ബിരുദ ഏകജാലകം : മൂന്നാംഘട്ട അലോട്ട്മെന്റ് പ്രസിദ്ധീകരിച്ചു
ബിരുദ ഏകജാലകം : മൂന്നാം ഘട്ട അലോട്ട്മെന്റ് പ്രസിദ്ധീകരിച്ചു. യോഗ്യത നേടിയവർ ഇന്നു വൈകുന്നേരം നാലിനു മുൻപായി പ്രവേശനം നേടണം. 29 മുതൽ 30 വരെ ഓപ്ഷനുകൾ പുനക്രമീകരിക്കാം. അലോട്ട്മെന്റ് ലഭിച്ച അപേക്ഷകർ അലോട്ട്മെന്റ് മെമ്മോയുടെ പ്രിന്റൗട്ട് എടുത്ത് ഓണ്ലൈനായി സർവകലാശാല അക്കൗണ്ടിൽ ഫീസ് അടച്ച് ഇന്നു വൈകുന്നേരം നാലിനു മുൻപായി അലോട്ട്മെന്റ് ലഭിച്ച കോളജിൽ യോഗ്യത തെളിയിക്കുന്ന അസൽ സാക്ഷ്യപത്രങ്ങൾ സഹിതം ഹാജരായി പ്രവേശനം നേടണം. ഇന്നു വൈകുന്നേരം നാലിനു മുൻപായി ഫീസ് അടക്കാത്തവരുടെയും ഫീസടച്ച ശേഷം കോളജിൽ പ്രവേശനം നേടാത്തവരുടെയും അലോട്ട്മെന്റ് റദ്ദാക്കും. തുടർന്നുള്ള അലോട്ട്മെന്റിലേക്ക് ഇവരെ പരിഗണിക്കുന്നതല്ല. അപേക്ഷകൻ തനിക്ക് ലഭിച്ച അലോട്ട്മെന്റിൽ തൃപ്തനാണെങ്കിൽ തുടർ അലോട്ട്മെന്റിൽ പരിഗണിക്കപ്പെടാതിരിക്കാനായി അവശേഷിക്കുന്ന ഹയർ ഓപ്ഷനുകൾ റദ്ദാക്കേണ്ടതോ സ്ഥിര പ്രവേശം നേടേണ്ടതോ ആണ്. ഉയർന്ന ഓപ്ഷനുകൾ നിലനിർത്തിയാൽ തുടർന്നുള്ള അലോട്ട്മെന്റിൽ മാറ്റം വന്നേക്കാം. ഇപ്രകാരം മാറ്റം ലഭിക്കുന്ന പക്ഷം പുതിയ അലോട്ട്മെന്റ് നിർബന്ധമായും സ്വീകരിക്കണം. ആദ്യം ലഭിച്ച അലോട്ട്മെന്റ് നഷ്ടപ്പെടുകയും ചെയ്യും. എന്നാൽ ഇപ്രകാരം മാറ്റം ലഭിക്കുന്നവർ പുതുതായി ഫീസൊടുക്കേണ്ടതില്ല
നാളെ രാവിലെ ഒന്പതു മുതൽ 30 വരെ ഓപ്ഷനുകൾ പുനക്രമീകരിക്കുന്നതിനുള്ള സൗകര്യം ലഭ്യമാണ്. ഹയർ ഓപ്ഷനുകൾ നിലനിർത്താൻ ആഗ്രഹിക്കുന്ന അപേക്ഷകർ ഒഴികെയുള്ളവർ കോളജുകളിൽ നിശ്ചിത ട്യൂഷൻ ഫിസ് അടച്ച് സ്ഥിര പ്രവേശനം ഉറപ്പുവരുത്തണം.
