എൽഎസ്എസ്-യുഎസ്എസ് സ്കോളർഷിപ് പരീക്ഷ ഫെബ്രുവരി മൂന്നിന്
തിരുവനന്തപുരം: ലോവർ പ്രൈമറി സ്കൂൾ സ്കോളർഷിപ്അപ്പർ പ്രൈമറി സ്കൂൾ സ്കോളർഷിപ് (എൽഎസ്എസ് യുഎസ്എസ്) പരീക്ഷാ വിജ്ഞാപനമായി. ഫെബ്രുവരി മൂന്നിന് നടത്തുന്ന എൽ.എസ്.എസ്/യു.എസ്.എസ്. പരീക്ഷയുടെ വിജ്ഞാപനം www.keral apareekshabhavan.in പരീക്ഷാഭവൻ വെബ്സൈറ്റിൽ പ്രസിദ്ധീകരിച്ചു. രണ്ടു പേപ്പറുകളാണു പരീക്ഷയ്ക്കുള്ളത്. പേപ്പർ 1 രാവിലെ 10.15 മുതൽ 12.00 മണിവരെയും പേപ്പർ 2 ഉച്ചയ്ക്ക് 1.15 മുതൽ 3.00 മണിവരെയും നടക്കും.
എൽഎസ്എസ്
കേരളത്തിലെ പൊതുവിദ്യാലയങ്ങളിൽ (ഗവണ്മെന്റ്/എയ്ഡ ഡ്/അംഗീകാരമുള്ള അണ് എയിഡഡ്) ഈ അധ്യയന വർഷം നാലാം ക്ലാസിൽ പഠിക്കുന്നവരും ഒന്നാം ടേം പരീക്ഷയിൽ മലയാളം, ഇംഗ്ലീഷ്, ഗണിതം, പരിസരപഠനം എന്നീ വിഷയങ്ങൾക്ക് എ ഗ്രേഡ് നേടിയിട്ടുള്ളവരുമായ വിദ്യാർഥികൾക്ക് ഈ പരീക്ഷയെഴുതാം.
മുകളിൽ പറഞ്ഞ വിഷയങ്ങളിൽ ഏതെങ്കിലും ഒന്നിൽ മാത്രം ബി ഗ്രേഡ് ആയ കുട്ടികൾ ഉപജില്ലാ തല കലാകായിക പ്രവൃത്തിപരിചയ മേളകളിൽ ഏതെങ്കിലും ഇനത്തിൽ എ ഗ്രേഡോ ഒന്നാം സ്ഥാനമോ നേടിയിട്ടുങ്കെിൽ അവർക്കും പരീക്ഷ എഴുതാം.
ഈ പരീക്ഷയ്ക്ക് കുട്ടികൾ ഫീസ് നൽകേണ്ടതില്ല. അർഹതയുള്ള കുട്ടികളുടെ പേരു വിവരങ്ങൾ സ്കൂൾ ഹെഡ്മാസ്റ്റർ ഓണ്ലൈനായി രജിസ്റ്റർ ചെയ്യണം.
പരീക്ഷയുടെ സിലബസും സ്വഭാവവും: എൽഎസ്എസ് പരീക്ഷയ്ക്കു നാലാം ക്ലാസ് പാഠഭാഗങ്ങളിൽ നിന്നുള്ള ചോദ്യങ്ങൾ ജനുവരി 31 വരെ പഠിപ്പിക്കേണ്ടവ മാത്രമാക്കി നിജപ്പെടുത്തിയിട്ടുണ്ട്. നാലാം ക്ലാസുവരെ കുട്ടി നേടിയിരിക്കേണ്ട പഠന നേട്ടങ്ങൾ ആശയങ്ങൾ, ധാരണകൾ, ശേഷികൾ, മനോഭാവങ്ങൾ പരിഗണിച്ചുകൊണ്ടുള്ള ചോദ്യങ്ങളാണ് ഉണ്ടായിരിക്കുക. വിശദമായ ഉത്തരം എഴുതേണ്ട ചോദ്യങ്ങളും ഒറ്റ വാക്കിലോ വാക്യത്തിലോ ഉത്തരം എഴുതേണ്ട ചോദ്യങ്ങളും ഉണ്ടായിരിക്കും.
