ബിരുദ വിദ്യാർഥികൾക്കു പ്രോജക്ട് ഓറിയന്റഡ് കോഴ്സുകൾ
ബിരുദ വിദ്യാർഥികൾക്ക് അവധിക്കാല ഗവേഷണ പരിശീലനത്തിന് ഇന്ത്യയിലെ പ്രമുഖ സ്ഥാപനമായ ജവഹർലാൽ നെഹ്റു സെൻറർ ഫോർ അഡ്വാൻസ്ഡ് സയൻറിഫിക് റിസർച്ച് (ജെഎൻസിഎഎസ്ആർ) അവസരമൊരുക്കുന്നു.
പ്രോജക്ട് ഓറിയന്റഡ് കെമിക്കൽ എഡ്യൂക്കേഷൻ, പ്രോജക്ട് ഓറിയന്റഡ് ബയോളജിക്കൽ എഡ്യൂക്കേഷൻ പ്രോഗ്രാമുകളിലാണ് ഒന്നാം വർഷ ബിരുദ വിദ്യാർഥികൾക്ക് മധ്യവേനൽ അവധിക്കാലത്ത് ആറു മുതൽ എട്ട് ആഴ്ച വരെ ഗവേഷണ പരിശീലനം നൽകുന്നത്. ആറായിരം രൂപ സ്റ്റൈപ്പൻഡും ലഭിക്കും.
പരിശീലനം വിജയകരമായി പൂർത്തിയാക്കുന്നവർക്കു കെമിസ്ട്രിയിലോ ബയോളജിയിലോ ഡിപ്ലോമ സർട്ടിഫിക്കറ്റ് ലഭിക്കും. കൂടാതെ ജെഎൻസിഎഎസ്ആറിന്റെ എംഎസ്സിപിഎച്ച്ഡി പ്രോഗ്രാമിന് ഇൻറർവ്യൂവിന്റെ മാത്രം അടിസ്ഥാനത്തിൽ അഡ്മിഷൻ ലഭിക്കും.
കെമിക്കൽ പ്രോഗ്രാമിന് ഫിസിക്സ്, കെമിസ്ട്രി, മാത്തമറ്റിക്സ് കോംബിനേഷനിൽ ഒന്നാം വർഷ ബിരുദത്തിനു പഠിക്കുന്നവർക്കും ബയോളജിക്കൽ പ്രോഗ്രാമിന് ഏതെങ്കിലും സയൻസ് വിഷയമെടുത്ത് ഒന്നാം വർഷ ബിഎസ് സിക്കു പഠിക്കുന്നവർക്കും അപേക്ഷിക്കാം. 23 വരെ അപേക്ഷാ ഫോം വെബ്സൈറ്റിൽനിന്നു ഡൗണ്ലോഡ് ചെയ്യാം. പൂരിപ്പിച്ച അപേക്ഷ ലഭിക്കേണ്ട അവസാന തീയതി മാർച്ച് രണ്ട്.
വിലാസം: അക്കാഡമിക് കോഓർഡിനേറ്റർ, ഫെലോഷിപ് ആൻഡ് എക്സ്റ്റൻഷൻ പ്രോഗ്രാം, ജവഹർലാൽ നെഹ്റു സെൻറർ ഫോർ അഡ്വാൻസ്ഡ് സയൻറിഫിക് റിസർച്ച്, ബംഗളൂരു 560064.
വെബ്സൈറ്റ്: www.jncasr.ac.in.