കണ്ണൂർ സർവകലാശാലയിൽ എൽഎൽബി പഠിക്കാൻ കഴിയുമോ? അലിയാർ കെ.ആർ, സുൽത്താൻബത്തേരി
ചോദ്യത്തിൽ ചെറിയ ഒരാശയക്കുഴപ്പമുണ്ട്. ചോദ്യകർത്താവിന് നിയമപഠനം നടത്തേണ്ടത് സർവകലാശാലയുടെ സ്റ്റാറ്റ്യൂട്ടറി ഡിപ്പാർട്ട്മെന്റിലാണോ? അല്ലെങ്കിൽ സർവകലാശാലയിൽ അഫിലിയേറ്റ് ചെയ്തിട്ടുള്ള നിയമപഠന സൗകര്യമുള്ള കോളജുകളിലാണോ? രണ്ടാകിലും ഉത്തരം കണ്ണൂർ സർവകലാശാലയിൽ എൽഎൽബി പഠിക്കാൻ കഴിയും എന്നാണ്.
എന്നാൽ, സർവകലാശാല നടത്തുന്ന നേരിട്ടുള്ള എൽഎൽബി അഞ്ചുവർഷം ദൈർഘ്യമുള്ള ബിഎഎൽഎൽബിയാണ്. ഇതു നടക്കുന്നതാവട്ടെ സർവകലാശാലയുടെ പാലാട് തലശേരി കാന്പസിലെ സ്കൂൾ ഓഫ് ലീഗൽ സ്റ്റഡീസിലാണ്.
ഈ കോഴ്സിലേക്കുള്ള പ്രവേശനം സർവകലാശാല നടത്തുന്ന ഒരു പ്രവേശന പരീക്ഷയോടെയാണ്. കൂടുതൽ വിവരങ്ങൾക്ക് സർവകലാശാലയുടെ വെബ്സൈറ്റായ www.kan nuruniversity.ac.in സന്ദർശിക്കുക.
ഞാൻ 27 വയസുള്ള വ്യക്തിയാണ്. എന്റെ പ്ലസ് ടു പഠനത്തിനുശേഷം ഒരു റെഗുലർ കോളജിൽ ചേർന്നു ബിഎ ഒരുവർഷം പഠിച്ചു. പിന്നീട് ജോലിക്കായി ഗൾഫിൽ പോയി. ഇപ്പോൾ നാട്ടിൽ ഉണ്ട്. ഈവർഷം എംജി സർവകലാശാലയുടെ കീഴിൽ ഏതെങ്കിലും ഒരു റെഗുലർ കോളജിൽ ചേർന്ന് പഠനം തുടങ്ങണമെന്നുണ്ട്. ഇതിനായി ഞാൻ എന്തു ചെയ്യണം. എന്റെ പ്രായം പ്രശ്നമാണോ?
ജോസ് ആന്റണി, മുക്കുടം, ഇടുക്കി
ജോസ് ആന്റണിക്ക് മഹാത്മാഗാന്ധി സർവകലാശാലയ്ക്കു കീഴിലുള്ള ഏതെങ്കിലുമൊരു കോളജിൽ ബിരുദ പ്രവേശനം നേടുന്നതിന് സർവകലാശാല പ്രവേശന നിയമങ്ങളും ചട്ടങ്ങളും പ്രകാരം ഒരു തടസവുമില്ല. ബിരുദതലത്തിൽ കോളജിൽ പ്രവേശനം നേടാൻ പ്രായപരിധിയില്ല. എന്നാൽ, പ്രവേശനം ആവശ്യപ്പെടുന്നത് സ്പോർട്സ് കോട്ടയിലാണെങ്കിൽ അപേക്ഷകന് 25 വയസ് കഴിയാൻ പാടില്ല എന്ന നിയമമുണ്ട്.
ഈ വർഷമാണ് മഹാത്മാഗാന്ധി സർവകലാശാലയിൽ ബിരുദ പഠനത്തിന് ശ്രമിക്കുന്നതെങ്കിൽ സർവകലാശാല ഈ വർഷം പ്രവേശനത്തിനായി നടപടികൾ ആരംഭിക്കുന്പോൾ അപേക്ഷ സമർപ്പിക്കണം. യുജി ക്യാപ് 2018 എന്ന പേരിൽ സർവകലാശാല വെബ്സൈറ്റിൽ ഓൺലൈൻ അപേക്ഷകൾ സമർപ്പിക്കാൻ അവസരമുണ്ടാകും. 201819 അധ്യായന വർഷത്തെ ബിരുദതല കോളജ് പ്രവേശനത്തിനുള്ള അപേക്ഷ ഇതു വരെയും മഹാത്മാഗാന്ധി സർവകലാശാല പ്രസിദ്ധീകരിച്ചിട്ടില്ല. ഉടനെ ഉണ്ടാകും.
ഇതിനു മുന്പായി സർവകലാശാലയിൽ പോയി പഴയ പ്രവേശനം റദ്ദ് ചെയ്തതിന്റെ സർട്ടിഫിക്കറ്റുകൾ കൂടി വാങ്ങി പുതിയ അപേക്ഷയോടൊപ്പം സമർപ്പിച്ചാലെ പുതുതായി പ്രവേശനം നേടാൻ കഴിയൂ.
തയാറാക്കിയത് : ബാബു പള്ളിപ്പാട്ട്
ചോദ്യങ്ങൾ അയയ്ക്കേണ്ട ഇ മെയിൽ
[email protected]