ബിഎസ്സി നഴ്സിംഗ്, പാരാമെഡിക്കൽ അവസാന ഓണ്ലൈൻ അലോട്ട്മെന്റ് ഇന്നു തുടങ്ങും
തിരുവനന്തപുരം: 2017ലെ ബിഎസ്സി നഴ്സിംഗ് കോഴ്സിലേയ്ക്കും, ബിഎസ്സി (എംഎൽടി), ബിഎസ്സി പെർഫ്യൂഷൻ ടെക്നോളജി, ബിഎസ്സി ഒപ്ടോമെട്രി, ബിപിടി, ബിസിവിടി, ബിഎഎസ് എൽപി, ബിഎസ്സി എംആർടി, ബിഎസ്സി മെഡിക്കൽ മൈക്രോബയോളജി, ബിഎസ്സി മെഡിക്കൽ ബയോകെമിസ്ട്രി എന്നീ പാരാമെഡിക്കൽ ഡിഗ്രി കോഴ്സുകളിലേയ്ക്കുമുളള അവസാന ഘട്ട അലോട്ട്മെന്റ് നടപടിക്രമങ്ങൾ ഇന്ന് ആരംഭിക്കും.
സർക്കാർ നഴ്സിംഗ്/പാരാമെഡിക്കൽ കോളജുകളിൽ ഒഴിവുളള സീറ്റുകളിലേയ്ക്കും തലശേരി മലബാർ കാൻസർ സെന്ററിലെ ബിഎസ്സി എംആർടി കോഴ്സിലെ ഒഴിവുളള സീറ്റുകളിലേയ്ക്കും സർക്കാർ ഉത്തരവ് പ്രകാരം SIMET ന് കീഴിൽ വരുന്ന നഴ്സിംഗ് കോളജുകളിലെ ഒഴിവുള്ള സീറ്റുകളിലേയ്ക്കും കോലഞ്ചേരി മലങ്കര ഓർത്തഡോക്സ് സിറിയൻ ചർച്ച് കോളജ് ഓഫ് നഴ്സിംഗ്, കോഴിക്കോട് ജെ.ഡി.ടി ഇസ്ലാം കോളജ് ഓഫ് നഴ്സിംഗ്, കണ്ണൂർ എകെജി മെമ്മോറിയൽ കോഓപ്പറേറ്റീവ് കോളജ് ഓഫ് നഴ്സിംഗ് എന്നീ സ്വാശ്രയ നഴ്സിംഗ് കോളജുകളിൽ അധികമായി അനുവദിക്കപ്പെട്ട സീറ്റുകളിലെ അഞ്ചുവീതം സർക്കാർ സീറ്റുകളിലേയ്ക്കും ഈ ഘട്ടത്തിൽ അലോട്ട്മെന്റ് നടത്തും.
ബിഎസ്സി നഴ്സിംഗ്, പാരാമെഡിക്കൽ ഡിഗ്രി കോഴ്സുകളിൽ നിലവിലുള്ള ഹയർ ഓപ്ഷനുകൾ ഈ അലോട്ട്മെന്റിലേക്ക് പരിഗണിക്കാൻ ആഗ്രഹിക്കുന്ന എല്ലാ വിദ്യാർഥികളും www.ce e.kerala.gov.in എന്ന വെബ്സൈറ്റിൽ അവരവരുടെ ഹോം പേജിൽ ലഭ്യമാക്കിയിട്ടുള്ള ‘Confirm’ ബട്ടണ് ക്ലിക്ക് ചെയ്ത് ഓണ്ലൈൻ ഓപ്ഷൻ കണ്ഫർമേഷൻ നടത്തണം. ഓണ്ലൈൻ ഓപ്ഷൻ കണ്ഫർമേഷനെ തുടർന്ന് നിലവിലുള്ള ഹയർ ഓപ്ഷനുകളുടെ പുനഃക്രമീകരണം, ആവശ്യമില്ലാത്തവ റദ്ദാക്കൽ, എന്നിവയ്ക്കുള്ള സൗകര്യം ഇന്നു മുതൽ 19ന് ഉച്ചയ്ക്ക് ഒന്നു വരെ ലഭിക്കും.
