളിലെ വിവിധ പഞ്ചായത്തുകളിൽ നിന്നുള്ള 150 വോളണ്ടറി ലീഡർമാർക്കാണ് ശിൽപശാല.
മദ്യ, മയക്കുമരുന്ന് ബോധവൽക്കരണമാണ് വിഷയം. സർവകലാശാലാ സെമിനാർ കോംപ്ലക്സിൽ നാളെ രാവിലെ ഒന്പതിന് ശിൽപശാല ആരംഭിക്കും. ഉദ്ഘാടനം വൈസ് ചാൻസലർ ഡോ കെ. മുഹമ്മദ് ബഷീർ നിർവഹിക്കും. കോഴിക്കോട് കുടുംബ കോടതിയിലെ പ്രിൻസിപ്പൽ കൗണ്‍സിലർ ഡോ. എൻ.പി. സറീന, സുരക്ഷ ഡി അഡിക്ഷൻ സെന്‍ററിലെ ടി. അബ്ദുൾ നാസർ, സർവകലാശാലാ സോഷ്യോളജി പഠനവകുപ്പ് മേധാവി ഡോ എൻ.പി. ഹാഫിസ് മുഹമ്മദ് എന്നിവർ ക്ലാസ് നയിക്കും. മദ്യാസക്തിയിൽ നിന്ന് മോചിതരായവരുടെ അനുഭവ വിവരണങ്ങളും പരിപാടിയുടെ ഭാഗമാണ്.
ദ്വിദിന കാവ്യാസ്വാദനക്കളരിയും കവിതോത്സവവും
തേഞ്ഞിപ്പലം: കാലിക്കട്ട് സർവകലാശാലാ മലയാള കേരള പഠനവകുപ്പ് ആറ്, ഏഴ് തിയതികളിലായി കാവ്യാസ്വാദനക്കളരിയും കവിതോത്സവവും സംഘടിപ്പിക്കുന്നു. സർവകലാശാലയ്ക്ക് കീഴിലെ കലാലയങ്ങളിലെ വിദ്യാർഥികളായ കവികളെയും നിരൂപകരെയും പങ്കെടുപ്പിച്ചുകൊണ്ടുള്ള പരിപാടിയിൽ പ്രശസ്ത കവികളും കലാസാഹിത്യ അധ്യാപകരും പങ്കെടുക്കും.
ഉദ്ഘാടനം ആറിന് രാവിലെ 10ന് സർവകലാശാലാ സെമിനാർ കോംപ്ലക്സിൽ വൈസ് ചാൻസലർ ഡോ കെ. മുഹമ്മദ് ബഷീർ നിർവഹിക്കും. പ്രഫ. കൽപ്പറ്റ നാരായണൻ, പ്രഫ. വി.ജി. തന്പി, ഡോ അനിൽ വള്ളത്തോൾ, എസ്. ജോസഫ് തുടങ്ങിയവർ വിവിധ സെഷനുകൾ നയിക്കും.
വൈകുന്നേരം 4.30ന് യൂണിവേഴ്സിറ്റി പാർക്കിൽ കാവ്യാസ്വാദനത്തിന്‍റെ വിവിധ തലങ്ങളെ പരിചയപ്പെടുത്തലും കവിതാവതരണവും നടക്കും. വൈകുന്നേരം ഏഴ് മണിക്ക് കാവ്യകലാപരിപാടികൾ അരങ്ങേറും. ഏഴിന് നടക്കുന്ന വിവിധ സെഷനുകളിൽ വിദഗ്ധർ ക്ലാസുകൾ നയിക്കും. വൈകുന്നേരം അഞ്ചിന് കവിയരങ്ങ് ഉണ്ടാവും.
സിനിമയിലെ പാരന്പര്യം: ദ്വിദിന സെമിനാർ
തേഞ്ഞിപ്പലം: കാലിക്കട്ട് സർവകലാശാലാ സ്കൂൾ ഓഫ് ഫോക്ലോർ സ്റ്റഡീസിന്‍റെ ആഭിമുഖ്യത്തിൽ ഏഴ്, എട്ട് തിയതികളിൽ സിനിമയിലെ പാരന്പര്യം സിനിമ എന്ന പാരന്പര്യം എന്ന വിഷയത്തിൽ സെമിനാർ നടക്കും.
ഏഴിന് രാവിലെ പത്തിന് ആര്യഭട്ട ഹാളിൽ ഡോക്യുമെന്ററി സംവിധായക ലീലാ സന്തോഷ് ഉദ്ഘാടനം ചെയ്യും. കെ.കെ. ചന്ദ്രശേഖരൻ മുഖ്യപ്രഭാഷണം നടത്തും. ഡോ പി.എസ്. രാധാകൃഷ്ണന്‍റെ സംസ്കാര ദേശീയതയുടെ ചലച്ചിത്ര പാഠങ്ങൾ എന്ന പുസ്തകം ചടങ്ങിൽ പ്രകാശനം ചെയ്യും. വൈകുന്നേരം ആറിന് സമർപ്പണം എന്ന ചലച്ചിത്രത്തിന്‍റെ അഭിനേതാക്കളും അണിയറ പ്രവർത്തകരും വിദ്യാർഥികളുമായി സംവദിക്കും.
