കർഷകർക്ക് സൗജന്യ ജലസേചന ഉപകരണങ്ങൾ
തേഞ്ഞിപ്പലം: കാർഷികഗാർഹിക ജലവിതരണം കംപ്യൂട്ടർ നിയന്ത്രിതമാക്കി ജലം പാഴാക്കുന്നത് തടയുന്നതിനുള്ള ഉപകരണങ്ങൾ കുറഞ്ഞ ചെലവിൽ കർഷകരിൽ എത്തിക്കുകയെന്ന ലക്ഷ്യത്തോടെ നാളെ രാവിലെ 11 ന് സർവകലാശാലാ കാന്പസിൽ സയൻസ് ബ്ലോക്കിലെ ആര്യഭട്ട ഹാളിൽ ഉപകരണങ്ങളുടെ പ്രദർശനവും പരിശീലനവും സംഘടിപ്പിക്കുന്നു.
വൈസ് ചാൻസലർ ഡോ.കെ.മുഹമ്മദ് ബഷീർ ഉദ്ഘാടനം നിർവഹിക്കും. പ്രോവൈസ് ചാൻസലർ ഡോ.പി.മോഹൻ ഉപകരണങ്ങൾ സ്വിച്ചോണ് ചെയ്യും. 20 കർഷകർക്ക് ഉപകരണങ്ങൾ സൗജന്യമായി നൽകും. നിശ്ചിത സമയത്ത് മോട്ടോർ പ്രവർത്തിപ്പിക്കുന്ന പ്രോഗ്സ്റ്റാർട്ട്, മൊബൈൽ ഫോണ് ഉപയോഗിച്ച് മോട്ടോർ പ്രവർത്തിപ്പിക്കുന്ന റിമോസ്റ്റാർട്ട് തുടങ്ങിയവയുടെ പ്രദർശനം ഉണ്ടായിരിക്കും. സർവകലാശാലാ ഫിസിക്സ് പഠനവകുപ്പിലെ വിജ്ഞാന വ്യാപന വിഭാഗമാണ് ഈ ഉപകരണങ്ങൾ വികസിപ്പിച്ചെടുത്തത്. ഫോൺ: 9447924725.
തൊഴിൽ മേള സംഘടിപ്പിച്ചു
തേഞ്ഞിപ്പലം: സംസ്ഥാന എംപ്ലോയ്മെന്റ് എക്സ്ചേഞ്ചിന് കീഴിലെ എംപ്ലോയബിലിറ്റി സെന്ററിന്റെ ആഭിമുഖ്യത്തിൽ കാലിക്കട്ട് സർവകലാശാല എൻജിനിയറിംഗ് കോളജിന്റെ (സിയുഐഇടി) സഹകരണത്തോടെ സംഘടിപ്പിച്ച തൊഴിൽ മേള വൈസ് ചാൻസലർ ഡോ. കെ. മുഹമ്മദ് ബഷീർ ഉദ്ഘാടനം ചെയ്തു.
കോഴിക്കോട് മേഖലാ എംപ്ലോയ്മെന്റ് ഡെപ്യൂട്ടി ഡയറക്ടർ മോഹൻ ലൂക്കോസ് അധ്യക്ഷനായിരുന്നു. സർവകലാശാലാ എൻജിനിയറിംഗ് കോളജിലെ പ്രിൻസിപ്പൽ ബാലകൃഷ്ണപിള്ള, സർവകലാശാലാ പ്ലേസ്മെന്റ് ഓഫീസർ ഡോ. സി.ഡി. സെബാസ്റ്റ്യൻ, കോഴിക്കോട് ഡിവിഷനൽ എംപ്ലോയ്മെന്റ് ഓഫീസർ പി.എൻ. സുരേഷ് ബാബു, മലപ്പുറം ജില്ലാ എംപ്ലോയ്മെന്റ് ഓഫീസർ എ.കെ.അബ്ദുസമദ്, സർവകലാശാലാ പി.ആർ.ഒ എം.വി.സക്കറിയ, എഡ്യുസ്കിൽ ഓപ്പറേഷൻസ് മാനേജർ എം.എസ്.രാജേഷ് എന്നിവർ പ്രസംഗിച്ചു.
ബ്രിഡ്ജ് കോഴ്സ് സമാപിച്ചു
തേഞ്ഞിപ്പലം: സ്കൂൾ വിദ്യാർഥികളുടെ സമഗ്ര വ്യക്തിത്വവികസനം ലക്ഷ്യമാക്കി കാലിക്കട്ട് സർവകലാശാലാ ലൈഫ്ലോംഗ് ലേണിംഗ് പഠനവകുപ്പ് സംഘടിപ്പിച്ച ബ്രിഡ്ജ് കോഴ്സ് സമാപിച്ചു.
പത്ത് ദിവസത്തെ കോഴ്സിൽ യോഗ, ടൈംമാനേജമെന്റ്, കരിയർ ഗൈഡൻസ്, ഗോൾ സെറ്റിംഗ് തുടങ്ങിയ വിഷയങ്ങളിൽ ക്ലാസുകൾ നടത്തി. സമാപന ചടങ്ങിൽ പ്രോവൈസ് ചാൻസലർ ഡോ. പി. മോഹൻ മുഖ്യാതിഥിയായിരുന്നു. വിദ്യാർഥികൾക്കുള്ള സർട്ടിഫിക്കറ്റുകളും അദ്ദേഹം വിതരണം ചെയ്തു. ലൈഫ്ലോംഗ് ലേണിംഗ് പഠനവകുപ്പ് മേധാവി ഡോ. ഇ.എം. മനോജം അധ്യക്ഷയായിരുന്നു. ടി.സി.സജിത്കുമാർ പങ്കെടുത്തു.