വെല്ലൂർ ക്രിസ്ത്യൻ മെഡിക്കൽ കോളജിൽ എംബിബിഎസ്, നഴ്സിംഗ്, പാരാമെഡിക്കൽ കോഴ്സ് പ്രവേശനത്തിന് അപേക്ഷിക്കാം. അഖിലേന്ത്യാ മെഡിക്കൽ പ്രവേശന പരീക്ഷയായ നീറ്റ് പട്ടികയിൽ ഉൾപ്പടുന്നവരിൽ നിന്ന് അഭിരുചി പരീക്ഷ നടത്തിയായിരിക്കും എംബിബിഎസ് പ്രവേശനം. മറ്റു കോഴ്സുകൾക്ക് പ്രവേശന പരീക്ഷയുടെ അടിസ്ഥാനത്തിലാണ് അഡ്മിഷൻ. ജൂണ് 15നകം ഓണ്ലൈനായി അപേക്ഷിക്കണം.
ആകെയുള്ള കോഴ്സുകളെ ഗ്രൂപ് എ, ഗ്രൂപ് ബി എന്ന് രണ്ടായി തിരിച്ചിരിക്കുന്നു. എംബിബിഎസ്, ബിഎസ്സി നഴ്സിംഗ്, മെഡിക്കൽ അനുബന്ധ മെഡിക്കൽ കോഴ്സുകളാണ് ഗ്രൂപ് എയിൽ ഉൾപ്പെടുത്തിയിരിക്കുന്നത്. നഴ്സിംഗ് ഡിപ്ലോമ, അനുബന്ധമെഡിക്കൽ ഡിപ്ലോമ കോഴ്സുകൾ, മാസ്റ്റർ ഓഫ് പബ്ലിക് ഹെൽത്ത്, എംഎസ്സി കോഴ്സുകളാണ് ഗ്രൂപ് ബിയിൽ.
ജൂണ് 30നാണ് അഭിരുചി പരീക്ഷ ക്രമീകരിച്ചിരിക്കുന്നത്. രാവിലെ ഗ്രൂപ് എ കോഴ്സുകൾക്കും ഉച്ച കഴിഞ്ഞ് ഗ്രൂപ് ബി കോഴ്സുകൾക്കും പരീക്ഷ നടത്തും. എംബിബിഎസിനു തെരഞ്ഞെടുക്കപ്പെടുന്നവരുടെ ലിസ്റ്റ് ജൂലൈ അഞ്ചിനും നഴ്സിംഗ് കോഴ്സുകളുടേത് ജൂലൈ ഏഴിനും അനുബന്ധ കോഴ്സുകളുടേത് ജൂലൈ ആറിനും പ്രസിദ്ധീകരിക്കും. ഗ്രൂപ് ബി കോഴ്സുകളിൽ ഡിപ്ലോമ കോഴ്സുകളുടേത് ജൂലൈ ഏഴിനും അനുബന്ധ കോഴ്സുകളുടേതും ബിരുദാനന്തര ബിരുദ കോഴ്സുകളുടേതും ജൂലൈ എട്ടിനും പ്രസിദ്ധീകരിക്കും.
2000 ഡിസംബർ 31 നോ അതിനുമുമ്പോ ജനിച്ച, പ്ലസ്ടു പാസായവർക്ക് അപേക്ഷിക്കാം. ഫിസിക്സ്, കെമിസ്ട്രി, ബയോളജി, ഇംഗ്ലീഷ് വിഷയങ്ങൾ പഠിച്ചിരിക്കണം. എംബിബിഎസ് പ്രവേശനത്തിനു ഹയർ സെക്കൻഡറി (അക്കാഡമിക്) പരീക്ഷയിൽ എല്ലാ വിഷയങ്ങളിലും ഒറ്റത്തവണയായി 60 ശതമാനം മാർക്കു നേടി പാസാകണം. ബിഎസ്സി നഴ്സിംഗ് പ്രവേശനം ആഗ്രഹിക്കുന്നവർ 45 ശതമാനം മാർക്കോടെ പ്ലസ് ടു പാസായവരും അവിവാഹിതരായ പെണ്കുട്ടികളുമായിരിക്കണം.
