ഏകജാലക ബിരുദ പ്രവേശനം: മൂന്നാംഘട്ട അലോട്ട്മെന്റ് ഇന്ന്
കാലിക്കട്ട് സർവകലാശാലയുടെ ഏകജാലക ബിരുദ പ്രവേശന മൂന്നാംഘട്ട അലോട്ട്മെന്റ് ഇന്ന് രാവിലെ പത്ത് മുതൽ ലഭിക്കും. അലോട്ട്മെന്റ് ലഭിച്ചവർ മാൻഡേറ്ററി ഫീസായി ജനറൽ വിഭാഗം 425 രൂപയും എസ് സി, എസ്ടി വിഭാഗം 100 രൂപയും അടച്ച് അലോട്ട്മെന്റ് ഉറപ്പാക്കണം.
മുന്പ് അലോട്ട്മെന്റ് ലഭിച്ച് മാൻഡേറ്ററി ഫീസ് അടച്ചവർ വീണ്ടും അടക്കേണ്ടതില്ല. ഫീസടയ്ക്കാനുള്ള ലിങ്ക് www.uoc.ac.in ഇന്ന് രാവിലെ 11ന് മുതൽ 29 വരെ ലഭ്യമാവും. ഒന്ന്, രണ്ട്, മൂന്ന് അലോട്ട്മെന്റ് ലഭിച്ച എല്ലാ വിദ്യാർഥികളും നിർബന്ധമായും സ്ഥിരം, താത്ക്കാലിക പ്രവേശനത്തിന് വേണ്ടി 29നകം അതത് കോളജുകളിൽ റിപ്പോർട്ട് ചെയ്യണം.
ഒന്നാമത്തെ ഓപ്ഷൻ ലഭിച്ചവരും ലഭിച്ച ഓപ്ഷനിൽ തൃപ്തരായവരും അഡ്മിറ്റ് കാർഡ് എടുത്ത് 29നകം എല്ലാ രേഖകളും സഹിതം കോളജിൽ സ്ഥിരപ്രവേശനം നേടണം. ലഭിച്ച ഓപ്ഷനിൽ തൃപ്തരായവർ അഡ്മിറ്റ് കാർഡ് എടുക്കുന്നതിന് എല്ലാ ഹയർ ഓപ്ഷനുകളും റദ്ദ് ചെയ്യണം. അലോട്ട്മെന്റ് ലഭിച്ച് മാൻഡേറ്ററി ഫീസ് അടച്ച് ഹയർ ഓപ്ഷൻ നിലനിർത്തിയ വിദ്യാർഥികൾ അലോട്ട്മെന്റ് കാർഡ് എടുത്ത് 29നകം കോളജിൽ റിപ്പോർട്ട് ചെയ്ത് താത്ക്കാലിക പ്രവേശനം നേടണം. താത്ക്കാലിക അഡ്മിഷൻ നേടുന്നവർ സർട്ടിഫിക്കറ്റുകൾ പരിശോധനയ്ക്കായി ഹാജരാക്കേണ്ടതുണ്ടെങ്കിലും കോളജിൽ സമർപ്പിക്കുകയോ ഫീസടക്കുകയോ ചെയ്യേണ്ടതില്ല. ലഭിച്ച ഓപ്ഷനിൽ തൃപ്തരായവർ ഹയർ ഓപ്ഷനുകൾ പരിഗണിക്കേണ്ടതില്ലെങ്കിൽ നിർബന്ധമായും റദ്ദ് ചെയ്യണം. ഹയർ ഓപ്ഷനുകൾ നിൽനിർത്തുന്ന പക്ഷം പ്രസ്തുത ഹയർ ഓപ്ഷനിലേക്ക് ഏതെങ്കിലും ഒന്നിലേക്ക് തുടർന്ന് അലോട്ട്മെന്റ് ലഭിച്ചാൽ സ്വീകരിക്കണം. ഇതോടെ മുന്പ് ലഭിച്ച അലോട്ട്മെന്റ് നഷ്ടപ്പെടും. അത് യാതൊരു കാരണവശാലും പുനഃസ്ഥാപിച്ച് നൽകുന്നതല്ല. എല്ലാ ഹയർ ഓപ്ഷനുകളും റദ്ദാക്കാൻ നോഡൽ സെന്ററുകൾ മുഖാന്തരം മാത്രമേ സാധ്യമാവുകയുള്ളൂ. വിദ്യാർഥികൾക്ക് സ്വന്തമായി ലോഗിൻ ചെയ്ത് ഹയർ ഓപ്ഷനുകൾ ഭാഗികമായി റദ്ദാക്കാം. വിഭിന്നശേഷി വിഭാഗത്തിലുള്ളവർക്കുള്ള അലോട്ട്മെന്റും ഇതോടൊപ്പം പ്രസിദ്ധീകരിച്ചിട്ടുണ്ട്.
