കാലിക്കട്ടിൽ ബിഎസ്സിക്ക് 75.1, ബിസിഎയ്ക്ക് 79.9 ശതമാനം വിജയം
തേഞ്ഞിപ്പലം: കാലിക്കട്ട് സർവകലാശാല അവസാന വർഷ ബിഎസ്സി, ബിസിഎ പരീക്ഷാ ഫലം പ്രഖ്യാപിച്ചു. ബിഎസ്സിക്ക് 75.1 ശതമാനവും ബിസിഎയ്ക്ക് 79.9 ശതമാനവുമാണ് വിജയം.
12177 വിദ്യാർഥികളാണ് ബിഎസ്സി പരീക്ഷ എഴുതിയത്. ഇതിൽ 9151 പേർ വിജയിച്ചു. ബിസിഎയ്ക്ക് 1409 വിദ്യാർഥികൾ പരീക്ഷ എഴുതിയപ്പോൾ 1146 പേർ ഉപരിപഠനത്തിനു യോഗ്യത നേടി. ഏപ്രിൽ 23നാണ് ഇരു കോഴ്സുകളുടെയും അവസാന വർഷ എഴുത്തു പരീക്ഷ യൂണിവേഴ്സിറ്റി പരീക്ഷാഭവൻ പൂർത്തിയാക്കിയത്. മേയ് എട്ടിനു പ്രാക്ടിക്കൽ പരീക്ഷയും പൂർത്തിയാക്കി. പരീക്ഷാ ഫലം സംബന്ധിച്ച വിശദവിവരങ്ങൾ യൂണിവേഴ്സിറ്റി വെബ്സൈറ്റിൽ ലഭിക്കുമെന്ന് പരീക്ഷാ കണ്ട്രോളർ ഡോ. വി.വി. ജോർജ്കുട്ടി അറിയിച്ചു.