ദേശീയ യുവജന നേതൃത്വ പുരസ്കാരങ്ങൾ വിതരണം ചെയ്തു
തേഞ്ഞിപ്പലം: കേന്ദ്ര യുവജന സ്പോർട്സ് മന്ത്രാലയം ഏർപ്പെടുത്തിയ ദേശീയ യുവജന നേതൃത്വ പുരസ്കാരം (നാഷണൽ യംഗ് ലീഡർ അവാർഡ്) നേടിയ കാലിക്കട്ട് സർവകലാശാലയ്ക്ക് കീഴിലെ അഞ്ച് കോളജുകളിലെ എൻഎസ്എസ് യൂണിറ്റുകൾക്ക് കാഷ് അവാർഡും സർട്ടിഫിക്കറ്റുകളും വൈസ് ചാൻസലർ ഡോ. കെ. മുഹമ്മദ് ബഷീർ സമ്മാനിച്ചു.
ഒന്നാം സ്ഥാനം നേടിയ തൃശൂർ കുട്ടനല്ലൂർ അച്യുതമേനോൻ ഗവണ്മെന്റ് കോളജിന് വേണ്ടി അരലക്ഷം രൂപയും സർട്ടിഫിക്കറ്റും പ്രിൻസിപ്പൽ ഡോ. എൽസമ്മ ജോസഫ് അറക്കൽ, എൻഎസ്എസ് പ്രോഗ്രാം ഓഫീസർമാരായ ഡോ. സി. സിജോ വർഗീസ്, പി.ആർ. റസീന എന്നിവർ ഏറ്റുവാങ്ങി. കോഴിക്കോട് പ്രോവിഡൻസ് കോളജിന് വേണ്ടി 40,000 രൂപയും സർട്ടിഫിക്കറ്റും പ്രിൻസിപ്പൽ സിസ്റ്റർ ഡോ. ജെസിയമ്മ ജോസഫ്, പ്രോഗ്രാം ഓഫീസർമാരായ ഡോ.ആർ. സിനി, ഡോ. ഇ. ജൂലി എന്നിവർ ഏറ്റുവാങ്ങി. ചേളന്നൂർ ശ്രീ നാരായണ കോളജിന് വേണ്ടി 35,000 രൂപയും സർട്ടിഫിക്കറ്റും പ്രോഗ്രാം ഓഫീസർ ഡോ. എൻ. അനുസ്മിത, നാലാം സ്ഥാനം നേടിയ ഇരിങ്ങാലക്കുട ക്രൈസ്റ്റ് കോളജിന് വേണ്ടി 30,000 രൂപയും സർട്ടിഫിക്കറ്റും റോബിൻസണ് പി. പൊന്മിനിശേരി, അഞ്ചാം സ്ഥാനം നേടിയ ഫാറൂഖ് കോളജിന് വേണ്ടി 25,000 രൂപയും സർട്ടിഫിക്കറ്റും പ്രിൻസിപ്പൽ ഡോ. ഇ.പി. ഇന്പിച്ചിക്കോയ എന്നിവർ ഏറ്റുവാങ്ങി.
പ്രോവൈസ് ചാൻസലർ ഡോ. പി. മോഹൻ അധ്യക്ഷനായിരുന്നു. സിൻഡിക്കറ്റ് അംഗം കെ. വിശ്വനാഥ്, രജിസ്ട്രാർ ഡോ.ടി.എ. അബ്ദുൾ മജീദ്, സർവകലാശാലാ എൻഎസ്എസ് കോഓർഡിനേറ്റർ പി.വി. വൽസരാജൻ, ഡോ. എ.ബി.മൊയ്തീൻകുട്ടി തുടങ്ങിയവർ പങ്കെടുത്തു.