റോഡ് സുരക്ഷാവാരം: നേത്ര പരിശോധനാ ക്യാന്പ് സംഘടിപ്പിച്ചു
കോഴിക്കോട്: റോഡ് സുരക്ഷാവാരത്തിന്റെ ഭാഗമായി കാലിക്കട്ട് സർവകലാശാലാ കാന്പസിൽ സംഘടിപ്പിച്ച നേത്ര പരിശോധനാ ക്യാന്പിൽ 478 പേർ ചികിത്സ നേടി. ആവശ്യമായവർക്ക് നിർദ്ദേശിച്ച കണ്ണടകൾ സർവകലാശാലാ പബ്ലിക് റിലേഷൻസ് വിഭാഗത്തിൽ മേയ് 16ന് വിതരണം ചെയ്യും. കോഴിക്കോട് കോംട്രസ്റ്റ് കണ്ണാശുപത്രിയുടെ സഹകരണത്തോടെയാണ് ക്യാന്പ് സംഘടിപ്പിച്ചത്.
നിർദേശിക്കപ്പെട്ടവർക്ക് ആശുപത്രിയിൽ തിമിര ശസ്ത്രക്രിയ നടത്തും. നിരന്തരമായി കംപ്യൂട്ടർ, ടെലിവിഷൻ, മൊബൈൽ എന്നിവ ഉപയോഗിക്കുന്നതും യാത്രകളിൽ പോലും കണ്ണുകൾക്ക് ഇക്കാര്യത്തിൽ വിശ്രമം നൽകാത്തതും നേത്രരോഗങ്ങൾ വർധിപ്പിക്കുന്നതായി ഡോക്ടർമാർ പറഞ്ഞു. പൊതുജനങ്ങൾക്കും സ്കൂൾ വിദ്യാർഥികൾക്കുമായി ബോധവത്കരണ ക്ലാസ്, ക്വിസ് മത്സരം തുടങ്ങിയവ സംഘടിപ്പിച്ചു. ഡോക്യൂമെന്ററി പ്രദർശനം, റോഡ് ദുരന്തങ്ങൾ അതിജീവിച്ചവരുടെ അനുഭവവിവരണങ്ങൾ, റോഡ് സുരക്ഷാ പ്രതിജ്ഞ തുടങ്ങിയവ 27, 28, 30 തിയതികളിലായി സംഘടിപ്പിക്കുന്നുണ്ട്.