എംജി യൂണിവേഴ്സിറ്റി ഓണ്ലൈൻ പേമന്റ് വിജയകരം
കോട്ടയം: 2010 മുതൽ വിവിധ യുജി, പിജി പ്രോഗ്രാമുകളിലേക്കുള്ള പ്രവേശനം കേന്ദ്രീകൃത പ്രവേശന സംവിധാനം വഴി വിജയകരമായി നടപ്പിലാക്കി വരുന്ന എംജി യൂണിവേഴ്സിറ്റി കേരളപ്പിറവി ദിനമായ നവംബർ ഒന്നു മുതൽ സർവ്വകലാശാലയിൽ നിന്നുമുള്ള വിവിധ സേവനങ്ങൾക്കുള്ള ഫീസ് ഓണ്ലൈനായി ഒടുക്കുന്നതിനുള്ള ഇ പേമെന്റ് സംവിധാനം നടപ്പിൽ വരുത്തി. ഇതിനു മുന്പ് യൂണിവേഴ്സിറ്റി കാഷ് കൗണ്ടറുകൾ വഴിയോ ജനസേവന കേന്ദ്രങ്ങൾ വഴിയോ ഫീസ് ഒടുക്കിയിരുന്ന വിദ്യാർഥികൾക്കും മറ്റു ഗുണഭോക്താക്കൾക്കും ഇനി മുതൽ യൂണിവേഴ്സിറ്റിയിൽ വരാതെ തന്നെ ഓണ്ലൈനായി ഫീസ് ഒടുക്കാം. യൂണിവേഴ്സിറ്റിയോട് അഫിലിയേറ്റ് ചെയ്തിട്ടുള്ള 250ൽപ്പരം കോളജുകൾക്കും ലക്ഷക്കണക്കിന് വിദ്യാർഥികൾക്കും ഓണ്ലൈൻ ഫീസ് സൗകര്യം ലഭ്യമാകും. ഓണ്ലൈൻ പേമെന്റ് ഗേറ്റ്വേയിൽ ഡെബിറ്റ്, ക്രെഡിറ്റ് കാർഡുകൾ മുഖേനയും ഇന്റർനെറ്റ് ബാങ്കിംഗ് വഴിയും ഫീസ് ഒടുക്കുന്നതിനുള്ള സൗകര്യം ലഭ്യമാണ്. യൂണിവേഴ്സിറ്റിയിൽ നിന്നും ലഭ്യമാകേണ്ട ഓരോ സേവനത്തിനും ഒടുക്കേണ്ട ഫീസുകളെ സംബന്ധിച്ച വിശദ വിവരങ്ങൾ www.epay.mgu.ac.in എന്ന വെബ്സൈറ്റിൽ നൽകിയിട്ടുണ്ട്. ഓണ്ലൈൻ ഫീസ് ഒടുക്കുന്നതിനായി അപേക്ഷകൻ യൂണിവേഴ്സിറ്റി വെബ്സൈറ്റിലെ (www.mgu.ac.in) ഓണ്ലൈൻ പേമെന്റ് എന്ന ലിങ്കിലൂടെയോ www.epay.mgu.ac.in എന്ന വെബ്സൈറ്റിൽ നേരിട്ട് പ്രവേശിക്കുകയും, തുടർന്നു ഏതു ഫീസ് ആണോ ഒടുക്കേണ്ടത് അതിനെ സംബന്ധിച്ച വിവരങ്ങൾ തെരഞ്ഞെടുത്ത് അതിന്റെ പേര്, രജിസ്റ്റർ നം. മൊബൈൽ നന്പർ, ജനന തീയതി, ഇ മെയിൽ ഐഡി, മേൽ വിലാസം എന്നിവ നൽകി ഓണ്ലൈൻ പേമെന്റ് ഗേറ്റ്വേ വഴി ഫീ ഒടുക്കേണ്ടതും തുടർന്ന് ലഭ്യമാവുന്ന രസീതിന്റെ പ്രിന്റൗട്ട് അപേക്ഷയോടൊപ്പമ സമർപ്പിക്കേണ്ടതുമാണ്.
