തൊഴിൽ സംരംഭകർക്ക് വിദഗ്ധ പരിശീലന പരിപാടി സംഘടിപ്പിച്ചു
തേഞ്ഞിപ്പലം: കാലിക്കട്ട് സർവകലാശാലയിൽ തൊഴിൽ സംരംഭകർക്ക് വിദഗ്ധ പരിശീലന പരിപാടി സംഘടിപ്പിച്ചു. രജിസ്ട്രാർ ഡോ. ടി.എ. അബ്ദുൾ മജീദ് ഉദ്ഘാടനം ചെയ്തു. സർവകലാശാല ജനങ്ങളിലേക്ക് എന്ന കാഴ്ചപ്പാടോടെ സുവർണ ജൂബിലി വർഷത്തിൽ പൊതുജനങ്ങൾക്കായി സമാനമായ വിവിധ പദ്ധതികൾ സർവകലാശാലയിൽ നടപ്പിലാക്കിവരുന്നതായി രജിസ്ട്രാർ പറഞ്ഞു.
ബിരുദം അടിസ്ഥാന യോഗ്യതയുള്ളവർക്ക് കേന്ദ്രസംസ്ഥാന ഗവണ്മെന്റ് ജോലികൾ ലഭിക്കുന്നതിനുള്ള മത്സരപരീക്ഷകൾക്ക് പരിശീലനം നൽകുന്ന ഒരു മാസത്തെ പദ്ധതി ആരംഭിച്ചിട്ടുണ്ട്. ചടങ്ങിൽ കാലിക്കട്ട് സർവകലാശാലാ എംപ്ലോയ്മെന്റ് ഇൻഫർമേഷൻ ഗൈഡൻസ് ബ്യൂറോ ചീഫ് ഡോ. സി.സി. ഹരിലാൽ അധ്യക്ഷനായിരുന്നു. എംപ്ലോയ്മെന്റ് ഓഫീസർ എം. രാധാകൃഷ്ണൻ, പബ്ലിക് റിലേഷൻസ് ഓഫീസർ എം.വി. സക്കറിയ എന്നിവർ പ്രസംഗിച്ചു. ഉപമേഖല മുൻ എംപ്ലോയ്മെന്റ് ഓഫീസർ കെ.കെ. ജനാർദ്ദനൻ, മുൻ ജില്ലാ വ്യവസായ ഓഫീസർ ഇ. നാരായണൻ തുടങ്ങിയവർ ക്ലാസ് നയിച്ചു.