എഡ്യുക്കേഷൻ പഠനവകുപ്പിൽ എംഎഡ് പ്രവേശന അഭിമുഖം
കാന്പസിലെ എഡ്യുക്കേഷൻ പഠനവകുപ്പിൽ എംഎഡ് പ്രവേശന റാങ്ക് ലിസ്റ്റ് പ്രസിദ്ധീകരിച്ചു. അഭിമുഖം ജനറൽ മെറിറ്റിൽ (ഉറപ്പായവർക്കും സാധ്യതാ ലിസ്റ്റും) 27നും, സംവരണ സീറ്റുകളിലേക്ക് 28നും, ഒഴിവുവരുന്ന സീറ്റുകളിലേക്ക് 29നും പഠനവകുപ്പിൽ രാവിലെ പത്തിന് നടക്കും. യോഗ്യത പരീക്ഷാ മാർക്ക് ലിസ്റ്റുകളും സർട്ടിഫിക്കറ്റും, ടിസി, സ്വഭാവ സർട്ടിഫിക്കറ്റ്, മറ്റ് സർവകലാശാലകളിൽ നിന്ന് യോഗ്യത നേടിയവർ ഇക്വലൻസി സർട്ടിഫിക്കറ്റ് എന്നിവ ഹാജരാക്കണം. ഫീസ് അന്നു തന്നെ അടക്കണം. അഭിമുഖത്തിന് നേരിട്ട് വരാൻ കഴിയാത്തവർക്ക് മറ്റൊരാളെ രേഖാമൂലം നിയോഗിക്കാം. വിവരങ്ങൾക്ക്: 0494 2407251.
26, 27 തിയതികളിലെ എസ്ഡിഇപിജി പരീക്ഷ മാറ്റി
26, 27 തിയതികളിൽ നടത്താനിരുന്ന വിദൂരവിദ്യാഭ്യാസം എംഎ, എംഎസ് സി, എംകോം അവസാന വർഷം, മൂന്ന്, നാല് സെമസ്റ്റർ ഫസ്റ്റ് അപ്പിയറൻസ്, സപ്ലിമെന്ററി, ഇംപ്രൂവ്മെന്റ് പരീക്ഷ മാറ്റി. പുതുക്കിയ തിയതി വെബ്സൈറ്റിൽ.
നാലാം സെമസ്റ്റർ എസ്ഡിഇയുജി പരീക്ഷാ ഹാൾടിക്കറ്റ്
28ന് ആരംഭിക്കുന്ന വിദൂരവിദ്യാഭ്യാസം നാലാം സെമസ്റ്റർ ബിഎ, ബിഎ അഫ്സൽഉൽഉലമ, ബിഎസ് സി, ബിഎംഎംസി (സിയുസിബിസിഎസ്എസ്) റഗുലർ, സപ്ലിമെന്ററി, ഇംപ്രൂവ്മെന്റ് പരീക്ഷയുടെ ഹാൾടിക്കറ്റുകൾ വെബ്സൈറ്റിൽ ലഭ്യമാണ്.
നാലാം വർഷ ബിപിഎഡ് കോച്ചിംഗ്എക്സ്റ്റേണൽ പ്രാക്ടിക്കൽ പരീക്ഷ
നാലാം വർഷ ബിപിഎഡ് (ഇന്റഗ്രേറ്റഡ്) കോച്ചിംഗ്എക്സ്റ്റേണൽ പ്രാക്ടിക്കൽ പരീക്ഷ 28ന് ആരംഭിക്കും. ഷെഡ്യൂൾ വെബ്സൈറ്റിൽ.
നാലാം സെമസ്റ്റർ ബിടെക്, ബിആർക് പരീക്ഷ കേന്ദ്രങ്ങളിൽ മാറ്റം
നാലാം സെമസ്റ്റർ ബിടെക് (2009 സ്കീം) പരീക്ഷയ്ക്ക് മുതലമട പാലക്കാട് ഇൻസ്റ്റിറ്റ്യൂട്ട് ഓഫ് സയൻസ് ആൻഡ് ടെക്നോളജിയിൽ രജിസ്റ്റർ ചെയ്തവർ പാലക്കാട് എൻഎസ്എസ് കോളജ് ഓഫ് എൻജിനിയറിംഗിലാണ് ഹാജരാകേണ്ടത്.
