എൽഎൽബി റാങ്ക് ജേതാവിന് സ്വർണ മെഡൽ സമ്മാനിച്ചു
തേഞ്ഞിപ്പലം: കാലിക്കട്ട് സർവകലാശാലയ്ക്ക് കീഴിലെ കോളജുകളിൽ എൽഎൽബിക്ക് ഉന്നത വിജയം നേടിയ വിദ്യാർഥിക്ക് സ്വർണ മെഡൽ സമ്മാനിച്ചു. കുഞ്ഞിരാമൻ വൈദ്യർ എൻഡോവ്മെന്റ് ഗോൾഡ് മെഡൽ തൃശൂർ ലോ കോളജിൽ പഠിച്ച ഹിൽമ ജോസഫിന് മുൻ ചീഫ് സെക്രട്ടറിയും സെൻട്രൽ അഡ്മിനിസ്ട്രേറ്റീവ് ട്രൈബ്യൂണൽ അംഗവുമായ ഇ.കെ. ഭരത് ഭൂഷണ് ഐഎഎസ് സമ്മാനിച്ചു.
വൈസ് ചാൻസലർ ഡോ.കെ. മുഹമ്മദ് ബഷീർ ഉദ്ഘാടനം ചെയ്തു. സർട്ടിഫിക്കറ്റ് ഓഫ് എക്സലൻസ് വൈസ് ചാൻസലർ ഹിൽമ ജോസഫിന് സമ്മാനിച്ചു. പ്രോവൈസ് ചാൻസലർ ഡോ.പി. മോഹൻ അധ്യക്ഷനായിരുന്നു. രജിസ്ട്രാർ ഡോ.ടി.എ. അബ്ദുൾ മജീദ്, സിൻഡിക്കറ്റ് അംഗം ഡോ.പി. വിജയരാഘവൻ, പരീക്ഷാ കണ്ട്രോളർ ഡോ.വി.വി. ജോർജുകുട്ടി, ഇ.കെ. ഭരത് ഭൂഷണ് , വിദ്യാർഥി ക്ഷേമ ഡീൻ പി.വി. വൽസരാജ്, പുരസ്കാര ജേതാവ് ഹിൽമ ജോസഫ് തുടങ്ങിയവർ പ്രസംഗിച്ചു.
ടെലിവിഷൻ വിദ്യാഭ്യാസ പരിപാടി നിർമ്മാണം: ശിൽപശാല നടത്തി
തേഞ്ഞിപ്പലം: വിദ്യാഭ്യാസ ചാനലിൽ സംപ്രേഷണം ചെയ്യുന്ന പ്രോഗ്രാമുകൾ തയ്യാറാക്കുന്നതിനെക്കുറിച്ച് കോളജ് അധ്യാപകർക്കായി കാലിക്കട്ട് സർവകലാശാലാ എഡ്യുക്കേഷണൽ മൾട്ടീമീഡിയ റിസർച്ച് സെന്ററിന്റെ ആഭിമുഖ്യത്തിൽ ശിൽപശാല സംഘടിപ്പിച്ചു. വൈസ് ചാൻസലർ ഡോ.കെ. മുഹമ്മദ് ബഷീർ ഉദ്ഘാടനം ചെയ്തു.
പ്രോവൈസ് ചാൻസലർ ഡോ.പി. മോഹൻ അധ്യക്ഷനായിരുന്നു. ഡി. ദാമോദർ പ്രസാദ് , കെ.ആർ. അനീഷ് ,രാജൻ തോമസ്, സജീദ് നടുത്തൊടി തുടങ്ങിയവർ പങ്കെടുത്തു.
കവി സമ്മേളനം
തേഞ്ഞിപ്പലം: കേന്ദ്ര സാഹിത്യ അക്കാഡമിയും കാലിക്കട്ട് സർവകലാശാലാ മലയാളകേരള പഠനവിഭാഗവും സംയുക്തമായി സംഘടിപ്പിച്ച കവി സമ്മേളനം കവി മണന്പൂർ രാജൻ ബാബു ഉദ്ഘാടനം ചെയ്തു. ഡോ. ഉമർ തറമേൽ അധ്യക്ഷനായിരുന്നു. മാധവൻ പുറച്ചേരി, ഗിരിജ പാതേക്കര, ശ്രീജിത്ത് പെരുന്തച്ചൻ, ഡോ.എൽ. തോമസ് കുട്ടി, ഡോ.എം.ബി. മനോജ് തുടങ്ങിയവർ പങ്കെടുത്തു. ഡോ. അനിൽ വള്ളത്തോൾ, പി. ശിവപ്രസാദ് എന്നിവർ പ്രസംഗിച്ചു.