അധ്യാപന നിലവാരം ഉയർത്താൻ പരിശീലന പരിപാടികൾ നടപ്പാക്കും: വൈസ് ചാൻസലർ
തേഞ്ഞിപ്പലം: സമഗ്ര വിദ്യാഭ്യാസ പുരോഗതി എന്ന ലക്ഷ്യ സാക്ഷാത്കാരത്തിനായി അധ്യാപകരുടെ മികവും നൈപുണിയും മെച്ചപ്പെടുത്തുന്നതിന് സുവർണ ജൂബിലി വർഷത്തിൽ കാലിക്കട്ട് സർവകലാശാല ബഹുമുഖ പരിപാടികൾ നടപ്പാക്കുമെന്ന് വൈസ് ചാൻസലർ ഡോ. കെ. മുഹമ്മദ് ബഷീർ. സർവകലാശാലാ മനഃശാസ്ത്ര പഠനവിഭാഗം സഹോദയയുമായി സഹകരിച്ച് സംഘടിപ്പിച്ച സ്കൂൾ പ്രിൻസിപ്പൽമാർക്കായുള്ള ശിൽപശാല ഉദ്ഘാടനം ചെയ്യുകയായിരുന്നു അദ്ദേഹം. അധ്യാപകരുടെ മികവുയർത്തുകയെന്ന ലക്ഷ്യത്തോടെ കേന്ദ്ര ഗവണ്മെന്റ് ആവിഷ്കരിച്ച ബൃഹത് പദ്ധതിയായ പണ്ഡിറ്റ് മദൻമോഹൻ മാളവ്യ അധ്യാപക അധ്യാപന ദേശീയ ദൗത്യം (പിഎംഎംഎൻഎംടിടി) കാലിക്കട്ട് സർവകശാലയ്ക്ക് ലഭിച്ചത് നേട്ടമാണ്. ഇതനുസരിച്ചുള്ള പരിശീലന പരിപാടികൾ നടത്തിവരികയാണെന്നും, അധ്യാപകർ ഇത് പരമാവധി പ്രയോജനപ്പെടുത്തണമെന്നും വൈസ് ചാൻസലർ പറഞ്ഞു. ചടങ്ങിൽ പഠനവകുപ്പ് മേധാവി പ്രഫ. കെ. മണികണ്ഠൻ അധ്യക്ഷനായിരുന്നു. ഡോ. ബേബി ശാരി, നൗസിയ നൂറുദ്ദീൻ, റഹീമുദ്ദീൻ, ജൗഹർ തുടങ്ങിയവർ നേതൃത്വം നൽകി.
സെമിനാർ ഒന്പതിന്
തേഞ്ഞിപ്പലം: കേന്ദ്ര സാഹിത്യ അക്കാഡമിയും മലയാള കേരള പഠനവിഭാഗവും സംയുക്തമായി സാഹിത്യാനുകല്പനം മലയാള സിനിമയിൽ, സാമുഹിക സാംസ്കാരിക പരിപ്രേക്ഷ്യം’ എന്ന വിഷയത്തിൽ ഒന്പത്, 10 തിയതികളിൽ സെമിനാർ സംഘടിപ്പിക്കുന്നു. ഒന്പതിന് രാവിലെ 9.30ന് സർവകലാശാലാ സെമിനാർ കോംപ്ലക്സിൽ സി. രാധാകൃഷ്ണൻ പരിപാടി ഉദ്ഘാടനം ചെയ്യും. വൈസ് ചാൻസലർ ഡോ.കെ. മുഹമ്മദ് ബഷീർ അധ്യക്ഷത വഹിക്കും. വി.കെ. ശ്രീരാമൻ, സി.എസ്. വെങ്കിടേശ്വരൻ, മധു ഇറവങ്കര, വി.സി. ഹാരിസ്, ഐ. ഷണ്മുഖദാസ്, പി. ബാലചന്ദ്രൻ, എം.എ. റഹ്മാൻ, കെ. ഗോപിനാഥൻ, ജി. ഉഷാകുമാരി, കെ.പി. ജയകുമാർ, മീനാപിള്ള, ആർ.വി.എം. ദിവാകരൻ, അജു കെ. നാരായണൻ, അൻവർ അബ്ദുള്ള, പി. സോമനാഥൻ തുടങ്ങിയവർ വിവിധ സെഷനുകളിലായി പങ്കെടുക്കും.