മറ്റു കോഴ്സുകളിലേക്കുള്ള നിബന്ധനകൾക്കു പ്രോസ്പെക്ടസ് കാണുക.
എംബിബിഎസ്: 16 ജനറൽ സീറ്റുകളും 84 സ്പോണ്സേഡ് സീറ്റുകളുമാണുള്ളത്. അഡ്മിഷൻ ഫീസ് 40,000 രൂപുയും വാർഷിക ചാർജുകൾ 23,000 രൂപയുമാണ്. ബിഎസ്സി നഴ്സിംഗ്: ജനറൽ സീറ്റ് 15, സ്പോണ്സേഡ് സീറ്റ് 85. യൂണിഫോമിനുൾപ്പടെ ഫീസ് 35,370 രൂപ. വാർഷിക ചാർജുകൾ 25,785 രൂപ.
ബിഒടി, ബിപിടി, ബിഎസ്സി എംഎൽടി, ബിഎസ്സി ഒപ്ടോമെട്രി ടെക്നോളജി, ബിഎസ്സി മെഡിക്കൽ റിക്കാർഡ്സ് സയൻസ്, ബാച്ചിലർ ഓഫ് ഓഡിയോളജി ആൻഡ് സ്പീച്ച് ലാംഗ്വേജ് പത്തോളജി, ബിഎസ്സി ക്രിട്ടിക്കൽ കെയർ ടെക്നോളജി, ബിഎസ്സി ഡയാലസിസ് ടെക്നോളജി, ബിഎസ്സി ന്യൂക്ലിയർ മെഡിസിൻ ടെക്നോളജി, ബിഎസ്സി പ്രോസ്തെറ്റിക്സ് ആൻഡ് ഓർത്തോണ്ടിക്സ്, ബിഎസ്സി റേഡിയോളജി ആൻഡ് ഇമേജിംഗ് ടെക്നോളജി, ബിഎസ്സി റേഡിയോ തെറാപ്പി ടെക്നോളജി, ബിഎസ്സി മെഡിക്കൽ സോഷ്യോളജി, ബിഎസ്സി കാർഡിയോ പൾമനറി പെർഫ്യൂഷൻ കെയർ ടെക്നോളജി, ബിഎസ്സി ഓപ്പറേഷൻ തിയറ്റർ ആൻഡ് അനസ്തേഷ്യാ ടെക്നോളജി, ബിഎസ്സി ന്യൂറോ ഇലക്ട്രോസൈക്കോളജി, ബിഎസ്സി ആക്സിഡൻറ് ആൻഡ് എമർജൻസി കെയർ ടെക്നോളജി, ബിഎസ്സി കാർഡിയാക് ടെക്നോളജി എന്നിവയാണു പാരാമെഡിക്കൽ വിഭാഗത്തിൽപ്പെ ബിരുദ കോഴ്സുകൾ. ഒരാൾക്ക് ഏഴു കോഴ്സുകൾക്കു വരെ അപേക്ഷിക്കാം.
ഡിപ്ലോമ, ബിരുദാനന്തര ബിരുദ ഡിഗ്രി, ബിരുദാനന്തര ബിരുദ ഡിപ്ലോമ കോഴ്സുകളാണു ഗ്രൂപ്പ് ബി വിഭാഗത്തിലുള്ളത്. ഒരാൾക്ക് അഞ്ചു കോഴ്സുകൾക്കു വരെ അപേക്ഷിക്കാം. ഇതിൽ ഉൾപ്പെട്ട എംഎസ്സി ബയോ സ്റ്റാറ്റിസ്റ്റിക്സ് കോഴ്സിന് സ്റ്റാറ്റിസ്റ്റിക്സ് ഒരു വിഷയമായി പഠിച്ചു ബിരുദം നേടിയവർക്ക് അപേക്ഷിക്കാം. എംഎസ്സി മെഡിക്കൽ ഫിസിക്സ് കോഴ്സിന് ഫിസിക്സിൽ ബിരുദമാണു യോഗ്യത.
