പിജി ഡിപ്ലോമ കോഴ്സ്: അപേക്ഷ ക്ഷണിച്ചു
ലൈഫ്ലോംഗ് ലേണിംഗ് ആൻഡ് എക്സ്റ്റൻഷൻ വകുപ്പ് നടത്തുന്ന ഒരു വർഷത്തെ പിജി ഡിപ്ലോമ ഇൻ മാനേജ്മെന്‍റ് ഓഫ് ലേണിംഗ് ഡിസബിലിറ്റി കോഴ്സിന് അപേക്ഷ ക്ഷണിച്ചു. അവസാന തിയതി മേയ് 15. യോഗ്യത: ഏതെങ്കിലും വിഷയത്തിൽ ബിരുദം. അപേക്ഷാ ഫോമും മറ്റ് വിവരങ്ങളും സർവകലാശാലാ വെബ്സൈറ്റിൽ.
അധ്യാപക പരിശീലന കേന്ദ്രത്തിൽ ഡയറക്ടർ: അപേക്ഷ ക്ഷണിച്ചു
വിദ്യാഭ്യാസ വിഭാഗത്തിന് കേന്ദ്ര മാനവശേഷി വികസന വകുപ്പ് അനുവദിച്ച അധ്യാപക പരിശീലന കേന്ദ്രത്തിലേക്ക് ഡയറക്ടർ തസ്തികയിൽ കരാർ നിയമനത്തിന് അപേക്ഷ ക്ഷണിച്ചു. മേയ് 15നകം ഓണ്‍ലൈനിൽ അപേക്ഷിക്കണം. വിവരങ്ങൾ വെബ്സൈറ്റിൽ.
പുനർമൂല്യനിർണയ ഫലം
മൂന്നാം സെമസ്റ്റർ ബിഎസ്‌സി/ ബിസിഎ (സിയുസിബിസിഎസ്എസ്) നവംബർ 2015 പരീക്ഷയുടെ പുനർമൂല്യനിർണയ ഫലം വെബ്സൈറ്റിൽ.
ആറാം സെമസ്റ്റർ യുജി ഇന്‍റേണൽമാർക്ക്
അഫിലിയേറ്റഡ് കോളജുകളിലെ ആറാം സെമസ്റ്റർ ബിഎ/ ബിഎസ്‌സി/ ബിഎസ്‌സി ഇൻ ആൾട്ടർനേറ്റ് പാറ്റേണ്‍/ ബികോം/ ബിബിഎ/ ബിഎംഎംസി/ ബിസിഎ/ ബിഎസ്ഡബ്ല്യൂ/ ബിടിഎ/ ബിടിഎച്ച്എം/ ബിവിസി/ ബിഎച്ച്എ/ ബിഎ അഫ്സൽഉൽഉലമ (സിയുസിബിസിഎസ്എസ്) പരീക്ഷയുടെ ഇന്‍റേണൽ മാർക്ക് അപ്‌ലോഡ് ചെയ്യാനുള്ള തിയതി മേയ് നാല് വരെ നീട്ടി.
സനാതന ധർമ്മപീഠം സംഗമം
സനാതന ധർമ്മപീഠത്തിന്‍റെ ആഭിമുഖ്യത്തിൽ മേയ് ആറിന് സംഗമം നടത്തും. രാവിലെ 9.30ന് സർവകലശാലാ ഓഡിറ്റോറിയത്തിലാണ് പരിപാടി. ധർമ്മപീഠത്തിന്‍റെ പ്രവർത്തനങ്ങൾ വിപുലീകരിക്കുന്നതുമായി ബന്ധപ്പെട്ടാണ് സംഗമം നടത്തുന്നതെന്ന് കോഓർഡിനേറ്റർ സി.ശേഖരൻ അറിയിച്ചു.
അപേക്ഷ ക്ഷണിച്ചു
ഗസ്റ്റ് ഹൗസ്, ഹെൽത്ത് സെന്‍റർ എന്നിവിടങ്ങളിലെ ഉപയോഗത്തിലിരിക്കുന്ന ബെഡ്ഷീറ്റ്, തലയിണ കവർ, മേശവിരി മുതലയാവ അലക്കി, ഉണക്കി, ഇസ്തിരി ചെയ്ത് നൽകുന്നതിന് രണ്ട് വർഷത്തേക്ക് ക്വട്ടേഷൻ ക്ഷണിച്ചു. ക്വട്ടേഷൻ ഫോം പിഎൽഡി വിഭാഗത്തിൽ നിന്നും നൂറ് രൂപ നിരക്കിൽ മേയ് രണ്ട് മുതൽ 17 വരെ ലഭിക്കും. വിവരങ്ങൾ വെബ്സൈറ്റിൽ.
അധ്യാപക അവാർഡ് ദാനവും റാങ്കിംഗ് ആഘോഷവും
മികച്ച അധ്യാപകർക്കുള്ള എം.എം. ഗനി അവാർഡ് ദാനവും കേന്ദ്ര മാനവ വിഭവശേഷി മന്ത്രാലയത്തിന്‍റെ ദേശീയ റാങ്കിംഗിൽ സർവകലാശാലക്ക് മികച്ച സ്ഥാനം ലഭിച്ചതിന്‍റെ ആഘോഷവും മേയ് അഞ്ചിന് സർവകലാശാലയിൽ നടത്തും.
അസോസിയേഷൻ ഓഫ് ഇന്ത്യൻ യൂണിവേഴ്സിറ്റീസ് പ്രസിഡന്‍റ് പ്രഫ. ഡി.എസ്. ചൗഹാൻ റാങ്ക് സർട്ടിഫിക്കറ്റും ഫലകവും വൈസ് ചാൻസലർ ഡോ. കെ. മുഹമ്മദ് ബഷീറിന് കൈമാറും. എം.എം ഗനി അവാർഡ് ജേതാക്കളായ ഡോ. സോണിയ സണ്ണി, ഡോ. സി. കൃഷ്ണൻ, ഡോ. പ്രേമാനന്ദ് എഡ്വേഡ് മാളിയേക്കൽ എന്നിവർക്ക് കാഷ് അവാർഡും ഫലകവും വൈസ് ചാൻസലർ സമ്മാനിക്കും. തുടർന്ന് സർവകലാശാലക്ക് കീഴിലെ എൻജിനിയറിംഗ് ഒഴികെയുള്ള കോളജുകളിലെ പ്രിൻസിപ്പൽമാരുടെ യോഗവും ചേരും.
സെക്ഷൻ ഓഫീസർമാർക്ക് വിദഗ്ധ പരിശീലനം
സെക്ഷൻ ഓഫീസർമാർക്ക് മേയ് രണ്ട് മുതൽ നാല് വരെ വിദഗ്ധ പരിശീലനം നൽകും. രണ്ടിന് രാവിലെ 9.30ന് വൈസ് ചാൻസലർ ഡോ. കെ. മുഹമ്മദ് ബഷീർ ഉദ്ഘാടനം ചെയ്യും. പ്രോവൈസ് ചാൻസലർ ഡോ. പി. മോഹൻ അധ്യക്ഷത വഹിക്കും. രജിസ്ട്രാർ ഡോ. ടി.എ. അബ്ദുൽ മജീദ്, പരീക്ഷാ കണ്ട്രോളർ ഡോ.വി.വി.ജോർജുകുട്ടി തുടങ്ങിയവർ സംബന്ധിക്കും.