ഫൈനല് എംഎ മലയാളം മാര്ക്ക് ലിസ്റ്റ് വിതരണം
2017 ഏപ്രിലില് നടത്തിയ ഫൈനല് എംഎ മലയാളം റഗുലര് /സപ്ലിമെന്ററി/ഇംപ്രൂവ്മെന്റ്പരീക്ഷയുടെ മാര്ക്ക് ലിസ്റ്റും പ്രൊവിഷണല് സര്ട്ടിഫിക്കറ്റും പരീക്ഷ എഴുതിയ കേന്ദ്രത്തില് മാര്ച്ച് ഒന്ന് മുതല് വിതരണം ചെയ്യും. കൊയിലാണ്ടി എസ്എആര്ബിടിഎം കോളജില് പരീക്ഷ എഴുതിയവര് മടപ്പള്ളി ഗവണ്മെന്റ് കോളജില് നിന്നും കൈപ്പറ്റണം.
പരീക്ഷ
പഠനവകുപ്പുകളിലെ മൂന്നാം സെമസ്റ്റര് എംബിഎ (സിസിഎസ്എസ്) റഗുലര്/സപ്ലിമെന്ററി/ഇംപ്രൂവ്മെന്റ് പരീക്ഷ മാര്ച്ച് 16ന് ആരംഭിക്കും.
വിദൂരവിദ്യാഭ്യാസം ഒന്നാം സെമസ്റ്റര് ബിഎസ്സി പ്രിന്റിംഗ് ടെക്നോളജി (2014 പ്രവേശനം) റഗുലര് പരീക്ഷ മാര്ച്ച് 14ന് ആരംഭിക്കും.
പരീക്ഷാഫലം
2017 ജൂലൈയില് നടത്തിയ രണ്ടാം സെമസ്റ്റര് എംഎഡ് പരീക്ഷാഫലം വെബ്സൈറ്റില് . പുനര്മൂല്യനിര്ണയത്തിന് മാര്ച്ച് ഒമ്പത് വരെ അപേക്ഷിക്കാം.
2017 മേയില് നടത്തിയ എംഎ സോഷ്യോളജി പ്രീവിയസ് റഗുലര് /സപ്ലിമെന്ററി/ഇംപ്രൂവ്മെന്റ (നോണ് സെമസ്റ്റര്) പരീക്ഷാഫലങ്ങള് വെബ്സൈറ്റില് . പുനര്മൂല്യനിര്ണയത്തിന് മാര്ച്ച് ഒമ്പത് വരെ അപേക്ഷിക്കാം.
എല്എല്ബി പുനര്മൂല്യനിര്ണയ ഫലം
എല്എല്ബി അഞ്ചാം സെമസ്റ്റര് (ത്രിവത്സരം) മേയ് 2017, ഒമ്പതാം സെമസ്റ്റര് (പഞ്ചവത്സരം) മെയ് 2017, ഒമ്പതാം സെമസ്റ്റര് ബിബിഎഎല്എല്ബി ഏപ്രില് 2017 പരീക്ഷകളുടെ പുനര്മൂല്യനിര്ണയ ഫലങ്ങള് വെബ്സൈറ്റില് . ഉത്തരക്കടലാസ് തിരിച്ചറിയാനാഗ്രഹിക്കുന്നവര് 15 ദിവസത്തിനകം പരീക്ഷാഭവനുമായി ബന്ധപ്പെടുക.
അന്താരാഷ്ട്ര സെമിനാറിന് തുടക്കം
തേഞ്ഞിപ്പലം: ആഗോളതലത്തില് മാറിവരുന്ന സാഹചര്യങ്ങള്ക്കും ആവശ്യങ്ങള്ക്കും അനുസൃതമായി ഉചിതമായ മാറ്റങ്ങള് പാഠ്യപദ്ധതിയില് വരുത്തേണ്ടതുണ്ടെന്ന് കേന്ദ്ര മാനവശേഷി വികസന മന്ത്രാലയത്തിന് കീഴിലെ ഉന്നത വിദ്യാഭ്യാസ വിഭാഗത്തില് സ്പെഷല് ഡൂട്ടി ഓഫീസറായ ഡോ.ഷക്കീല ഷംസു.
കാലിക്കട്ട് സര്വകലാശാലയില് വിദ്യാഭ്യാസ പഠനവിഭാഗം സംഘടിപ്പിച്ച 'അധ്യാപക വിദ്യാഭ്യാസം: വെല്ലുവിളികളും അവസരങ്ങളും' എന്ന വിഷയത്തിലെ ദ്വിദിന രാജ്യാന്തര സെമിനാറില് മുഖ്യപ്രഭാഷണം നടത്തുകയായിരുന്നു അവര് . അധ്യാപനപഠന പ്രക്രിയയില് വിദ്യാര്ഥികളുടെ പങ്കാളിത്തം വര്ധിപ്പിക്കണം. അധ്യാപകന് സംസാരിച്ചുകൊണ്ടേയിരിക്കുകയും വിദ്യാര്ഥി ശ്രോതാവാകുകയും ചെയ്യുന്ന രീതിയല്ല വേണ്ടത്. ലോക ജനസംഖ്യയിലെ ഏറ്റവും വലിയ യുവജനസമൂഹമാണ് ഇന്ത്യയിലേതെന്നത് ശ്രദ്ധേയമാണ്. ഒരു പഠനവിഭാഗത്തിലെ വിദ്യാർഥികള്ക്ക് അതേ സ്ഥാപനത്തിലെ മറ്റ് പഠനവിഭാഗങ്ങളുമായും അന്യസ്ഥാപനങ്ങളുമായും സഹകരണം ഉറപ്പാക്കേണ്ടതുണ്ടെന്നും അവര് പറഞ്ഞു.