സിവിക് ചന്ദ്രൻ, ഡോ ടി.വി. സുനിത, മിനി സുകുമാർ, ഡോ. രതീഷ് രാധാകൃഷ്ണൻ, ഡോ അജു കെ. നാരായണൻ, ജി.പി. രാമചന്ദ്രൻ, ഡോ കെ.കെ. ശിവദാസൻ, ഡോ. രാജേഷ് കോമത്ത്, ഡോ ആർ.വി.എം. ദിവാകരൻ തുടങ്ങിയവർ പങ്കെടുക്കും.
ശിൽപശാല ആറിന്
കോഴിക്കോട്: കാലിക്കട്ട് സർവകലാശാല എംപ്ലോയ്മെന്റ് ഇൻഫർമേഷൻ ആൻഡ് ഗൈഡൻസ് ബ്യൂറോയുടെ ആഭിമുഖ്യത്തിൽ ഉന്നത വിദ്യാഭ്യാസതൊഴിൽ മേഖലകളിലെ നൂതന സാധ്യതകൾ എന്ന വിഷയത്തിൽ പട്ടിക വർഗ വിദ്യാർഥികൾക്കായി തിങ്കളാഴ്ച ശിൽപശാല സംഘടിപ്പിക്കുന്നു.
അഗളി ഐടിഡിപി ഹാളിൽ രാവിലെ 9.30ന് യൂണിവേഴ്സിറ്റി എംപ്ലോയ്മെന്റ് ഇൻഫർമേഷൻ ആൻഡ് ഗൈഡൻസ് ബ്യൂറോ ചീഫ് ഡോ സി.സി. ഹരിലാൽ ഉദ്ഘാടനം ചെയ്യും. വിവിധ സെഷനുകളിൽ അൻവർ സാദിഖ്, ഫാ.ലെനിൻ ആന്‍റണി എന്നിവർ ക്ലാസുകൾ നയിക്കും. യുജിസി കരിയർ ആൻഡ് കൗണ്‍സലിംഗ് സെല്ലിന്‍റെയും അഗളി ഗവണ്‍മെന്‍റ് ആർട്സ് ആൻഡ് സയൻസ് കോളജിന്റെയും സഹകരണത്തോടെയാണ് ശിൽപശാല.
ബഹുസംസ്കാര മാധ്യമ ശിൽപശാല നാളെ
തേഞ്ഞിപ്പലം: കാലിക്കട്ട് പ്രസ് ക്ലബും കാലിക്കട്ട് സർവകലാശാലാ അറബി പഠനവിഭാഗവും സംയുക്തമായി കോഴിക്കോട്ടുള്ള മാധ്യമ പ്രവർത്തകർക്കായി യുജിസി സഹായത്തോടെ ബഹു സംസ്കാര മാധ്യമപ്രവർത്തനം, അറബി പദാവലിയും മാധ്യമങ്ങളും എന്ന വിഷയത്തിൽ നാളെ ശിൽപശാല സംഘടിപ്പിക്കുന്നു.
കാലിക്കട്ട് പ്രസ് ക്ലബിൽ രാവിലെ 10 ന് എഴുത്തുകാരനും നിരൂപകനുമായ ടി.ഡി. രാമകൃഷ്ണൻ ഉദ്ഘാടനം ചെയ്യും. സർവകലാശാലാ ജേർണലിസം പഠനവകുപ്പ് മേധാവി ഡോ.എൻ. മുഹമ്മദാലി, സലാഹുദ്ദീൻ എന്നിവർ മുഖ്യപ്രഭാഷണം നടത്തും. സി.പി. സെയ്തലവി (എഡിറ്റർ, ചന്ദ്രിക), വി.എം. ഇബ്രാഹിം (എക്സി. എഡിറ്റർ, മാധ്യമം), പി.ജെ. ജോഷ്വ (ചീഫ് ന്യൂസ് എഡിറ്റർ, മലയാള മനോരമ), പി.പി. അബൂബക്കർ (മുൻ ചീഫ് ന്യൂസ് എഡിറ്റർ, ദേശാഭിമാനി), എം.പി. പ്രശാന്ത് (ബ്യൂറോ ചീഫ്, ടൈംസ് ഓഫ് ഇന്ത്യ), ആർ.എൽ. ഹരിലാൽ (ചീഫ് സബ് എഡിറ്റർ, മാതൃഭൂമി), പി. ഷാജഹാൻ (റീജണൽ ഹെഡ്, ഏഷ്യാനെറ്റ്), ടി.കെ. അബ്ദുൾ ഗഫൂർ (എഡിറ്റർ, സിറാജ്) എന്നിവർ ചർച്ചയിൽ പങ്കെടുക്കും. ഡോ എ.ബി. മൊയ്തീൻകുട്ടി (അറബി പഠനവിഭാഗം മേധാവി), എൻ. രാജേഷ് (ജനറൽ സെക്രട്ടറി, കാലിക്കട്ട് പ്രസ്സ് ക്ലബ്), കമാൽ വരദൂർ (പ്രസിഡന്‍റ്, കാലിക്കട്ട് പ്രസ്സ് ക്ലബ്) എന്നിവർ പ്രസംഗിക്കും. താൽപര്യമുള്ളവർ പേര് രജിസ്റ്റർ ചെയ്യണം. ഫോൺ: 9895327511, 9447530013.