ബിഎഡ് പ്രവേശന റാങ്ക് ലിസ്റ്റ് ഇന്ന് പ്രസിദ്ധീകരിക്കും
ബിഎഡ് പ്രവേശന റാങ്ക് ലിസ്റ്റ് ഇന്ന് മൂന്നിന് വെബ്സൈറ്റിൽ പ്രസിദ്ധീകരിക്കും. അപേക്ഷകർക്ക് ക്യാപ് ഐഡിയും പാസ് വേർഡും ഉപയോഗിച്ച് റാങ്ക് പരിശോധിക്കാം. ഓപ്പണ് മെറിറ്റ്, റിസർവേഷൻ വിഭാഗങ്ങളിലേക്കുള്ള പ്രവേശനം 24നും, മാനേജ്മെന്റ് ക്വോട്ട, എയ്ഡഡ് കോളജുകളിലെ കമ്യൂണിറ്റി ക്വോട്ട എന്നിവയിലേക്കുള്ള പ്രവേശനം 25നും നടക്കും. 24, 25 തിയതികളിലെ പ്രവേശനത്തിന് ശേഷം അവശേഷിക്കുന്ന എല്ലാ വിഭാഗം സീറ്റുകളിലേക്കും പ്രവേശനം 26ന് നടക്കും. അതത് ദിവസം പകൽ 11 മണിക്കകം പ്രവേശനം ആഗ്രഹിക്കുന്ന കോളജുകളിൽ എല്ലാ രേഖകളും സഹിതം ഹാജരാകണം. ഒന്നിലധികം കോളജുകളിൽ പ്രവേശനത്തിന് പരിഗണിക്കുന്നതിന് സ്വയം സാക്ഷ്യപ്പെടുത്തിയ സർട്ടിഫിക്കറ്റുകളുടെ പകർപ്പുകളും ഓണ്ലൈൻ രജിസ്ട്രേഷൻ പകർപ്പും സഹിതം പ്രതിനിധികളെ അധികാരപ്പെടുത്തണം.
ഭവൻസ് എൻഎ പൽക്കിവാലാ അക്കാഡമിയിൽ ക്ലാസ് ഇന്നുമുതൽ
വാഴയൂരിൽ താൽക്കാലികമായി പ്രവർത്തിക്കുന്ന ഭവൻസ് എൻഎ പൽക്കിവാലാ അക്കാഡമി ഫോർ അഡ്വാൻസ്ഡ് ലീഗൽ സ്റ്റഡീസ് ആൻഡ് റിസർച്ച് കോളജ് ഇന്നു മുതൽ തുറന്നു പ്രവർത്തിക്കും. ഇവിടെ നടക്കുന്ന വിദ്യാർഥി പ്രക്ഷോഭം ഒത്തുതീർക്കുന്നതിന് സർവകലാശാലാ വൈസ് ചാൻസലറുടെ ഓഫീസിൽ നടന്ന ചർച്ചയിൽ തീരുമാനമായി. വാർഷിക ഫീസായി 2017 മേയ് 17 വരെ ഗവണ്മെന്റ് ക്വാട്ടയിൽ 30,000 രൂപയും മാനേജ്മെന്റ് ക്വാട്ടയിൽ 40,000 രൂപയും അംഗീകരിച്ചു. മേയ് 17ന് ശേഷമുള്ള ഫീസിനെക്കുറിച്ച് പിന്നീട് തീരുമാനമെടുക്കും. ഈ തിയതിക്ക് ശേഷമുള്ള ഫീസ് അതുവരെ ഈടാക്കുന്നതല്ല. ചർച്ചയിൽ വൈസ് ചാൻസലർ ഡോ.കെ.മുഹമ്മദ് ബഷീർ, സിൻഡിക്കറ്റ് അംഗങ്ങളായ കെ.കെ.ഹനീഫ, .പി.എം.നിയാസ്, ഡോ.ടി.പി.അഹമ്മദ്, കോളജ് ഡവലപ്മെന്റ് കൗണ്സിൽ ഡയറക്ടർ ഡോ.സന്തോഷ് നന്പി, കോളജ് പ്രതിനിധികളായി പി.പരമേശ്വരൻ, വി.എം.പ്രേംകുമാർ എന്നിവർ പങ്കെടുത്തു.
പരീക്ഷ
പഞ്ചവത്സര എൽഎൽബി മൂന്നാം സെമസ്റ്റർ (2000 സ്കീം, 2000 മുതൽ 2007 പ്രവേശനം) സപ്ലിമെന്ററി പരീക്ഷ ഓഗസ്റ്റ് രണ്ടിന് കോഴിക്കോട്, തൃശൂർ ഗവണ്മെന്റ് ലോ കോളജുകളിൽ ആരംഭിക്കും.
