കണ്ണൂർ സർവകലാശാല ബിരുദ കോഴ്സ്: 5778 പേർ പ്രവേശനം നേടി, ഇനി സ്പോട്ട് അഡ്മിഷൻ മാത്രം
കണ്ണൂർ: കണ്ണൂർ സർവകലാശാലയുടെ കീഴിലുള്ള ആർട്സ് ആൻഡ് സയൻസ് കോളജുകളിലെ ബിരുദ കോഴ്സുകളിലേക്ക് 5778 വിദ്യാർഥികൾ പ്രവേശനം നേടി. ഇന്ന് മുതൽ സ്പോട്ട് അഡ്മിഷൻ മാത്രമേ ഉണ്ടാവുകയുള്ളൂ. ഓണ്ലൈൻ രജിസ്ട്രേഷൻ മേയ് 22 ന് ആരംഭിച്ച് ജൂൺ എട്ടിനാണ് അവസാനിച്ചത്. ജൂണ് മൂന്നിനായിരുന്നു ട്രയൽ അലോട്ട്മെന്റ്. 34,206 വിദ്യാർഥികൾ ഓണ്ലൈനായി രജിസ്റ്റർ ചെയ്തു. ഒൻപത് ഗവ. കോളജുകളും 12 എയ്ഡഡ് കോളജുകളും 51 അണ്എയ്ഡഡ് കോളജുകളിലുമായി 54 കോഴ്സുകൾക്ക് ആകെ 16031 സീറ്റുകളാണുള്ളത്. ഇതിൽ സർവ്വകലാശാല അലോട്ട്മെന്റ് നടത്തുന്നത് 9436 സീറ്റുകളിലേക്കാണ്. നാല് ഘട്ടങ്ങളിലായി 8412പേർക്ക് അലോട്ട്മെന്റ് നൽകിയിട്ടുണ്ട്.
എസ്സി/എസ്ടി വിഭാഗത്തിൽ ഒഴിവ് വന്ന സീറ്റുകളിലേക്ക് ഇന്ന് സർവകലാശാലയുടെ താവക്കര കാന്പസിലെ ചെറുശേരി ഓഡിറ്റോറിയത്തിൽ സ്പോട്ട് അഡ്മിഷൻ നടത്തും. സ്പോട്ട് അഡ്മിഷനിൽ പങ്കെടുക്കാൻ താത്പര്യമുള്ള എസ്സി/എസ്ടി വിദ്യാർഥികൾ ഓണ്ലൈനായി രജിസ്റ്റർ ചെയ്ത അപേക്ഷയുടെ പകർപ്പും യോഗ്യത, ജാതി എന്നിവ തെളിയിക്കുന്ന അസൽ സർട്ടിഫിക്കറ്റുകളുമായി രാവിലെ10ന് മുന്പായി ഹാജരാകണം. ഓണ്ലൈൻ രജിസ്റ്റർ ചെയ്തവരുടെ അഭാവത്തിൽ ഓണ്ലൈൻ രജിസ്റ്റർ ചെയ്യാത്തവരേയും പരിഗണിക്കുന്നതാണ്.
ജനറൽ, ഒഇസി വിഭാഗങ്ങളുടെയും സ്പോട്ട് അഡ്മിഷൻ അതാത് കോളജുകളിൽ തന്നെയാണ് നടക്കുക.ഗവ./എയ്ഡഡ് കോളജുകളിൽ സ്പോട്ട് അഡ്മിഷനിൽ പങ്കെടുക്കാൻ താത്പര്യമുള്ളവർക്ക് 18ന് രാവിലെ 10 മുതൽ 20ന് രാവിലെ 11 വരെ അതാത് കോളേജുകളിൽ അപേക്ഷ സമർപ്പിക്കാം. ഗവൺമെന്റ് /എയ്ഡഡ് കോളജുകളിൽ സ്പോട്ട് അഡ്മിഷൻ ലഭിച്ചവർക്ക് 20ന് ഉച്ച മുതൽ 22ന് വൈകുന്നേരം 5 വരെ പ്രവേശനം നേടാം.
ഓണ്ലൈനായി രജിസ്റ്റർ ചെയ്ത മുഴുവൻ വിദ്യാർഥികളേയും സേ പരീക്ഷ എഴുതിയവരേയും വിവിധ കാരണങ്ങളാൽ CAPൽ നിന്ന് പുറത്തായവരേയും ഉൾപ്പെടുത്തിക്കൊണ്ട് ഒരു റാങ്ക് ലിസ്റ്റ് സർവ്വകലാശാല കോളജുകൾക്ക് നൽകുന്നതാണ്. ഈ റാങ്ക് ലിസ്റ്റ് മാനദണ്ഡമാക്കി 20ന് രാവിലെ 11 വരെ കോളജുകളിൽ ലഭിക്കുന്ന അപേക്ഷകൾ പരിശോധിച്ച് ഗവൺമെന്റ്/എയ്ഡഡ് കോളജുകൾ റാങ്ക് ലിസ്റ്റ് തയാറാക്കി അന്നുതന്നെ പ്രസിദ്ധീകരിക്കും. എയ്ഡഡ് കോളജുകളിലേക്ക് സ്പോട്ട് അഡ്മിഷനുള്ള അപേക്ഷ 18 മുതൽ 24 വരെ നൽകാം. 25ന് പ്രവേശനം അവസാനിക്കും.