ശിൽപശാല സംഘടിപ്പിച്ചു
തേഞ്ഞിപ്പലം: ശാസ്ത്ര പഠനഗവേഷണ രംഗത്ത് മികവുയർത്തുന്നതിനുള്ള ’മാത്തമാറ്റിക’ സോഫ്റ്റ് വെയറിനെക്കുറിച്ച് ദക്ഷിണേന്ത്യയിലെ തെരഞ്ഞെടുത്ത അധ്യാപകർക്കായി കാലിക്കട്ട് സർവകലാശാല സംഘടിപ്പിച്ച ശിൽപശാല സ്കൂൾ ഓഫ് കെമിക്കൽ ആൻഡ് ഫിസിക്കൽ സയൻസസ് വിഭാഗം ഡീൻ ഡോ.ഏബ്രഹാം ജോസഫ് ഉദ്ഘാടനം ചെയ്തു.
നൂതന സോഫ്റ്റ് വെയറുകൾ ഉപയോഗിക്കാനുള്ള അവസരം വിദ്യാർഥികളും ഗവേഷകരും പരമാവധി പ്രയോജനപ്പെടുത്തേണ്ടതുണ്ടെന്ന് അദ്ദേഹം പറഞ്ഞു. മുൻ കാലങ്ങളിലേക്കാൾ കുറഞ്ഞ ചിലവിൽ ഇപ്പോൾ സോഫ്റ്റ് വെയറുകൾ ലഭ്യമാവുന്നത് അനുകൂല ഘടകമാണെന്നും അദ്ദേഹം അറിയിച്ചു. ഫിസിക്സ്, കെമിസ്ട്രി, മെറ്റീരിയൽ സയൻസ്, സ്റ്റാറ്റിസ്റ്റിക്സ്, മാത്തമാറ്റിക്സ് തുടങ്ങിയ പഠനശാഖകൾക്ക് കൂടുതൽ പ്രയോജനകരമാകുന്നതാണ് ’മാത്തമാറ്റിക’ സോഫ്റ്റ് വെയർ. കേരളം, കർണാടക, തമിഴ്നാട് എന്നിവിടങ്ങളിലെ അധ്യാപകരും കാന്പസിലെ ഗവേഷകരും ശിൽപശാലയിൽ പങ്കെടുത്തു. ഫിസിക്സ് പഠനവകുപ്പ് മേധാവി ഡോ.പി.പി.പ്രദ്യുമ്നൻ അധ്യക്ഷതവഹിച്ചു. പോണ്ടിച്ചേരി സർവകലാശാലയിലെ ഫിസിക്കൽ ആൻഡ് കെമിക്കൽ സയൻസസ് വിഭാഗം ഡീൻ പ്രഫ.ജി.ഗോവിന്ദരാജ് സോഫ്റ്റ് വെയറിനെക്കുറിച്ച് പ്രഭാഷണം നടത്തി. പ്രഫ.വി.എം.അബ്ദുൾ മുജീബ്, ഡോ.മുഹമ്മദ് ഷാഹിൻ തയ്യിൽ, ഡോ.പ്രീതി കുറ്റിപ്പുലാക്കൽ തുടങ്ങിയവർ പ്രസംഗിച്ചു.