ഏഴാം സെമസ്റ്റർ ബിടെക് പരീക്ഷാഫലം
കണ്ണൂർ സർവകലാശാലയുടെ 2016 നവംബറിൽ നടത്തിയ ഏഴാം സെമസ്റ്റർ ബിടെക് (റഗുലർ, സപ്ലിമെന്ററി) പരീക്ഷാഫലം പ്രസിദ്ധീകരിച്ചു. ഫലം സർവകലാശാല വെബ്സൈറ്റിൽ ലഭ്യമാണ്. പുനഃപരിശോധന, സൂക്ഷ്മപരിശോധന, ഫോട്ടോകോപ്പി എന്നിവയ്ക്കുള്ള അപേക്ഷകൾ വെബ്സൈറ്റിൽ നിന്നും ഡൗണ്ലോഡ് ചെയ്ത് മാർക്ക് ലിസ്റ്റിന്റെ സ്വയം സാക്ഷ്യപ്പെടുത്തിയ പകർപ്പിനോടൊപ്പം 13നകം സർവകലാശാലയിൽ സമർപ്പിക്കണം.
കാലടി സംസ്കൃത സർവകലാശാലയിൽ ആയുർവേദ പഞ്ചകർമ ആൻഡ് സ്പാ തെറാപ്പി കോഴ്സ്
കാലടി ശ്രീശങ്കരാചാര്യ സംസ്കൃത സർവകലാശാലയുടെ ഏറ്റുമാനൂർ പ്രാദേശിക കേന്ദ്രത്തിൽ ഡിപ്ലോമ ഇൻ ആയുർവേദ പഞ്ചകർമ ആൻഡ് ഇന്റർനാഷണൾ സ്പാ തെറാപ്പി കോഴ്സിലേക്ക് അപേക്ഷ ക്ഷണിച്ചു. പ്ലസ്ടു/വൊക്കേഷണൽ ഹയർ സെക്കൻഡറി യോഗ്യതയുള്ളവർക്ക് അപേക്ഷിക്കാം. പ്രായം 2017 മേയ് 22ന് 30 വയസിൽ കവിയരുത്. ബിരുദമുള്ളവർക്ക് മുൻഗണന. പ്ലസ്ടു/ബിരുദ മാർക്ക്, ശാരീരിക ക്ഷമത, അഭിമുഖം ഇവയുടെ അടിസ്ഥാനത്തിലാണ് പ്രവേശനം. അപേക്ഷകൾ ഓൺലൈൻ വഴി സമർപ്പിക്കേണ്ട അവസാന തീയതി ഈമാസം 15 ആണ്. അപേക്ഷയുടെ പ്രിന്റ് കോപ്പിയും സർട്ടിഫിക്കറ്റുകളുടെ പകർപ്പും ലഭിക്കേണ്ട അവസാന തീയതി 20 ആണ്. വിശദവിവരങ്ങൾക്ക് www.ssus.ac.in/www.ssusonline.org എന്ന വെബ്സൈറ്റ് സന്ദർശിക്കുക.