നിശ്ചിത സമയത്തിനകം മേൽ പറഞ്ഞ വെബ്സൈറ്റിലൂടെ ഓണ്ലൈൻ ഓപ്ഷൻ കണ്ഫർമേഷൻ നടത്താത്തവരെ ഒരു കാരണവശാലും ഈ അലോട്ട്മെന്റിനായി പരിഗണിക്കുകയില്ല. എന്നാൽ, മുൻ അലോട്ട്മെന്റ് പ്രകാരം ഏതെങ്കിലും കോഴ്സുകളിലേക്ക് അലോട്ട്മെന്റ് ലഭിക്കുകയും കോളജുകളിൽ പ്രവേശനം നേടുകയും ചെയ്തവരുടെ അലോട്ട്മെന്റ് നിലനിർത്തുന്നതായിരിക്കും. ഇതിനോടകം അലോട്ട്മെന്റ് ലഭിച്ചിട്ടുളളവരും മുൻ ഘട്ടങ്ങളിൽ അലോട്ട്മെന്റൊന്നും ലഭിക്കാത്തവരും ഈ അലോട്ട്മെന്റിനായി പരിഗണിക്കപ്പെടണമെങ്കിൽ ഓണ്ലൈൻ ഓപ്ഷൻ കണ്ഫർമേഷൻ നിർബന്ധമായും നടത്തേണ്ടതാണ്.
സർക്കാർ ഉത്തരവിലെ വ്യവസ്ഥ പ്രകാരം ഇതിനോടകം സ്വാശ്രയ നഴ്സിംഗ്/പാരാമെഡിക്കൽ കോളജുകളിൽ പ്രവേശനം നേടിയിരിക്കുന്ന വിദ്യാർഥികളുടെ ഹയർ ഓപ്ഷനുകൾ റദ്ദാക്കപ്പെടുന്നതിനാൽ അവരെ ഈ അലോട്ട്മെന്റിനായി പരിഗണിക്കുന്നതല്ല.
അലോട്ട്മെന്റ് ഷെഡ്യൂൾ
17ന് ഓണ്ലൈൻ ഓപ്ഷൻ കണ്ഫർമേഷൻ നടത്തുന്നതിനും, നിലവിലുള്ള ഹയർ ഓപ്ഷനുകൾ പുനഃക്രമീകരിക്കുന്നതിനും ആവശ്യമില്ലാത്തവ റദ്ദ് ചെയ്യുന്നതിനും വെബ്സൈറ്റ് സജ്ജമാകുന്നു.
19 ന് വൈകുന്നേരം ഉച്ചയ്ക്ക് ഒരുമണി ഓണ്ലൈൻ ഓപ്ഷൻ കണ്ഫർമേഷൻ നടത്തുന്നതിനും ഓപ്ഷനുകൾ ക്രമീകരിക്കുന്നതിനും റദ്ദ് ചെയ്യുന്നതിനുമുള്ള സൗകര്യം അവസാനിക്കുന്നു.
19 ന് വൈകുന്നേരം അവസാനഘട്ട അലോട്ട്മെന്റ് പ്രസിദ്ധീകരണം.
20 മുതൽ 23 വരെ അലോട്ട്മെന്റ് ലഭിക്കുന്ന വിദ്യാർഥികൾ അലോട്ട്മെന്റ് മെമ്മോയിൽ കാണുന്ന ഫീസ് സ്റ്റേറ്റ് ബാങ്ക് ഓഫ് ഇന്ത്യയുടെ നിശ്ചിത ശാഖകളിലൊന്നിലോ ഓണ്ലൈനായോ പ്രവേശന പരീക്ഷാ കമ്മീഷണർക്ക് ഒടുക്കിയശേഷം അലോട്ട്മെന്റ് ലഭിച്ച കോഴ്സ് / കോളജിൽ പ്രവേശനം നേടണം. നിശ്ചിത സമയത്തിനുള്ളിൽ ഫീസ് അടയ്ക്കാത്തതും അലോട്ട് ചെയ്യപ്പെട്ട കോഴ്സ്/കോളജ് പ്രവേശനം നേടാത്തതുമായ വിദ്യാർഥികളുടെ അലോട്ട്മെന്റ് റദ്ദാക്കുന്നതാണ്.
