ബിസിനസ് അനലിറ്റിക്സിൽ പിജി ഡിപ്ലോമ
വിവര സാങ്കേതികവിദ്യയുടെ വളർച്ചയോടെ ഓരോ സ്ഥാപനത്തിനും ബിസിനസ് രംഗത്ത് ഒരു ചോദ്യത്തിന് ഉത്തരം കണ്ടെത്താൻ നിരവധി സ്ഥിതി വിവരക്കണക്കുകളുടെ വിശകലനം അനിവാര്യമായി വന്നു. ഓരോ ചുവടു മുന്നോട്ടുവയ്ക്കുമ്പോഴും ഇത്തരമൊരു വിശകലനം വിജയത്തിലേക്ക് നയിക്കുമെന്നു കമ്പനികൾ മനസിലാക്കിത്തുടങ്ങിയതോടെ പ്രമുഖ സ്ഥാപനങ്ങളും ഈ രംഗത്തു പരിശീലനം നൽകാൻ മുന്നോട്ടു വന്നിട്ടുണ്ട്.
ഈ സാഹചര്യത്തിലാണ് ഇന്ത്യയിലെ ഏറ്റവും പ്രമുഖമായ മൂന്നു വിദ്യാഭ്യാസ സ്ഥാപനങ്ങളായ ഇന്ത്യൻ ഇൻസ്റ്റിറ്റ്യൂട്ട് ഓഫ് മാനേജ്മെന്റ്കൽക്കട്ട, ഇന്ത്യൻ ഇൻസ്റ്റിറ്റ്യൂട്ട് ഓഫ് ടെക്നോളജിഖരഗ്പൂർ, ഇന്ത്യൻ സ്റ്റാറ്റിസ്റ്റിക്കൽ ഇൻസ്റ്റിറ്റ്യൂട്ട്കോൽക്കത്ത എന്നിവ ചേർന്നു നടത്തുന്ന പോസ്റ്റ് ഗ്രാജ്വേറ്റ് ഡിപ്ലോമ ഇൻ ബിസിനസ് അനലിറ്റിക്സ് കോഴ്സിന്റെ പ്രസക്തി. കോഴ്സിന്റെ വിവിധ ഘടകങ്ങൾ ഓരോ സ്ഥാപനത്തിലും ആറു മാസം വീതം ചെലവിട്ടു വേണം പഠിക്കാൻ. രണ്ടു വർഷത്തെ മുഴുവൻ സമയ കോഴ്സാണിത്.
ഏതെങ്കിലും വിഷയത്തിൽ 65 ശതമാനം മാർക്കോടെ ബിരുദമോ ബിരുദാനന്തര ബിരുദമോ നേടയവർക്ക് അപേക്ഷിക്കാം. 60 സീറ്റുകളാണുള്ളത്. 20 ലക്ഷം രൂപയാണു കോഴ്സ് ഫീസ്. ഫെബ്രുവരി18നു നടത്തുന്ന പ്രവേശന പരീക്ഷയുടെ അടിസ്ഥാനത്തിലാണ് അഡ്മിഷൻ. വെർബൽ എബിലിറ്റി, ലോജിക്കൽ റീസണിംഗ്, ഡാറ്റാ ഇന്റർപ്രെറ്റേഷൻ ആൻഡ് ഡാറ്റാ വിഷ്വലൈസേഷൻ, ക്വാണ്ടിറ്റേറ്റീവ് ആപ്റ്റിട്യൂഡ് ടെസ്റ്റ് എന്നിവയാണ് പ്രവേശന പരീക്ഷയിൽ ഉൾപ്പെടുത്തിയിരിക്കുന്നത്.
ഓണ്ലൈനായി ജനുവരി എട്ടിനകം അപേക്ഷിക്കണം. 2000 രൂപയാണ് അപേക്ഷാ ഫീസ്. മാതൃകാ ചോദ്യപേപ്പർ വെബ്സൈറ്റിലുണ്ട്. കൂടുതൽ വിവരങ്ങൾക്ക്: iimcal.a c.in/programs/pgdba.