പ്രഫ. കെ.പി. മുരളീധരന് യാത്രയയപ്പ് നൽകി
തേഞ്ഞിപ്പലം: കാലിക്കട്ട് സർവകലാശാല കോമേഴ്സ് ആൻഡ് മാനേജ്മെന്റ് സ്റ്റഡീസ് പഠനവിഭാഗത്തിൽ 18 വർഷം പ്രഫസറായിരുന്ന ഡോ. കെ.പി. മുരളീധരന് പൂർവവിദ്യാർഥികളും ഗവേഷകരും പഠനവകുപ്പും യാത്രയയപ്പ് നൽകി. 36 വർഷത്തെ സേവനത്തിനുശേഷമാണ് അദ്ദേഹം വിരമിക്കുന്നത്.
പ്രോവൈസ് ചാൻസലർ ഡോ.പി. മോഹൻ ഉദ്ഘാടനം ചെയ്തു. പഠനവകുപ്പ് മേധാവി ഡോ.ബി. ജോണ്സണ് അധ്യക്ഷത വഹിച്ചു. കണ്ണൂർ സർവകലാശാലാ പ്രോവൈസ് ചാൻസലർ ഡോ.ടി. അശോകൻ, സാഹിത്യകാരൻ പി.ആർ. നാഥൻ, ധാക്ക സർവകലാശാലയിലെ ഡോ. സയ്മ ഫിർദൗസ് ചൗധരി, പോർട്ടോറിക്കോ സർവകലാശാലയിലെ പ്രഫസർ ഡോ. ജസ്റ്റിൻ പോൾ, രജിസ്ട്രാർ ഡോ.ടി.എ. അബ്ദുൽ മജീദ്, സിൻഡിക്കറ്റംഗങ്ങളായ ഡോ.പി. ശിവദാസൻ, ഡോ.കെ. ഫാത്തിമത്ത് സുഹ്റ, കെ. വിശ്വനാഥ്, ഡോ.കെ.ജി.എസ്. നാരായണൻ, ഡോ. ഹരികുമാരൻ തന്പി, ഡോ.ഇ.കെ. സതീഷ്, ഡോ.പി. രവീന്ദ്രൻ, ഡോ. ഗോവിന്ദവർമ്മ രാജ, വിനോദ് നീക്കാംപുറത്ത്, ആർ.എസ്. പണിക്കർ, പി. അശോകൻ, ഹബീബ് കോയ തങ്ങൾ തുടങ്ങിയവർ പങ്കെടുത്തു.
മികച്ച ഗവേഷകനുള്ള പുരസ്കാരം ഡോ. ജസ്റ്റിൻ പോളിന്
തേഞ്ഞിപ്പലം: കെ.പി. മുരളീധരൻ റിസർച്ച് സ്കോളേഴ്സ് ട്രസ്റ്റ് ഏർപ്പെടുത്തിയ കോമേഴ്സ് ആൻഡ് മാനേജ്മെന്റ് മേഖലയിലെ മികച്ച ഗവേഷകനുള്ള പ്രഥമ പുരസ്കാരത്തിന് അമേരിക്കയിലെ പോർട്ടോറിക്കോ സർവകലാശാലയിലെ ഡോ. ജസ്റ്റിൻ പോൾ അർഹനായി. 10001 രൂപയും പ്രശസ്തി പത്രവും ഫലകവുമടങ്ങുന്നതാണ് അവാർഡ്. പ്രഫ. കെ.പി. മുരളീധരന്റെ യാത്രയയപ്പിനോടനുബന്ധിച്ച് സർവകലാശാലയിൽ സംഘടിപ്പിച്ച ദ്വിദിന അന്താരാഷ്ട്ര സെമിനാറിന്റെ സമാപനച്ചടങ്ങിലാണ് അവാർഡ് സമ്മാനിച്ചത്.
സുവോളജി പഠനവകുപ്പിൽ പ്രഭാഷണം
തേഞ്ഞിപ്പലം: കാലിക്കട്ട് സർവകലാശാല സുവോളജി പഠനവകുപ്പിന്റെ ആഭിമുഖ്യത്തിൽ ഒന്പതിന് പ്രഫ. ടി.സി. നരേന്ദ്രൻ മെമ്മോറിയൽ പ്രഭാഷണം സംഘടിപ്പിക്കും. ആര്യഭട്ട ഹാളിൽ രാവിലെ 11ന് വൈസ് ചാൻസലർ ഡോ.കെ. മുഹമ്മദ് ബഷീർ ഉദ്ഘാടനം ചെയ്യും. ഓസ്ട്രേലിയയിലെ ചാൾസ് സ്റ്റർട്ട് സർവകലാശാലയിലെ ഡോ. അനന്തനാരായണൻ രാമൻ പ്രഭാഷണം നടത്തും. പ്രഫ.ടി.സി. നരേന്ദ്രൻ ട്രസ്റ്റ് ഫോർ ആനിമൽ ടാക്സോണമിയുടെ സഹകരണത്തോടെയാണ് പരിപാടി.