ഓണ്ലൈൻ പേമെന്റ് നിലവിൽ വന്നതോടെ യൂണിവേഴ്സിറ്റി വിദ്യാർഥികൾക്ക് നൽകിവരുന്ന സേവനങ്ങൾ മികവുറ്റതാക്കിയിരിക്കുകയാണ്. ലോകത്തെന്പാടുമുള്ള ലക്ഷക്കണക്കിന് വിദ്യാർഥികൾക്ക് ഇതിന്റെ പ്രയോജനം ലഭിക്കും. ഇതോടെ യൂണിവേഴ്സിറ്റി കാഷ് കൗണ്ടറുകളിലേയും എസ്ബിഐ ശാഖകളിലേയും ഫീസ് ഒടുക്കാനുള്ള വൻ തിരക്കും ഒഴിവാകും. ഇനിമുതൽ യൂണിവേഴ്സിറ്റി കാഷ് കൗണ്ടറുകൾ പ്രവർത്തിക്കുന്നതല്ല. എസ്ബിഐയുടെ ശാഖകൾ, ജനസേവന കേന്ദ്രം എന്നിവ വഴിയും ഫീസ് സ്വീകരിക്കുന്നതല്ല. വിദ്യാർഥികൾക്ക് ഓണ്ലൈൻ പേമെന്റ് ക്ലേശരഹിതമാക്കുന്നതിനായി യൂണിവേഴ്സിറ്റി പോസ്റ്റോഫീസ് വഴിയും എസ്ബിഐ ഇ പേമെന്റ് സംവിധാനം വഴിയും ഫീസ് സ്വീകരിക്കുന്നതിനുള്ള സംവിധാനവും താമസം വിനാ ഏർപ്പെടുത്തുന്നതാണ്. കൂടാതെ ഓണ്ലൈൻ പേമെന്റ് സംബന്ധിച്ച പരാതി പരിഹാരത്തിനും മറ്റ് സഹായങ്ങൾക്കുമായി യൂണിവേഴ്സിറ്റി വിപുലമായ സംവിധാനങ്ങൾ ഒരുക്കിയിട്ടുണ്ട്. ഓണ്ലൈൻ പേമെന്റ് സംവിധാനം ഉപയോഗപ്പെടുത്തുന്നതിന് മലയാളത്തിലും ഇംഗ്ലീഷിലുമുള്ള വിശദമായ മാർഗനിർദ്ദേശങ്ങൾ, എഫ്എക്യു എന്നിവ വെബ്സൈറ്റിൽ നൽകിയിട്ടുണ്ട്.
ആദ്യ ഓണ്ലൈൻ പേമെന്റ് ദിവ്യാ തോമസിന്റെ പേരിൽ
കോട്ടയം: എംജിയുടെ ഓണ്ലൈൻ പേമെന്റ് സംവിധാനത്തിലെ ആദ്യ പേമെന്റ് ഉൗന്നുക്കൽ പുത്തൻ വട്ടപ്പിള്ളിൽ ദിവ്യ തോമസാണ് നടത്തിയത്. കണ്സോളിഡേറ്റഡ് മാർക്ക് ലിസ്റ്റിനായുള്ള ഫീസാണ് ദിവ്യ ഓണ്ലൈനായി ഒടുക്കിയത്.
എംജിയിൽ സർട്ടിഫിക്കറ്റുകളും ഇനി മുതൽ ഓണ്ലൈനായി
കോട്ടയം: എംജി യൂണിവേഴ്സിറ്റിയിൽ സർട്ടിഫിക്കറ്റുകളും ഇനി മുതൽ ഓണ്ലൈനായി നൽകും. ഇതിന്റെ ആദ്യഘട്ടമെന്ന നിലയിൽ എലിജിബിലിറ്റി, ഇക്വലൻസി സർട്ടിഫിക്കറ്റുകൾ നവംബർ ഒന്നു മുതൽ ഓണ്ലൈനായി നൽകിതുടങ്ങി. ഇതിനായി അപേക്ഷകൻ യൂണിവേഴ്സിറ്റി വെബ്സൈറ്റിലൂടെ അപേക്ഷിക്കേണ്ടതും ഓണ്ലൈനായി അപേക്ഷ ഫീസ് ഒടുക്കേണ്ടതുമാണ്. തുടർന്ന് സർട്ടിഫിക്കറ്റ് തയാറാക്കുന്ന ഓരോ തലത്തിലും ആയതു സംബന്ധിച്ച എസ്എംഎസ് അപേക്ഷകനു ലഭിക്കും. തുടർന്ന് സർട്ടിഫിക്കറ്റ് ഇ മെയിലായി അപേക്ഷകനു ലഭ്യമാക്കും. ഇതോടെ, സർട്ടിഫിക്കറ്റ് ലഭിക്കുന്നതിനുള്ള കാലതാമസം ഒഴിവാക്കി സേവനങ്ങൾക്കായുള്ള ഏകജാലക സംവിധാനം യൂണിവേഴ്സിറ്റി ഒരുക്കും. ഓണ്ലൈൻ സർട്ടിഫിക്കറ്റ് വിതരണത്തിന്റെ ആദ്യ ഗുണഭോക്താവ് കിളിമാനൂർ കളിയറ വീട്ടിൽ പിങ്കു കൃഷ്ണനാണ്. ഈക്വലൻസി സർട്ടിഫിക്കറ്റാണ് യൂണിവേഴ്സിറ്റിയുടെ ഓണ്ലൈൻ സംവിധാനത്തിലൂടെ നൽകിയത്. ഈക്വലൻസി, എലിജിബിലിറ്റി സർട്ടിഫിക്കറ്റുകൾക്ക് പുറമെ മറ്റ് സർട്ടിഫിക്കറ്റുകളും ഓണ്ലൈനായി വിതരണം ചെയ്യുന്നതിനുള്ള സൗകര്യം ഘട്ടം ഘട്ടമായി യൂണിവേഴ്സിറ്റി ഒരുക്കുന്നതാണ്.