അപേക്ഷാ ഫീസ്: ഗ്രൂപ്പ് എ വിഭാഗത്തിൽ അപേക്ഷിക്കുന്നവർക്ക് 500 രൂപ. ഡിപ്ലോമ കോഴ്സുകൾക്കു കോഴ്സ് ഒന്നിന് 100 രൂപ. എംഎസ്സി കോഴ്സുകൾക്ക് കോഴ്സ് ഒന്നിന് 500 രൂപ. കൂടാതെ അഡ്മിനിസ്ട്രേറ്റീവ് ചാർജായി 800 രൂപയും നൽകണം.
തിരുവനന്തപുരം, കോട്ടയം, കൊച്ചി, കോഴിക്കോട് എന്നിവയ്ക്കു പുറമേ ബംഗളൂരു, ഭുവനേശ്വർ, ചെന്നൈ, ഡൽഹി, ഗോഹട്ടി, ഹൈദരാബാദ്, കോൽക്കത്ത, ലക്നോ, മധുര, മുംബൈ, പോണ്ടിച്ചേരി, സേലം, വെല്ലൂർ, വിജവാഡ, പെനാംഗ് (മലേഷ്യ) പ്രവേശന പരീക്ഷാ കേന്ദ്രങ്ങളാണ്.
120 മിനിറ്റ് ദൈർഘ്യമുള്ള കംപ്യൂർ അധിഷ്ഠിത പരീക്ഷയാണു നടത്തുന്നത്. ഫിസിക്സ്, കെമിസ്ട്രി, ബയോളജി എന്നിവയിൽ നിന്നുള്ള ചോദ്യങ്ങൾക്കു പുറമേ ജനറൽ എബിലിറ്റി, ആനുകാലിക വിഷയങ്ങൾ എന്നിവയിൽ നിന്നു ചോദ്യങ്ങൾ ഉണ്ടായിരിക്കും.
ഓണ്ലൈനായി അപേക്ഷ സമർപ്പിക്കാൻ തുടങ്ങുന്നതിനു മുമ്പു നിർദിഷ്ട അളവിലുള്ള ഫോട്ടോഗ്രാഫും ( 80 കെബി. വീതി 150 പിക്സെൽ, ഉയരം 150 പിക്സെൽ) കൈയൊപ്പിന്റെ സ്കാൻ ചെയ്ത കോപ്പിയും (50 കെബി, ഉയരം 50 പിക്സെൽ വീതി 150 പിക്സെൽ) തയാറാക്കി വയ്ക്കണം.
സ്പോണ്സർഷിപ് സംബന്ധിച്ച കൂടുതൽ വിവരങ്ങൾക്കും അപേക്ഷാഫോം, മാതൃകാ ചോദ്യപേപ്പർ എന്നിവയ്ക്കും വെബ്സൈറ്റ് സന്ദർശിക്കുക. വെബ്സൈറ്റ്: http:admission s.cmcvellore.ac.in ഫോണ്: +91 4ñ 6 2284255. വിലാസം: രജിസ്ട്രാർ, ക്രിസ്ത്യൻ മെഡിക്കൽ കോളജ്. വെല്ലൂർ, തമിഴ്നാട്632 002.
വെല്ലൂർ ക്രിസ്ത്യൻ മെഡിക്കൽ കോളജ് അസോസിയേഷനിൽ അംഗത്വമുള്ള ക്രിസ്ത്യൻ സംഘടനകൾക്കും അഗങ്ങൾക്കും വിദ്യാർഥികളെ സ്പോണ്സർ ചെയ്യാം.
(ഉദാ. സിഎസ്ഐയുടെ ഉത്തര, മധ്യ, ദക്ഷിണ കേരള മഹാഇടവകകൾ, മാർത്തോമാ സിറിയൻ ചർച്ച്, മലങ്കര യാക്കോബായ സിറിയൻ ഓർത്തഡോക്സ് ചർച്ച്, മലങ്കര ഓർത്തഡോക്സ് സിറിയൻ ചർച്ച് എന്നിവ).