സ്‌കോള്‍ കേരള : ഡിസിഎ പരീക്ഷ മേയ് ഒമ്പതു മുതല്‍
തിരുവനന്തപുരം: സ്‌കോള്‍ കേരള നടത്തുന്ന ഡിപ്ലോമ ഇന്‍ കംപ്യൂട്ടര്‍ ആപ്ലിക്കേഷന്‍ കോഴ്‌സ് (ഡി.സി.എ) മൂന്നാം ബാച്ചിന്‍റെ പൊതുപരീക്ഷ മേയ് ഒമ്പതിന് ആരംഭിക്കും. പ്രായോഗിക പരീക്ഷ മേയ് ഒമ്പത് മുതല്‍ 12 വരെ അതതു പഠന കേന്ദ്രങ്ങളിലും തിയറി പരീക്ഷ മേയ് 16 മുതല്‍ 20 വരെ തെരഞ്ഞെടുത്ത സര്‍ക്കാര്‍ ഹയര്‍ സെക്കൻഡറി സ്‌കൂളിലും നടക്കും.
www.scolekerala.org എന്ന വെബ്‌സൈറ്റില്‍ വിദ്യാര്‍ഥികള്‍ക്ക് അനുവദിച്ചിട്ടുള്ള യൂസര്‍നെയിം, പാസ്‌വേഡ് എന്നിവ ഉപയോഗിച്ചു ജനറേറ്റ് ചെയ്‌തെടുക്കുന്ന ചെലാനില്‍ പരീക്ഷാഫീസ് പിഴ കൂടാതെ 25 മുതല്‍ 30 വരെയും 20 രൂപ പിഴയോടെ മേയ് ഒന്നു മുതല്‍ മൂന്നു വരെയും സംസ്ഥാനത്തെ പോസ്റ്റ് ഓഫീസുകള്‍ മുഖേന അടയ്ക്കാം.
700 രൂപയാണ് ആകെ പരീക്ഷ ഫീസ്. സ്‌കോള്‍ കേരള സൈറ്റില്‍നിന്നു ഡൗണ്‍ലോഡ് ചെയ്‌തെടുത്ത അപേക്ഷാഫോം പൂരിപ്പിച്ചു ഫീസ് ഒടുക്കിയ അസല്‍ ചെലാന്‍, സ്‌കോള്‍ അനുവദിച്ച തിരിച്ചറിയല്‍ കാര്‍ഡിന്‍റെ പകര്‍പ്പ് എന്നിവ സഹിതം ബന്ധപ്പെട്ട പഠന കേന്ദ്രം പ്രിന്‍സിപ്പൽമാര്‍ക്കാണ് അപേക്ഷിക്കേണ്ടത്. ഇന്‍റേണല്‍ പരീക്ഷയ്ക്ക് 40 ശതമാനം മാര്‍ക്കും സമ്പര്‍ക്ക ക്ലാസില്‍ പങ്കെടുത്ത 75 ശതമാനം ഹാജരുമാണ് പരീക്ഷ എഴുതാനുള്ള യോഗ്യത.
ഡിസിഎ ഒന്നും രണ്ടും ബാച്ചുകളില്‍ കോഴ്‌സ് പൂര്‍ത്തിയാക്കിയവരില്‍ പരീക്ഷാ ഫീസ് അടയ്ക്കാത്തവര്‍ക്കും മുന്‍ പരീക്ഷകളില്‍ നിര്‍ദിഷ്ട യോഗ്യത നേടാത്തവര്‍ക്കും നിബന്ധനകള്‍ക്ക് വിധേയമായി 2018 മേയിലെ പരീക്ഷയ്ക്ക് അപേക്ഷ സമര്‍പ്പിക്കാം. വിശദാംശങ്ങള്‍ www.scolekerala.org എന്ന വെബ്‌സൈറ്റിലെ നോട്ടിഫിക്കേഷനില്‍ ലഭിക്കും.