പ്രോവൈസ് ചാന്സലര് ഡോ.പി.മോഹന് രാജ്യാന്തര സെമിനാറിന്റെ ഉദ്ഘാടനം നിര്വഹിച്ചു. പഠനവകുപ്പ് മേധാവി ഡോ.പി.കെ.അരുണ അധ്യക്ഷയായിരുന്നു. വിദ്യാഭ്യാസ ആസൂത്രണ ഭരണനിര്വഹണ ദേശീയ ഇന്സ്റ്റിറ്റ്യൂട്ടിലെ ഉപദേഷ്ടാവ് പ്രഫ.കെ.രാമചന്ദ്രന്, മലേഷ്യ സര്വകലാശാലയിലെ ഡോ.റോസ് അംന ബിന്തി അബ്ദുറഹൂഫ്, ഡോ.പി.ഉഷ, ഡോ.കെ.പി.മീര, ഡോ.ടി.വസുമതി, ഡോ.കെ.അബ്ദുല് ഗഫൂര് തുടങ്ങിയവര് പങ്കെടുത്തു. ഇന്ന് സമാപിക്കും.
ത്രിദിന ദേശീയ സംസ്കൃത സെമിനാറിന് തുടക്കമായി
തേഞ്ഞിപ്പലം: സംസ്കൃതത്തിന്റെ പ്രാദേശിക പാരമ്പര്യം: ഉത്തര കേരളത്തിന്റെസംഭാവനകള് ' എന്നവിഷയത്തില് കാലിക്കട്ട് സര്വകലാശാലാ സംസ്കൃത പഠനവകുപ്പിന്റെ ആഭിമുഖ്യത്തില് സംഘടിപ്പിക്കുന്ന ത്രിദിന ദേശീയ സെമിനാറിന് തുടക്കമായി. ഉദ്ഘാടനം പ്രോവൈസ് ചാന്സലര് ഡോ.പി.മോഹന് നിര്വഹിച്ചു.
പ്രഫ.എം.ആര് .രാഘവവാര്യർ മുഖ്യപ്രഭാഷണം നടത്തി. 32ാമത് പ്രഫ.എം.എസ്.മേനോന് എന്ഡോവ്മെന്റ്പ്രഭാഷണം ഡോ.കെ.വി.വാസുദേവന് നിര്വഹിച്ചു. 'സാഹിത്യ ആസ്വാദനത്തില് വ്യാകരണ വ്യവഹാരങ്ങള് ' എന്ന വിഷയത്തിലായിരുന്നു പ്രഭാഷണം.
ഡോ.എന് .കെ.സുന്ദരേശ്വരന് അധ്യക്ഷനായിരുന്നു. പ്രഫ.കെ.കെ.നീലകണ്ഠന് ഇളയത്, പ്രഫ.കെ.മുത്തുലക്ഷ്മി, ഇ.ശ്രീധരന് , ഡോ.ടി.എസ്.അജിത, ഡോ.എസ്.എ.എസ്.ശര്മ, പ്രഫ.വി.കെ.വിജയന് തുടങ്ങിയവര് പങ്കെടുത്തു. തൃക്കരിപ്പൂര് ഭാസ്കരന് പണിക്കരും പാണപ്പുഴ പത്മനാഭന് പണിക്കരും മറുത്ത് കളി അവതരിപ്പിച്ചു. മാര്ച്ച് ഒന്നിന് സമാപിക്കും.
അഖിലേന്ത്യാ ഓഡിയോ വീഡിയോ ഫെസ്റ്റിവലില് കാലിക്കട്ട് സര്വകലാശാലക്ക് മൂന്ന് അവാര്ഡുകള്
തേഞ്ഞിപ്പലം: 22ാമത് അഖിലേന്ത്യാ ചില്ഡ്രന്സ് എഡ്യുക്കേഷണല് ഓഡിയോ വീഡിയോ ഫെസ്റ്റിവലില് കാലിക്കട്ട് സര്വകലാശാലയിലെ എഡ്യുക്കേഷണല് മള്ട്ടിമീഡിയ ആൻഡ് റിസര്ച്ച് സെന്റര് (ഇഎംഎംആര്സി) മൂന്ന് അവാര്ഡുകള് നേടി. ഭോപ്പാല് റീജണല് ഇന്സ്റ്റിറ്റ്യൂട്ട് ഓഫ് എഡ്യുക്കേഷനില് നടന്ന ചടങ്ങില് മുകേഷ് ഖന്ന കാഷ് അവാര്ഡും പ്രശസ്തി പത്രവും ശില്പവും സമ്മാനിച്ചു.