ഫുഡ്ക്രാഫ്റ്റ് ഇൻസ്റ്റിറ്റ്യൂട്ട് എന്തൊക്കെ പ്രോഗ്രാമുകളാണ് നടത്തുന്നത്?
സജീവ്, കീഴില്ലം
കേരളസർക്കാരും ഇന്ത്യാ ഗവൺമെന്റും സംയുക്തമായി നടത്തുന്ന പഠനകേന്ദ്രങ്ങളാണ് ഫുഡ്ക്രാഫ്റ്റ് ഇൻസ്റ്റിറ്റ്യൂട്ടുകൾ. കേരളത്തിൽ ഫുഡ്ക്രാഫ്റ്റ് ഇൻസ്റ്റിറ്റ്യൂട്ടിന്റെ 12 സ്ഥാപനങ്ങളാണുള്ളത്. സർട്ടിഫിക്കറ്റ് കോഴ്സുകളാണ് ഇവിടങ്ങളിൽ ഉള്ളത്.
1967ൽ ആരംഭിച്ച ഈ സ്ഥാപനം പൂർണമായും സർക്കാർ ഉടമസ്ഥതയിലാണ്. ഫീസ് നിരക്ക് വളരെ കുറവാണ്. എസ്സി/എസ്ടി വിഭാഗങ്ങൾക്ക് ഫീസാനുകൂല്യവും സ്റ്റൈപ്പൻഡും ഉണ്ട്.
ഫ്രണ്ട് ഓഫീസ് ഓപ്പറേഷൻ, ഫുഡ് ആൻഡ് ബിവറേജ് സർവീസ്, ഫുഡ് പ്രൊഡക്ഷൻ, ഹോട്ടൽ അക്കമഡേഷൻ ഓപ്പറേഷൻ, ബേക്കറി ആൻഡ് കൺഫക്ഷനറി എന്നീ ശാഖകളിലാണു കോഴ്സുകൾ.
ഫുഡ്ക്രാഫ്റ്റ് ഇൻസ്റ്റിറ്റ്യൂട്ടിൽ പഠനത്തിനു കുറഞ്ഞ വിദ്യാഭ്യാസയോഗ്യത പത്താംക്ലാസ് പാസാണ്.
സ്ഥാപനത്തിന്റെ ഒഫീഷ്യൽ വെബ്സൈറ്റിൽനിന്ന് അപേക്ഷാഫാറത്തിന്റെ മാതൃക ഡൗൺലോഡ് ചെയ്ത് പൂരിപ്പിച്ച് സർട്ടിഫിക്കറ്റുകളുടെ കോപ്പികൾകൂടി അറ്റാച്ച് ചെയ്ത് അയച്ചുകൊടുക്കണം. സ്റ്റാന്പ് ഒട്ടിച്ച് സ്വന്തം പേരും വിലാസവും എഴുതിയ ഒരു പോസ്റ്റ്കാർഡുകൂടി അപേക്ഷാഫാറത്തോടൊപ്പം അയച്ചുകൊടുക്കണം.
താഴെപറയുന്ന സ്ഥലങ്ങളിലാണ് ഫുഡ്ക്രാഫ്റ്റ് ഇൻസ്റ്റിറ്റ്യൂട്ടുകൾ.
പട്ടം തിരുവനന്തപുരം, കടപ്പാക്കട കൊല്ലം, കുമാരനല്ലൂർ കോട്ടയം, മങ്ങാട്ടുകവല തൊടുപുഴ ഇടുക്കി ജില്ല, ചേർത്തല ആലപ്പുഴ ജില്ല, കളമശേരി എറണാകുളം ജില്ല, പൂത്തോൾ തൃശൂർ, പെരിന്തൽമണ്ണ മലപ്പുറം, തിരൂർ മലപ്പുറം ജില്ല, കോഴിക്കോട്, കണ്ണൂർ, കാസർഗോഡ്.
കേരളത്തിലെ പത്താംക്ലാസ് പരീക്ഷയുടെ ഫലപ്രഖ്യാപനം വന്ന ശേഷമേ അഡ്മിഷൻ അപേക്ഷകൾ ഫുഡ്ക്രാഫ്റ്റ് ഇൻസ്റ്റിറ്റ്യൂട്ടുകൾ ക്ഷണിക്കാറുള്ളൂ.
തയാറാക്കിയത്
ബാബു പള്ളിപ്പാട്ട്
ചോദ്യങ്ങൾ അയയ്ക്കേണ്ട ഇ മെയിൽ
[email protected]