സാഹാ ഇൻസ്റ്റിറ്റ്യൂട്ടിൽ അണ്ടർ ഗ്രാജ്വേറ്റ് അസോസിയറ്റ്ഷിപ്
ശാസ്ത്ര ലോകത്തു തിളങ്ങാൻ ആഗ്രഹിക്കുന്ന ബിരുദ വിദ്യാർഥികൾക്കു രാജ്യത്തെ മികച്ച ഗവേഷണശാലകളിൽ മാറ്റു തെളിയിക്കാൻ അവസരം.
തെരഞ്ഞെടുക്കപ്പെടുന്നവർക്കു പഠനകാലത്തു തന്നെ 90 ദിവസം പരിശീലനവും ലബോറട്ടറി ട്രെയിനിംഗും ലഭിക്കും. അതും പ്രതിദിനം 200 രൂപ സ്റ്റൈപ്പൻഡ് വാങ്ങി രാജ്യത്തെ പ്രഗത്ഭരായ ശാസ്ത്രജ്ഞർക്കൊപ്പം.
കോൽക്കത്തയിലെ സാഹാ ഇൻസ്റ്റിറ്റ്യൂട്ട് ഓഫ് ന്യൂക്ലിയർ ഫിസിക്സാണ് അണ്ടർ ഗ്രാജ്വേറ്റ് അസോസിയറ്റ്ഷിപ് പ്രോഗ്രാം എന്ന പേരിൽ ഫിസിക്കൽ, ബയോഫിസിക്കൽ സയൻസിൽ ഗവേഷണം തപസ്യയാക്കാൻ ഉദ്ദേശിക്കുന്ന വിദ്യാർഥികൾക്കു പരിശീലനം നൽകുന്നത്. സാഹാ ഇൻസ്റ്റിറ്റ്യൂട്ടിന്‍റെ സെന്‍റർ ഫോർ അഡ്വാൻസ്ഡ് റിസർച്ച് ആൻഡ് എഡ്യൂക്കേഷന്‍റെ (കെയർ) തണലിലാണു പരിശീലനം.
ഫിസിക്സ്, കെമിസ്ട്രി, ബയോളജിക്കൽ സയൻസസ് എന്നിവയിൽ ബിരുദ പഠനം നടത്തുന്നവരിൽ ഒന്നാം വർഷക്കാരെയാണു പരിശീലനത്തിനു പരിഗണിക്കുക.
അപേക്ഷകർ പ്ലസ്ടു തലത്തിൽ ഫിസിക്സിനും കെമിസ്ട്രിക്കും പ്രത്യേകമായി 85 ശതമാനം മാർക്കു വീതവും ആകെ 80 ശതമാനം മാർക്കും നേടിയിരിക്കണം. ഷോർട്ട് ലിസ്റ്റ് ചെയ്യുന്നവരെ ഇന്‍റർവ്യു നടത്തിയായിരിക്കും തെരഞ്ഞെടുപ്പ്. ബിരുദ പഠനകാലത്തു തന്നെ 90 ദിവസമാണു പരിശീലനം.
പ്രഗത്ഭരായ ശാസ്ത്രജ്ഞർക്കൊപ്പം ഇടപഴകാൻ മാത്രമല്ല ചെറു പ്രോജക്ടുകൾ ചെയ്യാനും അവസരം ലഭിക്കും. സ്റ്റൈപ്പന്‍റിനു പുറമേ യാത്രച്ചെലവുകളും താമസ സൗകര്യവും ലഭിക്കും.
ഡിസംബർ 15നു മുമ്പ് അപേക്ഷിക്കണം. കൂടുതൽ വിവരങ്ങൾ വെബ്സൈറ്റിൽ.