ഒന്നും രണ്ടും മൂന്നും അലോട്ട്മെന്റുകളിലൂടെ സ്ഥിര പ്രവേശം നേടിയവർ ഹയർ ഓപ്ഷനുകൾ റദ്ദാക്കേണ്ടതില്ല. നിലവിൽ അലോട്ട്മെന്റ് ലഭിച്ചവർ ഹയർ ഓപ്ഷനുകൾ നിലനിർത്താൻ ആഗ്രഹിക്കുന്ന പക്ഷം അലോട്ട്മെന്റ് ലഭിച്ച കോളജുകളിൽ താത്കാലിക പ്രവേശനം നേടണം. എന്നാൽ ഒന്നും രണ്ടും അലോട്ട്മെന്റിൽ ലഭിച്ച അലോട്ട്മെന്റ് സ്റ്റാറ്റസ് തന്നെയാണു മൂന്നാം അലോട്ട്മെന്റിലും കാണിക്കുന്നതെങ്കിൽ അതേ കോളജിൽ തന്നെ പ്രവേശനത്തിനായി വീണ്ടും റിപ്പോർട്ട് ചെയ്യേണ്ടതില്ല.
വിവിധ പ്രോഗ്രാമുകളിലേക്കുള്ള ഫീസ് സംബന്ധിച്ച ഉത്തരവുകൾ ക്യാപ് വെബ്സൈറ്റിൽ നല്കിയിട്ടുണ്ട്. സർവകലാശാല നിഷ്കർഷിച്ചിരിക്കുന്നതിനേക്കാൾ കൂടുതൽ ഫീസ് ഈടാക്കുന്ന കോളജുകൾക്കെതിരേ ഉചിതമായ ശിക്ഷാ നടപടികൾ സ്വീകരിക്കുന്നതായിരിക്കും.
ഒന്നാം വർഷ ബിരുദ ക്ലാസുകൾ നാളെ ആരംഭിക്കും : സ്ഥിരപ്രവേശം നേടിയവർ മാത്രം ക്ലാസുകളിൽ ഹാജരായാൽ മതിയാവും
എംജി സർവകലാശാലയോട് അഫിലിയേറ്റ് ചെയ്തിട്ടുള്ള ആർട്സ് ആൻഡ് സയൻസ് കോളജുകളിൽ നടത്തുന്ന ഒന്നാം വർഷ ബിരുദ പ്രോഗ്രാമുകളിലെ ക്ലാസുകൾ നാളെ ആരംഭിക്കും. ഒന്നും രണ്ടും മൂന്നും അലോട്ട്മെന്റുകളിൽ സ്ഥിരപ്രവേശം നേടിയവർ മാത്രം ക്ലാസുകളിൽ ഹാജരായാൽ മതിയാകും. താത്കാലിക പ്രവേശം നേടിയവർ സ്ഥിരപ്രവേശം നേടുന്ന മുറക്ക് ക്ലാസുകളിൽ ഹാജരാകണം.
ക്യാറ്റ് എംജിയു കൗണ്സലിംഗ് ജൂലൈ മൂന്നു മുതൽ അഞ്ചു വരെ
എംജി സർവകലാശാലാ വിവിധ പഠനവകുപ്പുകളിലെ പിജി പ്രോഗ്രാമുകളിലേക്കുള്ള പ്രവേശനത്തിനായി നടത്തിയ പരീക്ഷയിൽ (ക്യാറ്റ് എം ജി) യോഗ്യത നേടിയ വിദ്യാർഥികൾക്കുള്ള പ്രവേശനകൗണ്സലിംഗ് ജൂലൈ മൂന്നു മുതൽ അഞ്ചു വരെ തീയതികളിൽ സർവകലാശാലാ അസംബ്ലി ഹാളിൽ നടത്തും. യോഗ്യത നേടിയവരുടെ സെലക്റ്റ് ലിസ്റ്റും വിശദമായ ഷെഡ്യൂളും നിർദേശങ്ങളും വെബ്സൈറ്റിൽ. വിദ്യാർഥികൾക്ക് പ്രത്യേക കോൾ ലെറ്ററുകൾ അയക്കുന്നതല്ല.