23ന് വൈകുന്നേരം 5.30 വരെ നഴ്സിംഗ്/പാരാമെഡിക്കൽ കോഴ്സുകളിൽ പ്രവേശനം നേടിയ വിദ്യാർഥികളുടെ വിവരങ്ങൾ കോളജ് അധികാരികൾ അംഗീകരിച്ചു പ്രവേശനം പരീക്ഷാ കമ്മീഷണർക്ക് ഓണ്ലൈൻ അഡ്മിഷൻ മാനേജ്മെന്റ് സിസ്റ്റം മുഖേന സമർപ്പിക്കണം.
ഓണ്ലൈൻ ഓപ്ഷൻ കണ്ഫർമേഷൻ നടത്തുന്നതിനും ഓപ്ഷൻ രജിസ്റ്റർ ചെയ്യുന്നതിനും വിദ്യാർഥികൾക്ക് ആവശ്യമായ സഹായം ലഭ്യമാക്കുന്നതിനായി ഇന്റർനെറ്റ് സൗകര്യമുള്ള ’ഫസിലിറ്റേഷൻ സെന്ററുകൾ’ സംസ്ഥനത്തൊട്ടാകെ ഈ കാലയളവിൽ പ്രവർത്തിക്കുന്നതാണ്. ഇത്തരം ഫസിലിറ്റേഷൻ സെന്ററുകളുടെ ലിസ്റ്റ് വെബ്സൈറ്റുകളിൽ ലഭ്യമാണ്.
19ന് പ്രസിദ്ധീകരിക്കുന്ന അവസാന ഘട്ട അലോട്ട്മെന്റിൽ കോലഞ്ചേരി മലങ്കര ഓർത്തഡോക്സ് സിറിയൻ ചർച്ച് കോളേജ് ഓഫ് നഴ്സിംഗ്, കോഴിക്കോട് ജെ.ഡി.ടി ഇസ്ലാം കോളജ് ഓഫ് നഴ്സിംഗ്, കണ്ണൂർ എകെജി മെമ്മോറിയൽ കോഓപ്പറേറ്റീവ് കോളജ് ഓഫ് നഴ്സിംഗ് എന്നീ സ്വാശ്രയ നഴ്സിംഗ് കോളജുകളിലേയ്ക്ക് അലോട്ട്മെന്റ് ലഭിക്കുന്ന പക്ഷം വിദ്യാർഥികൾ അതത് കോളജുകളിൽ 23ന് വൈകുന്നേരം അഞ്ചിനുള്ളിൽ നിർബന്ധമായും അഡ്മിഷൻ നേടിയിരിക്കേണ്ടതും. പ്രസ്തുത കോളജിൽ പഠനം തുടരേണ്ടതുമാണ്. അല്ലാത്ത പക്ഷം പിഴ ഒടുക്കാൻ ബാധ്യസ്ഥരായിരിക്കും. കൂടാതെ പരീക്ഷാ കമ്മീഷണർക്ക് അടച്ച ഫീസ് തിരികെ ലഭിക്കാൻ അർഹതയുണ്ടായിരിക്കുന്നതല്ല. തലശേരി മലബാർ കാൻസർ സെന്ററിലെ ബിഎസ്സി എംആർടി കോഴ്സിലേയ്ക്കുളള അലോട്ട്മെന്റ് സർക്കാർ ഉത്തരവിന് വിധേയമായിരിക്കും.
നിശ്ചിത സമയത്തിനകം ഓണ്ലൈൻ ഓപ്ഷൻ കണ്ഫർമേഷൻ നടത്താത്തവരെ ഒരു കാരണവശാലും അലോട്ട്മെന്റിന് പരിഗണിക്കുന്നതല്ല.
അലോട്ട്മെന്റ് ലഭിച്ചാൽ പ്രവേശനം നേടുമെന്നും പഠനം തുടരുമെന്നും ഉറപ്പുള്ള കോളജുകൾ മാത്രം ഹയർ ഓപ്ഷനുകളായി നിലനിർത്തുന്നതിനു വിദ്യാർഥികൾ ശ്രദ്ധിക്കേണ്ടതാണ്.
ഹെൽപ്പ് ലൈൻ നമ്പരുകൾ : 0471 2339101, 2339102, 2339103, 2339104.