എംജി യൂണിവേഴ്സിറ്റിയിൽ ഇന്നു മുതൽ മൈഗ്രേഷൻ സർട്ടിഫിക്കറ്റുകളും ഓണ്ലൈനിൽ
കോട്ടയം: എംജി യൂണിവേഴ്സിറ്റിയിൽ ഇപ്പോൾ നൽകിക്കൊണ്ടിരിക്കുന്ന ഓണ്ലൈൻ സേവനങ്ങളായ ഓണ്ലൈൻ ഫീസ്, എലിജിബിലറ്റി, ഇക്വലൻസി സർട്ടിഫിക്കറ്റുകൾ എന്നിവയ്ക്ക് പുറമെ ആറോളം സർട്ടിഫിക്കറ്റുകളും സേവനങ്ങളും ഇനി മുതൽ ബജറ്റ് മോണിറ്ററിംഗിന്റെ ഭാഗമായി ഇന്നു മുതൽ ഓണ്ലൈനിൽ ലഭ്യമാക്കും.
ലോകത്തിന്റെ ഏതു കോണിൽനിന്നും അപേക്ഷിക്കുവാനും അപേക്ഷയുടെ അടിസ്ഥാനത്തിൽ യൂണിവേഴ്സിറ്റി നൽകുന്ന സർട്ടിഫിക്കറ്റ് ഡൗണ്ലോഡ് ചെയ്യാനും, ലഭിച്ച സർട്ടിഫിക്കറ്റ് ഒറിജിനൽ ആണോയെന്ന് പരിശോധിക്കുവാനുമുള്ള ഓണ്ലൈൻ സംവിധാനമാണ് ഒരുങ്ങിയിരിക്കുന്നത്. മൈഗ്രേഷൻ സർട്ടിഫിക്കറ്റുകൾ, മെട്രിക്കുലേഷൻ, റെക്കൊഗ്നിഷൻ, കോളജ് ട്രാൻസ്ഫർ, എൻഎസ്എസ് അഡ്മിഷൻ മുതൽ ഗ്രേസ് മാർക്ക് ദാനം വരെ എന്നീ സർട്ടിഫിക്കറ്റുകളും സേവനങ്ങളും ഓണ്ലൈൻ മുഖേന ലഭ്യമാകും. ഇതിലൂടെ യൂണിവേഴ്സിറ്റി കൂടുതൽ വിദ്യാർഥി സൗഹൃദവും, ഓഫീസ് പ്രവർത്തനങ്ങളിൽ കൂടുതൽ കൃത്യതയും വേഗതയും ആർജിക്കുമെന്നും വൈസ് ചാൻസലർ ഡോ. ബാബു സെബാസ്റ്റ്യൻ പറഞ്ഞു.
201819 ബജറ്റ് നിർദ്ദേശങ്ങൾ സമയബന്ധിതമായി നടപ്പിലാക്കുന്നതിന്റെ ഭാഗമായാണു ഈ ഓണ്ലൈൻ സേവനങ്ങൾ ആരംഭിക്കുന്നത്. അടുത്ത മൂന്നുമാസത്തിനുള്ളിൽ എല്ലാ സർട്ടിഫിക്കറ്റുകളും പൂർണമായും ഓണ്ലൈനിൽ ലഭ്യമാകുമെന്ന് ഫിനാൻസ് കമ്മിറ്റി കണ്വീനർ ഡോ. കെ. ഷെറഫുദ്ദീൻ അറിയിച്ചു. ഇതുമൂലം വിദ്യാർഥികൾക്ക് സർവകലാശാലയിലെത്താതെ തന്നെ എസ്എംഎസിലൂടെ അപേക്ഷകളുടെ പുരോഗതി അറിയുവാൻ സാധിക്കും. വിവിധ സെക്ഷനുകളിലെ അപേക്ഷാപരിശോധനയ്ക്ക് എടുക്കുന്ന കാലതാമസവും ഇതിലൂടെ പരിഹരിക്കാനാവും. എൻഎസ്എസിന്റെ ഭാഗമായി ബ്ലഡ് ഡോണേഴ്സ് ഫോറം എന്ന പുതിയ ഒരു ഓണ്ലൈൻ സേവനവും പൊതുജനങ്ങൾക്ക് ലഭ്യമാക്കാനുള്ള സൗകര്യവും ഒരുക്കിയിട്ടുണ്ട്.