പിജി മൂന്നാം അലോട്ട്മെന്റ്: ഓപ്ഷനുകൾ ഇന്നുകൂടി പുനഃക്രമീകരിക്കാം
ഓഗസ്റ്റ് മൂന്നിന് നടക്കുന്ന ബിരുദാനന്തര ബിരുദ ഏകജാലക പ്രവേശനത്തിന്റെ മൂന്നാം അലോട്ട്മെന്റിന് പരിഗണിക്കപ്പെടുന്നതിനായി അപേക്ഷകർക്ക് തങ്ങൾ നേരത്തെ നൽകിയ ഓപ്ഷനുകൾ പുനഃക്രമീകരിക്കുവാൻ ഇന്ന് വൈകുന്നേരം അഞ്ച്വരെ സൗകര്യമുണ്ടാകും. അപേക്ഷകർക്ക് തങ്ങളുടെ ആപ്ലിക്കേഷൻ നന്പർ, പാസ്വേഡ് എന്നിവ ഉപയോഗിച്ച് ലോഗിൻ ചെയ്ത് ഓപ്ഷനുകളിൽ ആവശ്യമായ പുനഃക്രമീകരണം നടത്താൻ സാധിക്കും. എന്നാൽ പുതുതായി കോളജുകളോ, പ്രോഗ്രാമുകളോ കൂടുതലായി കൂട്ടിച്ചേർക്കുവാൻ ഈ ഘട്ടത്തിൽ സാധിക്കുകയില്ല.
ഒന്നും രണ്ടും അലോട്ട്മെന്റുകളിൽ അലോട്ട്മെന്റ് വഴി പ്രവേശനം ലഭിച്ച വിദ്യാർഥികൾ തങ്ങൾക്ക് നിലവിൽ ലഭിച്ച അലോട്ട്മെന്റിൽ തൃപ്തരാണെങ്കിൽ നിലനിൽക്കുന്ന ഹയർ ഓപ്ഷനുകൾ ഡിലീറ്റ് ചെയ്യണം. അലോട്ട്മെന്റ് ലഭിച്ച വിദ്യാർഥികൾ ഹയർ ഓപ്ഷൻ ഡിലീറ്റ് ചെയ്യാതിരിക്കുകയും ത·ൂലം പ്രോഗ്രാമിലേക്ക്, കോളജിലേക്ക് മൂന്നാം അലോട്ട്മെന്റ് ലഭിക്കുകയും ചെയ്യുന്നപക്ഷം പുതുതായി അലോട്ട്മെന്റ് ലഭിച്ച പ്രോഗ്രാമിലേക്ക്, കോളജിലേക്ക് നിർബന്ധമായും പ്രവേശനം നേടേണ്ടതായി വരും. കൂടാതെ അവർക്ക് ലഭിച്ച ആദ്യ അലോട്ട്മെന്റ് റദ്ദാക്കപ്പെടുകയും ചെയ്യും. ഒന്നും രണ്ടും അലോട്ട്മെന്റിൽ സ്ഥിരപ്രവേശം നേടിയിട്ടുള്ളവർ ഹയർ ഓപ്ഷനുകൾ റദ്ദാക്കേണ്ടതില്ല.
പ്രാക്ടിക്കൽ
2018 ജൂണ്, ജൂലൈ മാസങ്ങളിൽ തൃപ്പൂണിത്തുറ ആർഎൽവി കോളജിൽ നടത്തിയ രണ്ടും നാലും സെമസ്റ്റർ എംഎ ഭരതനാട്യം, മോഹിനിയാട്ടം (സിഎസ്എസ് റെഗുലർ, സപ്ലിമെന്ററി) പരീക്ഷകളുടെ പ്രാക്ടിക്കൽ ഓഗസ്റ്റ് എട്ടു മുതൽ 14 വരെ ആർഎൽവി കോളജിൽ നടക്കും. വിശദമായ ടൈംടേബിൾ സർവകലാശാലാ വെബ്സൈറ്റിൽ ലഭ്യമാണ്.
വൈവാവോസി
2018 മാർച്ചിൽ നടത്തിയ നാലാം സെമസ്റ്റർ എൽഎൽഎം (റെഗുലർ, സപ്ലിമെന്ററി) പരീക്ഷകളുടെ വൈവാവോസി ഓഗസ്റ്റ് ഏഴു മുതൽ ഒന്പതു വരെ എറണാകുളം ഗവ. ലോ കോളജിൽ നടക്കും. വിശദമായ ടൈംടേബിൾ സർവകലാശാലാ വെബ് സൈറ്റിൽ ലഭ്യമാണ്.
പരീക്ഷാഫലം
2017 ഡിസംബറിൽ നടത്തിയ മൂന്നാം സെമസ്റ്റർ എംഎ സോഷ്യോളജി (സപ്ലിമെന്ററി) പരീക്ഷയുടെ ഫലം പ്രസിദ്ധീകരിച്ചു. പുനർമൂല്യനിർണയത്തിനും സൂക്ഷ്മപരിശോധനയ്ക്കും ഓഗസ്റ്റ് ഒന്പതു വരെ അപേക്ഷിക്കാം.
2017 ഡിസംബറിൽ നടത്തിയ മൂന്നാം സെമസ്റ്റർ എംഎ തമിഴ് (സിഎസ്എസ് റെഗുലർ) പരീക്ഷയുടെ ഫലം പ്രസിദ്ധീകരിച്ചു. പുനർമൂല്യനിർണയത്തിനും സൂക്ഷ്മപരിശോധനയ്ക്കും ഓഗസ്റ്റ് ഒന്പതു വരെ അപേക്ഷിക്കാം.
2017 ഡിസംബറിൽ നടത്തിയ മൂന്നാം സെമസ്റ്റർ എംഎ മ്യൂസിക് വോക്കൽ (സിഎസ്എസ് റെഗുലർ, സപ്ലിമെന്ററി) പരീക്ഷയുടെ ഫലം പ്രസിദ്ധീകരിച്ചു. പുനർമൂല്യനിർണയത്തിനും സൂക്ഷ്മപരിശോധനയ്ക്കും ഓഗസ്റ്റ് ഒന്പതു വരെ അപേക്ഷിക്കാം.
യൂണിയൻ തെരഞ്ഞെടുപ്പ്
ഈ അധ്യയനവർഷത്തെ വിദ്യാർഥി യൂണിയൻ തെരഞ്ഞെടുപ്പ് വിജ്ഞാപനം മൂന്നിന് അതാത് കോളജുകളിൽ പ്രസിദ്ധീകരിക്കുകയും വോട്ടെടുപ്പും വോട്ടെണ്ണലും 16 നും നടത്തും. ഇത് സംബന്ധമായ അറിയിപ്പ് എല്ലാ കോളജ് പ്രിൻസിപ്പൽമാർക്കും ഇമെയിൽ ചെയ്തിട്ടുള്ളത് കൂടാതെ സർവകലാശാലയുടെ വെബ് സൈറ്റിലും (www.m gu.ac.in) നൽകിയിട്ടുണ്ട്. ബന്ധപ്പെട്ട എല്ലാ കോളജ് അധികാരികളും ഇവ ഡൗണ്ലോഡ് ചെയ്ത് നിർദേശാനുസരണം കോളജ് യൂണിയൻ തെരഞ്ഞെടുപ്പ് നടത്തുന്നതിനുള്ള നടപടിക്രമങ്ങൾ കൈക്കൊള്ളണം. ഇത് സംബന്ധിച്ച് മറ്റ് തരത്തിലുള്ള അറിയിപ്പുകൾ ഉണ്ടായിരിക്കുന്നതല്ല.