മൂല്യനിർണയം കുറ്റമറ്റതാക്കാൻ അധ്യാപകർ ജാഗ്രതപുലർത്തണം: വൈസ് ചാൻസലർ
തേഞ്ഞിപ്പലം: മൂല്യനിർണയം കുറ്റമറ്റതാക്കാൻ അധ്യാപകർ ജാഗ്രതപുലർത്തണമെന്ന് കാലിക്കട്ട് സർവകലാശാല വൈസ് ചാൻസലർ ഡോ. കെ. മുഹമ്മദ് ബഷീർ. കേന്ദ്ര മാനവശേഷി വികസന മന്ത്രാലയത്തിന്റെ ആഭിമുഖ്യത്തിൽ പ്രവർത്തിക്കുന്ന പണ്ഡിറ്റ് മദൻ മോഹൻ മാളവ്യ അധ്യാപക അധ്യാപന ദേശീയ ദൗത്യം അനുസരിച്ച് സർവകലാശാലയിൽ നടക്കുന്ന അധ്യാപക പരിശീലന പരിപാടി ഉദ്ഘാടനം ചെയ്യുകയായിരുന്നു അദ്ദേഹം.
ഇന്റർനെറ്റിന്റെ അനന്തവിഹായസ്സിൽ നിന്ന് വൈജ്ഞാനിക മേഖലകളിലെ ഏറ്റവും പുതിയ ചലനങ്ങൾ പോലും സ്വായത്തമാക്കുന്ന വിദ്യാർഥികൾ ക്ലാസ് മുറികളിലുണ്ട്. സമാന രീതിയിൽ കാലികമായി വൈജ്ഞാനിക നിലവാരം ഉയർത്തുന്നവർക്ക് മാത്രമേ മികച്ച അധ്യാപകരാകാൻ കഴിയുകയുള്ളൂ. സ്ഥാനക്കയറ്റത്തിന്റെ മുന്നുപാധി എന്ന നിലയിൽ ആവരുത് അധ്യാപക പരിശീലന പരിപാടിയെ വീക്ഷിക്കേണ്ടതെന്നും വൈസ് ചാൻസലർ പറഞ്ഞു.
പ്രോവൈസ് ചാൻസലർ ഡോ.പി.മോഹൻ മുഖ്യപ്രഭാഷണം നടത്തി. സർവകലാശാലയുടെ ഇന്റേണൽ ക്വാളിറ്റി അഷ്വറൻസ് സെൽ ഡയറക്ടർ ഡോ. എം. മനോഹരൻ ചോയ്സ് ബേസ്ഡ് ക്രെഡിറ്റ് സെമസ്റ്റർ സിസ്റ്റത്തെക്കുറിച്ച് ക്ലാസ് നയിച്ചു. പഠനവകുപ്പ് മേധാവി ഡോ. പി.കെ. അരുണ, പ്രഫ. കെ.പി. മീര, എം.വി. സക്കറിയ തുടങ്ങിയവർ പ്രസംഗിച്ചു. ഒരാഴ്ചത്തെ പരിശീലന പരിപാടിയിൽ സംസ്ഥാനത്തെ വിവിധ സർവകലാശാലകളിലെയും കോളജുകളിലെയും അധ്യാപകർ പങ്കെടുക്കുന്നു. പ്രത്യക്ഷ, പരോക്ഷ ഗ്രേഡിംഗ് സന്പ്രദായം, മൂല്യനിർണയത്തിലെ പുതുപ്രവണതകൾ, ബിരുദതലത്തിലെ സെമസ്റ്ററും ഗ്രേഡിംഗും, വിവര വിനിമയാധിഷ്ഠിത മൂല്യനിർണയം, ഉന്നത വിദ്യാഭ്യാസത്തിന്റെ ഗുണമേന്മ വിലയിരുത്തൽ, മാസീവ് ഓണ്ലൈൻ ഓപ്പണ് കോഴ്സ്, അധ്യാപന നൈപുണി തുടങ്ങിയ വ്യത്യസ്ത വിഷയങ്ങളിൽ നടക്കുന്ന ക്ലാസുകൾ 26ന് സമാപിക്കും.
അക്കഡേമിക് മാസ്റ്റർ പ്ലാൻ: ശിൽപശാല സംഘടിപ്പിക്കുന്നു
തേഞ്ഞിപ്പലം: സർവകലാശാലാ സുവർണ ജൂബിലി പരിപാടികളിൽ ഉൾപ്പെടുത്തി വിഭാവനം ചെയ്യുന്ന അക്കഡേമിക് മാസ്റ്റർ പ്ലാനിന് അന്തിമരൂപം നൽകുന്നതിനായി 24ന് രാവിലെ പത്തിന് സർവകലാശാലാ സെമിനാർ കോംപ്ലക്സിൽ ശിൽപശാല സംഘടിപ്പിക്കുന്നു.
കാഷ്മീർ, പോണ്ടിച്ചേരി, ബി.എസ്. അബ്ദുറഹിമാൻ എന്നീ സർവകലാശാലകളുടെ മുൻ വൈസ് ചാൻസലർ പത്മശ്രീ പ്രഫ. ജെ.എ.കെ. തരീനാണ് മുഖ്യപ്രഭാഷകൻ. വൈസ് ചാൻസലർ ഡോ. കെ. മുഹമ്മദ് ബഷീർ, പ്രോവൈസ് ചാൻസലർ ഡോ. പി. മോഹൻ, വിദ്യാഭ്യാസ വിഭാഗം ഡീൻ ഡോ. സി. നസീമ, രജിസ്ട്രാർ ഡോ. ടി.എ. അബ്ദുൾ മജീദ്, സിൻഡിക്കറ്റ് അംഗം കെ.കെ.ഹനീഫ, ഇന്റേണൽ ക്വാളിറ്റി അഷ്വറൻസ് സെൽ ഡയറക്ടർ ഡോ. എം. മനോഹരൻ, വെറ്ററിനറി സർവകലാശാലാ സംരഭകത്വ ഡയറക്ടർ ഡോ. ടി.പി. സേതുമാധവൻ, പരീക്ഷാ കണ്ട്രോളർ ഡോ. വി.വി. ജോർജുകുട്ടി തുടങ്ങിയവർ സംബന്ധിക്കും.
ലോകോത്തര സർവകലാശാലകൾസവിശേഷതകളും വെല്ലുവിളികളും എന്നതാണ് മുഖ്യപ്രഭാഷണത്തിന്റെ പ്രമേയം. അക്കഡേമിക് മാസ്റ്റർ പ്ലാൻ സമിതിയിലെ അംഗങ്ങൾക്ക് പുറമെ സിന്ഡിക്കറ്റ് അംഗങ്ങൾ, പഠനവകുപ്പ് മേധാവികൾ, കോളജ് പ്രിൻസിപ്പൽമാർ, അധ്യാപകർ, സുവർണ ജൂബിലി ആഘോഷ സമിതി കണ്വീനർമാരും കോർഡിനേറ്റർമാരും, ജോയിന്റ് രജിസ്ട്രാർ, ഡെപ്യൂട്ടി രജിസ്ട്രാർ, അസിസ്റ്റന്റ് രജിസ്ട്രാർ, വിവിധ പഠനസ്കൂൾ ഡയറക്ടർമാർ തുടങ്ങിയവർ പങ്കെടുക്കും.