രണ്ട് പേപ്പറുകൾ ഉണ്ടായിരിക്കും. ഓരോന്നിന്റേയും ദൈർഘ്യം ഒന്നര മണിക്കൂറാണ്. പേപ്പർ (1) പാർട്ട് (എ) : ഒന്നാം ഭാഷ (മലയാളം/കന്നഡ/തമിഴ്) 20 സ്കോർ. പാർട്ട് (ബി) : ഇംഗ്ലീഷ് 10 സ്കോർ. പാർട്ട് (സി) : പൊതുവിജ്ഞാനം 10 സ്കോർ. ആകെ സ്കോർ : 40 പേപ്പർ (2) പാർട്ട് (എ) : പരീസരപഠനം 20 സ്കോർ പാർട്ട് (ബി) : ഗണിതം 20 സ്കോർ. ആകെ സ്കോർ :
40 രണ്ടുപേപ്പറിനും കൂടി 60 ശതമാനമോ അതിന് മുകളിലോ സ്കോർ ലഭിക്കുന്നവർ സ്കോളർഷിപ്പിന് അർഹത നേടും. ഉപജില്ലയിൽ എസ്സി, എസ്ടി., ഒഇസി വിഭാഗങ്ങളിൽപ്പെട്ട കുട്ടികളിൽ ആർക്കും തന്നെ നിശ്ചിത സ്കോർ ലഭിക്കുന്നില്ലെങ്കിൽ ഈ വിഭാഗങ്ങളിൽ ഏറ്റവും കൂടുതൽ സ്കോർ നേടിയ ഓരോ കുട്ടിയെ വീതം സ്കോളർഷിപ്പിന് പരിഗണിക്കും. (ഇവർ കുറഞ്ഞത് 50% സ്കോർ എങ്കിലും നേടിയിരിക്കണം). വിദ്യാഭ്യാസ ജില്ല തിരിച്ച് മേയ് 31 നകം ഫല പ്രഖ്യാപനം നടത്തും.
യുഎസ്എസ്
കേരളത്തിലെ ഗവണ്മെന്റ്/എയിഡഡ്/ അംഗീകാരമുള്ള അണ് എയിഡഡ് വിദ്യാലയങ്ങളിൽ ഏഴാം ക്ലാസിൽ പഠിക്കുന്നവർക്ക് യുഎസ്എസ് പരീക്ഷ എഴുതാം. ഏഴാം ക്ലാസിലെ ഒന്നാം ടേം പരീക്ഷയിൽ ലഭിച്ച ഗ്രേഡുകൾ അടിസ്ഥാനമാക്കിയാണ് കുട്ടികളെ തെരഞ്ഞെടുക്കുന്നത്. ഇതിനായി രണ്ട് മാനദണ്ഡങ്ങളാണ് നിർദേശിക്കുന്നത്.
(1) എല്ലാ വിഷയങ്ങളും ’എ’ ഗ്രേഡ് (ഭാഷാ വിഷയങ്ങൾ ആൻഡ് ശാസ്ത്ര വിഷയങ്ങൾ)(2) ഭാഷാ വിഷയങ്ങളിൽ 3 പേപ്പറുകൾക്ക് ’എ’ ഗ്രേഡും ഒന്നിന് ’ബി’ ഗ്രേഡും. (3) ശാസ്ത്ര വിഷയങ്ങളിൽ (ഗണിതം, അടിസ്ഥാന ശാസ്ത്രം, സാമുഹ്യ ശാസ്ത്രം) രണ്ടിന് ’എ’ ഗ്രേഡും ഒന്നിന് ’ബി’ ഗ്രേഡും.
കലാ കായിക പ്രവൃത്തി പരിചയ വിദ്യാരംഗം മേളകളിൽ സബ്ജില്ലാതലത്തിൽ ’എ’ ഗ്രേഡ്/ഒന്നാം സ്ഥാനം നേടിയവർക്ക് മാത്രമാണ് രണ്ടാം മാനദണ്ഡം ബാധകമാകുക.
പരീക്ഷ എഴുതാൻ അർഹതയുള്ള കുട്ടികളുടെ പേരു വിവരങ്ങൾ ഓണ്ലൈനായി ജനുവരി ആറിനു മുമ്പായി സ്കൂൾ ഹെഡ്മാസ്റ്റർ രജിസ്റ്റർ ചെയ്യണം. യുഎസ്എസ് പരീക്ഷയ്ക്ക് ഏഴാം ക്ലാസ് പാഠഭാഗങ്ങളിൽ നിന്നുള്ള ചോദ്യങ്ങൾ 2018 ജനുവരി 31 വരെ പഠിപ്പിക്കേണ്ടവ മാത്രമാക്കി നിജപ്പെടുത്തിയിട്ടുണ്ട്.
ഏഴാം ക്ലാസുവരെ കുട്ടി നേടിയിരിക്കേണ്ട പഠന നേട്ടങ്ങൾ (ആശയങ്ങൾ, ധാരണകൾ, ശേഷികൾ, മനോഭാവതലം) പരിഗണിച്ചുകൊണ്ടാണ് ചോദ്യങ്ങൾ തയാറാക്കുന്നത്.
പരീക്ഷയുടെ വസ്തുനിഷ്ഠതയും (ob jectivity) വിശ്വാസ്യതയും (reliability) നിലനിർത്തുന്നതിനായി ബഹുവികല്പ ചോദ്യങ്ങൾ (Multiple choice test items)ആയിരിക്കും ഈ പരീക്ഷയിൽ ഉൾപ്പെടുത്തുന്നത്.