ബിബിഎ എൽഎൽബി പ്രവേശന പരീക്ഷ
സ്കൂൾ ഓഫ് ഇന്ത്യൻ ലീഗൽ തോട്ടിലെ ബിബിഎ എൽഎൽബി പ്രവേശന പരീക്ഷ 30ന് രാവിലെ 10 മുതൽ 12 വരെ സൂര്യകാലടി ഹിൽസിലെ സ്കൂൾ ഓഫ് ഇന്ത്യൻ ലീഗൽ തോട്ടിൽ നടത്തും. ഹാൾ ടിക്കറ്റ് ലഭിക്കാത്ത അപേക്ഷകർ സ്കൂൾ ഓഫീസുമായി ബന്ധപ്പെടണം. ഫോണ് : 0481 2310165
പരീക്ഷാതീയതി
സ്കൂൾ ഓഫ് ഇന്ത്യൻ ലീഗൽ തോട്ടിലെ ഒന്നാം സെമസ്റ്റർ ത്രിവത്സര എൽഎൽബി (നാല് പിഎം ഒന്പത് പിഎം റെഗുലർ, സപ്ലിമെന്ററി, ഇംപ്രൂവ്മെന്റ്) ഡിഗ്രി പരീക്ഷകൾ ജൂലൈ 19 ന് ആരംഭിക്കും. അപേക്ഷകൾ ജൂലൈ മൂന്നു വരെയും, 50 രൂപ പിഴയോടെ നാലു വരെയും, 500 രൂപ സൂപ്പർഫൈനോടെ ആറു വരെയും സ്വീകരിക്കും. റെഗുലർ വിദ്യാർഥികൾ 100 രൂപയും വീണ്ടുമെഴുതുന്നവർ പേപ്പറൊന്നിന് 20 രൂപ വീതം (പരമാവധി 100) സിവി ക്യാന്പ് ഫീസായി നിശ്ചിത പരീക്ഷാ ഫീസിനു പുറമേ അടക്കണം.
പ്രാക്ടിക്കൽ, പ്രൊജക്റ്റ് ഇവാലുവേഷൻ
ആറാം സെമസ്റ്റർ ഡ്യുവൽ ഡിഗ്രി എംസിഎ (2014 അഡ്മിഷൻ റെഗുലർ) ജൂലൈ 2017 പരീക്ഷയുടെ സോഫ്റ്റ്വെയർ ഡെവലപ്മെന്റ് പ്രോജക്റ്റ് ക എന്ന പേപ്പറിന്റെ പ്രോജക്റ്റ് മൂല്യനിർണയം ജൂലൈ അഞ്ചിന് അതത് കോളജുകളിൽ നടത്തും.
2017 മേയിൽ നടത്തിയ രണ്ടാം സെമസ്റ്റർ ബിഎ മൾട്ടീമീഡിയ, ആനിമേഷൻ ആൻഡ് ഗ്രാഫിക് ഡിസൈൻ, ആനിമേഷൻ ആൻഡ് വിഷ്വൽ ഇഫക്ട്സ്, വിഷ്വൽ ആർട്സ്, വിഷ്വൽ കമ്യൂണിക്കേഷൻ, ഓഡിയോഗ്രാഫി ആൻഡ് ഡിജിറ്റൽ എഡിറ്റിംഗ് (സിബിസിഎസ്എസ് 2016 അഡ്മിഷൻ റെഗുലർ, 2013 മുതലുള്ള അഡ്മിഷൻ ഇംപ്രൂവ്മെന്റ്, സപ്ലിമെന്ററി) ഡിഗ്രി പരീക്ഷകളുടെ പ്രാക്ടിക്കൽ ഇന്ന് ആരംഭിക്കും. ടൈം ടേബിൾ സർവകലാശാലാ വെബ്സൈറ്റിൽ.
