അവസാന ഓണ്ലൈൻ അലോട്ട്മെന്റ് പ്രസിദ്ധീകരിച്ചു
തിരുവനന്തപുരം: ബിഎസ്സി നഴ്സിംഗ് കോഴ്സിലേയ്ക്കും ബിഎസ്സി (എംഎൽടി), ബിഎസ്സി പെർഫ്യൂഷൻ ടെക്നോളജി, ബിഎസ്സി ഒപ്ടോമെട്രി, ബിപിടി, ബിസിവിടി, ബി.എഎസ്എൽപി, ബിഎസ്സി എംആർടി, ബിഎസ്സി മെഡിക്കൽ മൈക്രോബയോളജി, ബിഎസ്സി മെഡിക്കൽ ബയോകെമിസ്ട്രി എന്നീ പാരാമെഡിക്കൽ ഡിഗ്രി കോഴ്സുകളിലേയ്ക്കുമുളള അവസാന ഘട്ട കേന്ദ്രീകൃത അലോട്ട്മെന്റ് www.cee.ke rala.gov.in എന്ന വെബ്സൈറ്റിൽ പ്രസിദ്ധീകരിച്ചു.
പ്രവേശന പരീക്ഷാ കമ്മീഷണർ തയാറാക്കി പ്രസിദ്ധീകരിച്ച വിവിധ റാങ്ക് ലിസ്റ്റുകളിൽ ഉൾപ്പെട്ടിട്ടുള്ള വിദ്യാർഥികൾ ഇന്നലെ ഉച്ചയ്ക്ക് ഒന്നുവരെ ഓണ്ലൈനായി സമർപ്പിച്ച ഓപ്ഷനുകളുടെ അടിസ്ഥാനത്തിലാണ് അലോട്ട്മെന്റ് പ്രസിദ്ധീകരിച്ചിട്ടുളളത്.
അലോട്ട്മെന്റ് സംബന്ധിച്ച വിവരങ്ങൾ വിദ്യാർഥികളുടെ ഹോം പേജിൽ ലഭ്യമാണ്. ഹോം പേജിൽ നിന്ന് വിദ്യാർഥികൾ അലോട്ട്മെന്റ് മെമ്മോയുടെ പ്രിന്റൗട്ട് നിർബന്ധമായും എടുക്കണം. വിദ്യാർഥിയുടെ പേര്, റോൾ നമ്പർ, അലോട്ട്മെന്റ് ലഭിച്ച കോഴ്സ്, കോളജ്, അലോട്ട്മെന്റ് ലഭിച്ച കാറ്റഗറി, ഫീസ് സംബന്ധമായ വിവരങ്ങൾ എന്നിവ അലോട്ട്മെന്റ് മെമ്മോയിൽ രേഖപ്പെടുത്തിയിട്ടുണ്ട്.
ഈ ഘട്ടത്തിൽ ആദ്യമായി അലോട്ട്മെന്റ് ലഭിക്കുന്ന വിദ്യാർഥികൾ അലോട്ട്മെന്റ് മെമ്മോയിൽ കാണിച്ചിട്ടുള്ളതും പ്രവേശന പരീക്ഷാ കമ്മീഷണർക്ക് അടക്കേണ്ടതുമായ ഫീസ് ഇന്നു മുതൽ 23 വരെ സ്റ്റേറ്റ് ബാങ്ക് ഓഫ് ഇന്ത്യയുടെ തെരഞ്ഞെടുത്ത ശാഖകളിലൊന്നിലോ ഓണ്ലൈൻ പേയ്മെന്റ് മുഖാന്തിരമോ ഒടുക്കി അലോട്ട്മെന്റ് ലഭിച്ച കോളേജിൽ 23 ന് വൈകുന്നേരം അഞ്ചിനു മുൻപായി പ്രവേശനം നേടണം.
അലോട്ട്മെന്റ് ലഭിച്ച് നിശ്ചിത സമയത്തിനകം ഫീസ് ഒടുക്കാത്തതും കോളേജിൽ ഹാജരായി പ്രവേശനം നേടാത്തതുമായ വിദ്യാർഥികളുടെ അലോട്ട്മെന്റും ബന്ധപ്പെട്ട സ്ട്രീമിൽ നിലവിലുളള ഹയർ ഓപ്ഷനുകളും റദ്ദാക്കും.
ഈ ഘട്ടത്തിൽ കോലഞ്ചേരി മലങ്കര ഓർത്തഡോക്സ് സിറിയൻ ചർച്ച് കോളജ് ഓഫ് നഴ്സിംഗ്, കോഴിക്കോട് ജെഡിടി ഇസ്ലാം കോളജ് ഓഫ് നഴ്സിംഗ്, കണ്ണൂർ എകെജി മെമ്മോറിയൽ കോഓപ്പറേറ്റീവ് കോളജ് ഓഫ് നഴ്സിംഗ് എന്നീ സ്വാശ്രയ നഴ്സിംഗ് കോളജുകളിലേയ്ക്ക് അലോട്ട്മെന്റ് ലഭിക്കുന്ന പക്ഷം വിദ്യാർഥികൾ അതത് കോളജുകളിൽ 23നു വൈകുന്നേരം അഞ്ചിനുള്ളിൽ നിർബന്ധമായും അഡ്മിഷൻ നേടിയിരിക്കേതും പ്രസ്തുത കോളേജിൽ പഠനം തുടരേണ്ടതുമാണ്. അല്ലാത്ത പക്ഷം പിഴ ഒടുക്കാൻ ബാധ്യസ്ഥരായിരിക്കും.
കൂടാതെ ഇവർ പ്രവേശന പരീക്ഷാ കമ്മീഷണർക്ക് അടച്ച ഫീസ് തിരികെ ലഭിക്കാൻ അർഹരായിരിക്കില്ല. നിശ്ചിത സമയത്തിനകം പ്രവേശനം നേടിയ വിദ്യാർഥികളുടെ വിവരങ്ങൾ കോളജ് അധികാരികൾ അംഗീകരിച്ച് 23നു വൈകുന്നേരം 5.30ന് മുൻപ് പ്രവേശന പരീക്ഷാ കമ്മീഷണർക്ക് ഓണ്ലൈൻ അഡ്മിഷൻ മാനേജ്മെന്റ് സിസ്റ്റം മുഖേന സമർപ്പിക്കണം. 0471 2339101, 2339102, 2339103, 2339104.