യുഎഇയുടെ വികസന മുന്നേറ്റത്തിൽ മലയാളിയുടെ പങ്ക് അനിഷേധ്യം: മന്ത്രി ഡോ. കെ.ടി. ജലീൽ
കോഴിക്കോട്: യുഎഇ അടക്കമുള്ള ഗൾഫ് രാജ്യങ്ങളുടെ വികസനമുന്നേറ്റത്തിൽ മലയാളിയുടെ അധ്വാനം വഹിച്ച പങ്ക് അനിഷേധ്യമാണെന്ന് മന്ത്രി ഡോ. കെ.ടി. ജലീൽ. കാലിക്കട്ട് സർവകലാശാലയിൽ നടക്കുന്ന “അതിരുകൾ ഭേദിക്കുന്ന സംസ്കാരം: യുഎഇ പൈതൃകവും സംസ്കാരവും വിവർത്തനവും ഇന്തോ അറബ് അനുഭവങ്ങൾ” എന്ന അന്താരാഷ്ട്ര സെമിനാർ ഉദ്ഘാടനം ചെയ്യുകയായിരുന്നു അദ്ദേഹം.
കേരളത്തിന്റെ സാന്പത്തിക നേട്ടത്തിൽ ഗൾഫ് രാജ്യങ്ങൾ ചെലുത്തിയ സ്വാധീനം പോലെ തന്നെ പ്രധാനമാണ് ഗൾഫ് രാജ്യങ്ങളുടെ സാന്പത്തിക പ്രക്രിയയിലും വികസനത്തിലുമുള്ള മലയാളികളുടെ പങ്ക്. അറബ് രാജ്യങ്ങളുമായുള്ള സാന്പത്തിക വാണിജ്യ സാംസ്കാരിക മേഖലയിലുള്ള സ്വാധീനം കേരളത്തിന്റെ പുരോഗതിയിൽ തെളിഞ്ഞു നിൽക്കുന്നുണ്ട്. ഇന്തോ അറബ് ബന്ധങ്ങളുടെ ജീവനാഡിയായി കേരളം നിലകൊള്ളുന്നു. ഭാഷയിലും വേഷത്തിലുമുള്ള അറബ് സ്വാധീനം മലയാളിയുടെ നിത്യജീവിതത്തിന്റെ ഭാഗമായിത്തീർന്നിട്ടുണ്ടെന്ന് അദ്ദേഹം പറഞ്ഞു.
പ്രോ വൈസ് ചാൻസലർ പ്രഫ. ഡോ. പി. മോഹൻ അധ്യക്ഷത വഹിച്ചു. യുഎഇയിലെ ദാറുൽ യാസ്മീൻ പബ്ലിഷേഴ്സ് മേധാവി ഡോ. മർയം ഷിനാസി ആമുഖ പ്രഭാഷണം നടത്തി. മർയം ഷിനാസി രചിച്ച "ഒരു അശ്വാഭ്യാസിനിയുടെ ഓർമ്മക്കുറിപ്പുകൾ' എന്ന പുസ്തകത്തിന്റെ ഉർദു വിവർത്തനത്തിന്റെ പ്രകാശനം പി. അബ്ദുൽ ഹമീദ് എംഎൽഎ നിർവഹിച്ചു. മുൻ വൈസ് ചാൻസലർ ഡോ. കെ.കെ.എൻ കുറുപ്പ് ഏറ്റുവാങ്ങി.
അറബിക് പഠന വകുപ്പിന്റെ റിസർച്ച് ജേർണൽ "കാലിക്കൂത്തി’ന്റെ സെമിനാർ പ്രത്യേക പതിപ്പ് പ്രഫ. പി. മോഹൻ പ്രകാശനം ചെയ്തു. വകുപ്പ് മേധാവി ഡോ. മൊയ്തീൻകുട്ടി ഏറ്റുവാങ്ങി. സർവകലാശാലാ അറബിക് പഠന വിഭാഗം, ഫറൂഖ് കോളജ് അറബിക് വിഭാഗം എന്നിവയുടെ സംയുക്താഭിമുഖ്യത്തിൽ കോഓർഡിനേഷൻ ഓഫ് ഇസ്ലാമിക് കോളജസിന്റെ (സിഐസി വാഫി) അക്കാഡമിക് സഹകരണത്തോടെയാണ് സെമിനാർ സംഘടിപ്പിച്ചത്. സാലിം റുമൈദി (കുവൈത്ത്), ഡോ. അബ്ദുൽ ഹലീം റിയൂഗി (അൾജീരിയ), ഡോ. സാമിയ മെഹസൂൽ(അൾജീരിയ), പ്രഫ.പി. ഇന്പിച്ചിക്കോയ, ഡോ. അബ്ദുൽ ബർറ് വാഫി, രജിസ്ട്രാർ ഡോ.ടി.എ അബ്ദുൽ മജീദ്, ഡോ. എ.ബി. മൊയ്തീൻ കുട്ടി എന്നിവർ പ്രസംഗിച്ചു.
യുഎഇ സാഹിത്യകാരനായ ഡോ. നാസിർ ദാഹിരിയുടെ പേരിലുള്ള ലൈബ്രറി വിഭാഗത്തിന്റെ സമർപ്പണം മർയം ഷിനാസി നിർവഹിച്ചു. ത്രിദിന അന്താരാഷ്ട്ര സെമിനാറിൽ ആറ് സെഷനുകളിലായി അന്പതോളം ഗവേഷണപ്രബന്ധങ്ങൾ അവതരിപ്പിക്കും. ഇന്ത്യയിലെയും അറബ് നാടുകളിലെയും സാഹിത്യകാരും ഗവേഷകരും പങ്കെടുക്കുന്നു. സമാപനദിവസം ഫറൂഖ് കോളജിൽ നാല് അന്താരാഷ്ട്ര പരിശീലന പരിപാടികൾ സംഘടിപ്പിക്കും. അറബ് ഭാഷാ സാഹിത്യ വിഷയങ്ങളിൽ പരിശീലനത്തിന് അറബ് പ്രതിനിധികളാണ് നേതൃത്വം നൽകുക. സമാപന സമ്മേളനം എം.കെ. രാഘവൻ എം.പി. ഉദ്ഘാടനം ചെയ്യും.