നാലാം സെമസ്റ്റർ ബിആർക് (2012 സ്കീം) റഗുലർ പരീക്ഷയ്ക്ക് കളൻതോട് കെഎംസിടി എൻജിനിയറിംഗ് കോളജിൽ രജിസ്റ്റർ ചെയ്തവർ ചേലേന്പ്ര ദേവകിയമ്മ ഗുരുവായൂരപ്പൻ കോളജ് ഓഫ് ആർകിടെക്ചറിലും, എല്ലാ സപ്ലിമെന്ററി പരീക്ഷാർഥികളും ഉള്ളിയേരി എം. ദാസൻ ഇൻസ്റ്റിറ്റ്യൂട്ട് ഓഫ് ടെക്നോളജിയിലും പരീക്ഷയ്ക്ക് ഹാജരാകണം. ഹാൾടിക്കറ്റ് രണ്ട് സെന്ററുകളിൽ നിന്നും ലഭിക്കും.
പരീക്ഷാഫലം
2016 ജൂണിൽ നടത്തിയ ഒന്നാം സെമസ്റ്റർ എംഫിൽ ഇംഗ്ലീഷ് പരീക്ഷാഫലം വെബ്സൈറ്റിൽ.
ജനുവരിയിൽ നടത്തിയ രണ്ടാം സെമസ്റ്റർ എംഫിൽ കോമേഴ്സ് പരീക്ഷാഫലം വെബ്സൈറ്റിൽ.
2016 ജൂണ്, 2017 ജനുവരി മാസങ്ങളിൽ നടത്തിയ ഒന്ന്, രണ്ട് സെമസ്റ്റർ എംഫിൽ ലൈബ്രറി ആൻഡ് ഇൻഫർമേഷൻ സയൻസ് പരീക്ഷാഫലം വെബ്സൈറ്റിൽ.
2016 ഡിസംബറിൽ നടത്തിയ ഒന്ന്, മൂന്ന് സെമസ്റ്റർ എംഎ ഫിലോസഫി (സിസിഎസ്എസ്) പരീക്ഷാഫലം വെബ്സൈറ്റിൽ.
2016 ഡിസംബറിൽ നടത്തിയ ഒന്ന്, മൂന്ന് സെമസ്റ്റർ എംടിടിഎം, എംഎസ് സി ജനറൽ ബയോടെക്നോളജി (സിയുസിഎസ്എസ്) പരീക്ഷാഫലം വെബ്സൈറ്റിൽ. പുനർമൂല്യനിർണയത്തിന് എംടിടിഎംജൂലൈ ഏഴ് വരെയും എംഎസ് സി ജനറൽ ബയോടെക്നോളജിക്ക്ജൂലൈ അഞ്ച് വരെയും അപേക്ഷിക്കാം.
ചക്ക വിഭവങ്ങൾ: സർവകലാശാലയിൽ വനിതകൾക്ക് സൗജന്യ പരിശീലനം
ചക്ക ഉപയോഗിച്ച് കാൻഡി, ടോഫി, ഹൽവ, കട്ലറ്റ്, ജാം തുടങ്ങിയ വിവിധ ഉൽപ്പന്നങ്ങൾ നിർമിക്കുന്നതിന് കാലിക്കട്ട് സർവകലാശാലയിൽ വനിതകൾക്ക് പത്തു ദിവസത്തെ സൗജന്യ വിദഗ്ധ പരിശീലനം നൽകുന്നു. ബ്ലാക്ക്, വൈറ്റ് ഫോറസ്റ്റ്, ഫ്രഞ്ച്, ബട്ടർ, പ്ലം, ക്രീം തുടങ്ങിയ വ്യത്യസ്തയിനം കേക്കുകളുടെ നിർമാണവും പരിശീലിപ്പിക്കും. നിശ്ചിത വിദ്യാഭ്യാസ യോഗ്യതയില്ല. ചേരാൻ താൽപ്പര്യമുള്ളവർ സർവകലാശാലാ കാന്പസിലെ ലൈഫ്ലോംഗ് ലേണിംഗ് ആൻഡ് എക്സ്റ്റൻഷൻ പഠനവകുപ്പുമായി ബന്ധപ്പെടുക. കോഴ്സ് ജൂലൈ രണ്ടാം വാരം ആരംഭിക്കും. ഫോണ് : 0494 2407360, 2407335.