പിഎച്ച്ഡി പ്രവേശനം
എംജി സർവകലാശാലയുടെ കീഴിലുള്ള ഗവേഷണ കേന്ദ്രങ്ങളിൽ 2017 ലെ പിഎച്ച്ഡി പ്രവേശനത്തിന് ജൂലൈ ഒന്നു മുതൽ 31 വരെ അപേക്ഷിക്കാം. വിശദ വിവരങ്ങളും അപേക്ഷാഫോമും ജൂലൈ ഒന്ന് മുതൽ സർവകലാശാലാ വെബ്സൈറ്റിൽ.
പരീക്ഷാഫലം
2016 ഒക്ടോബറിൽ നടത്തിയ മൂന്നാം സെമസ്റ്റർ ബികോം മോഡൽ ഒന്ന്, രണ്ട്, മൂന്ന് (2015 അഡ്മിഷൻ റെഗുലർ, 2013, 2014 അഡ്മിഷൻ സപ്ലിമെന്ററി) ഡിഗ്രി പരീക്ഷകളുടെ ഫലം പ്രസിദ്ധീകരിച്ചു. സൂക്ഷ്മപരിശോധനയ്ക്കും പുനർമുല്യനിർണയത്തിനുമുള്ള അപേക്ഷകൾ ജൂലൈ 10 വരെ സ്വീകരിക്കും.
2016 ഓഗസ്റ്റ്, സെപ്റ്റംബർ മാസങ്ങളിൽ നടത്തിയ രണ്ടാം സെമസ്റ്റർ എംഎ ഹിന്ദി (സിഎസ്എസ് റെഗുലർ, ഇംപ്രൂവ്മെന്റ്, സപ്ലിമെന്ററി) ഡിഗ്രി പരീക്ഷകളുടെ ഫലം പ്രസിദ്ധീകരിച്ചു. സൂക്ഷ്മപരിശോധനയ്ക്കും പുനർമുല്യനിർണയത്തിനുമുള്ള അപേക്ഷകൾ ജൂലൈ 10 വരെ സ്വീകരിക്കും.
2016 ഓഗസ്റ്റ്, സെപ്റ്റംബർ മാസങ്ങളിൽ നടത്തിയ രണ്ടാം സെമസ്റ്റർ എംഎ പൊളിറ്റിക്കൽ സയൻസ് (സിഎസ്എസ് റെഗുലർ, ഇംപ്രൂവ്മെന്റ്, സപ്ലിമെന്ററി) ഡിഗ്രി പരീക്ഷകളുടെ ഫലം പ്രസിദ്ധീകരിച്ചു. സൂക്ഷ്മപരിശോധനയ്ക്കും പുനർമുല്യനിർണയത്തിനുമുള്ള അപേക്ഷകൾ ജൂലൈ 10 വരെ സ്വീകരിക്കും.
2017 ഏപ്രിലിൽ നടത്തിയ മൂന്നാം സെമസ്റ്റർ മാസ്റ്റർ ഓഫ് അപ്ലൈഡ് സയൻസ് ഇൻ ബയോമെഡിക്കൽ ഇൻസ്ട്രുമെന്റേഷൻ (പുതിയതും പഴയതും സ്കീം റെഗുലർ, സപ്ലിമെന്ററി) ഡിഗ്രി പരീക്ഷകളുടെ ഫലം പ്രസിദ്ധീകരിച്ചു. സൂക്ഷ്മപരിശോധനയ്ക്കുള്ള അപേക്ഷകൾ ജൂലൈ 10 വരെ സ്വീകരിക്കും. 2017 മാർച്ചിൽ നടത്തിയ പത്താം സെമസ്റ്റർ ബിആർക് സപ്ലിമെന്ററി ഡിഗ്രി പരീക്ഷകളുടെ ഫലം പ്രസിദ്ധീകരിച്ചു.