സമ്മർ കോച്ചിംഗ് ക്യാന്പ് സമാപിച്ചു
തേഞ്ഞിപ്പലം: കായിക പ്രതിഭകളെ ചെറുപ്രായത്തിൽ തന്നെ കണ്ടെത്തി രാഷ്ട്രത്തിന് വേണ്ടി ഉന്നത നേട്ടങ്ങൾ കൈവരിക്കുന്നതിന് പ്രാപ്തരാക്കുകയെന്ന ലക്ഷ്യത്തോടെ സ്കൂൾ വിദ്യാർഥികൾക്കായി കാലിക്കട്ട് സർവകലാശാല സംഘടിപ്പിച്ച സമ്മർ കോച്ചിംഗ് ക്യാന്പ് സമാപിച്ചു. 50 ദിവസത്തെ ക്യാന്പിൽ 250 ലേറെ വിദ്യാർഥികൾ വ്യത്യസ്ത കായിക ഇനങ്ങളിൽ വിദഗ്ധ പരിശീലനം നേടി. സമാപന ചടങ്ങ് ഉദ്ഘാടനം ചെയ്ത വൈസ് ചാൻസലർ ഡോ. കെ. മുഹമ്മദ് ബഷീർ വിദ്യാർഥികൾക്ക് സർട്ടിഫിക്കറ്റുകളും ജഴ്സിയും സമ്മാനിച്ചു. സർവകലാശാലയുടെ പ്രഫഷണൽ നിലവാരത്തിലുള്ള കായിക പഠന സംവിധാനങ്ങളും സ്റ്റേഡിയവും സമീപ പ്രദേശങ്ങളിലെ വിദ്യാർഥികൾക്ക് കൂടി പ്രയോജനപ്പെടുത്താൻ സർവകലാശാല സന്നദ്ധമാകുന്നത് രാഷ്ട്രത്തിന്റെ കായിക കുതിപ്പിന് പ്രോത്സാഹനം നൽകുകയെന്ന ലക്ഷ്യത്തോടെയാണെന്ന് വൈസ് ചാൻസലർ പറഞ്ഞു.
ചടങ്ങിൽ പ്രോവൈസ് ചാൻസലർ ഡോ.പി. മോഹൻ അധ്യക്ഷനായിരുന്നു. രജിസ്ട്രാർ ഡോ.ടി.എ. അബ്ദുൽ മജീദ് മുഖ്യപ്രഭാഷണം നടത്തി. കായിക പഠനവകുപ്പ് മേധാവി ഡോ.വി.പി. സക്കീർ ഹുസൈൻ, അസിസ്റ്റന്റ് രജിസ്ട്രാർ കെ.പി.മോഹനകൃഷ്ണൻ തുടങ്ങിയവർ പങ്കെടുത്തു.
ഗവേഷണ ശിൽപശാലക്ക് തുടക്കമായി
തേഞ്ഞിപ്പലം: ഗവേഷണ നിലവാരം മെച്ചപ്പെടുത്തുകയെന്ന ലക്ഷ്യത്തോടെ കാലിക്കട്ട് സർവകലാശാല കോമേഴ്സ് ആൻഡ് മാനേജ്മെന്റ് സ്റ്റഡീസ് പഠനവകുപ്പിന്റെ ആഭിമുഖ്യത്തിൽ സംഘടിപ്പിക്കുന്ന ത്രിദിന ശിൽപശാല വൈസ് ചാൻസലർ ഡോ.കെ. മുഹമ്മദ് ബഷീർ ഉദ്ഘാടനം ചെയ്തു.
പ്രോവൈസ് ചാൻസലർ ഡോ.പി. മോഹൻ മുഖ്യപ്രഭാഷണം നടത്തി. പഠനവകുപ്പ് മേധാവി ഡോ.ബി. ജോണ്സണ് അധ്യക്ഷനായിരുന്നു. സർവകലാശാലയിലെ സ്കൂൾ ഓഫ് ബിസിനസ് സ്റ്റഡീസ് ഡയറക്ടർ പ്രഫ.കെ.പി.മുരളീധരൻ വിരമിക്കുന്നതിനോടനുബന്ധിച്ചാണ് പരിപാടി സംഘടിപ്പിക്കുന്നത്. വിവിധ പഠന ശാഖകളിലെ ഗവേഷകരും അധ്യാപകരും പങ്കെടുക്കുന്നു. കെ.ടി. ഹരിശ്ചന്ദ്രകുമാർ പ്രസംഗിച്ചു. ശിൽപശാല കോഓർഡിനേറ്റർ ഡോ.ഇ.കെ. സതീഷ് സ്വാഗതവും ജോയിന്റ് കണ്വീനർ ടി.പി. രേഷ്മ നന്ദിയും പറഞ്ഞു.