എംബിഎ കോഷൻ ഡെപ്പോസിറ്റ്
വിദൂരവിദ്യാഭ്യാസം വഴി 2012ൽ എംബിഎ പ്രവേശനം നേടി നാലാം സെമസ്റ്റർ വരെ ട്യൂഷൻ ഫീസടച്ച് കോഴ്സ് പൂർത്തിയാക്കിയവർക്കുള്ള കോഷൻ ഡെപ്പോസിറ്റ് തുകയായ 1,500 രൂപ കൈപ്പറ്റാത്തവർ 31നകം ചെക്ക് വിദൂരവിദ്യാഭ്യാസത്തിൽ നിന്ന് കൈപ്പറ്റണം. അല്ലാത്ത പക്ഷം ഈ തുക ഇനി ഒരറിയിപ്പില്ലാതെ സർവകലാശാലാ അക്കൗണ്ടിലേക്ക് തിരിച്ചടക്കും.
യുജി അഞ്ച്, ആറ് സെമസ്റ്റർ ട്യൂഷൻ ഫീ
വിദൂരവിദ്യാഭ്യാസം യുജി (സിയുസിബിസിഎസ്എസ്, 2015 പ്രവേശനം) അഞ്ച്, ആറ് സെമസ്റ്റർ ട്യൂഷൻ ഫീ ആയിരം രൂപ പിഴയോടെ 31 വരെ അടക്കാം. പൂരിപ്പിച്ച അപേക്ഷ ഓഗസ്റ്റ് ഏഴിനകം എസ്ഡിഇ ഓഫീസിൽ ലഭിക്കണം. വിവരങ്ങൾ വെബ്സൈറ്റിൽ.
പുനർമൂല്യനിർണയ അപേക്ഷ
വിദൂരവിദ്യാഭ്യാസം രണ്ടാം സെമസ്റ്റർ ബികോം/ബിബിഎ/ബിഎ അഫ്സൽഉൽഉലമ/ബിഎപിഒടി (സിയുസിബിസിഎസ്എസ്) ഏപ്രിൽ 2016 പരീക്ഷകളുടെ പുനർമൂല്യനിർണയത്തിന് 31 വരെ അപേക്ഷിക്കാം. പ്രിന്റൗട്ട് ചലാൻ സഹിതം ഓഗസ്റ്റ് മൂന്നിനകം ലഭിക്കണം.
പരീക്ഷാഫലം
2016 ഡിസംബറിൽ നടത്തിയ ഒന്ന്, മൂന്ന് സെമസ്റ്റർ എം.എസ്.സി ഹോം സയൻസ്ന്യൂട്രീഷൻ ആന്റ് ഡയറ്ററ്റിക്സ് (സിയുസിഎസ്എസ്) പരീക്ഷാഫലം വെബ്സൈറ്റിൽ ലഭ്യമാണ്. പുനർമൂല്യനിർണയത്തിന് 31 വരെ അപേക്ഷിക്കാം.
പുനർമൂല്യനിർണയ ഫലം
ഒന്നാം സെമസ്റ്റർ എംടെക് തെർമൽ എൻജിനിയറിംഗ് (മെക്കാനിക്കൽ) ജനുവരി 2017 പരീക്ഷയുടെ പുനർമൂല്യനിർണയ ഫലം വെബ്സൈറ്റിൽ. ഉത്തരക്കടലാസ് തിരിച്ചറിയാനാഗ്രഹിക്കുന്നവർ 15 ദിവസത്തിനകം പരീക്ഷാഭവനുമായി ബന്ധപ്പെടുക.
ബിടെക് പരീക്ഷ മാറ്റി
എൻജിനിയറിംഗ് കോളജ് (സിയുഐഇ.ടി), തൃശൂർ ഗവണ്മെന്റ് എൻജിനിയറിംഗ് കോളജ്, പാലക്കാട് ശ്രീകൃഷ്ണപുരം ഗവണ്മെന്റ് എൻജിനിയറിംഗ് കോളജ് എന്നിവിടങ്ങളിൽ നാളെ നടത്താനിരുന്ന ആറാം സെമസ്റ്റർ ബിടെക് (2014 സ്കീം) പേപ്പർ ഇ.സി.14602 ഒപ്റ്റിക്കൽ കമ്യൂണിക്കേഷൻ റഗുലർ പരീക്ഷ മാറ്റി. മറ്റ് പരീക്ഷകൾക്ക് മാറ്റമില്ല.
ബിരുദ പ്രവേശനം
ബിരുദ പ്രവേശനത്തിന് സർവകലാശാല നൽകിയ ലിസ്റ്റിൽ നിന്ന് ഇന്ന് അതത് കോളജിൽ തയ്യാറാക്കുന്ന മെറിറ്റ് അടിസ്ഥാനത്തിലുള്ള ലിസ്റ്റിൽ നിന്നും പ്രവേശനം നേടുന്നതിനായി വിദ്യാർഥികളോ പ്രതിനിധികളോ നാളെ പകൽ 11 മണിക്കകം കോളജിൽ റിപ്പോർട്ടുചെയ്യണം. വിഭിന്നശേഷി വിദ്യാർഥികളുടെ വെയ്റ്റിംഗ് ലിസ്റ്റ് അതത് കോളജിൽ ലഭ്യമാക്കിയിട്ടുണ്ട്. വിഭിന്നശേഷി വിദ്യാർഥികൾ 24ന് പകൽ 11 മണിവരെ കോളജിൽ റിപ്പോർട്ട് ചെയ്ത് പ്രവേശനം നേടണം.