മൊബൈലിനുവേണ്ടി പതിനായിരം രൂപയുടെ ബജറ്റ് തയാറാക്കിയിട്ടുണ്ടോ? എന്നാൽ ഇതാ, ആ വിലയ്ക്ക് ഉടനെ വാങ്ങാവുന്ന മികച്ച ഫോണുകളുടെ ലിസ്റ്റ്. റെഡ്മി മുതൽ റിയൽമി വരെ കൊള്ളാവുന്ന ഫീച്ചറുകളുമായി നിങ്ങളെ കാത്തിരിക്കുന്നുണ്ട്. ഒട്ടുമിക്ക ആവശ്യങ്ങൾക്കും ഈ ഫോണുകൾ ധാരാളം മതി.
ഷവോമി റെഡ്മി നോട്ട് 5
18:9 സ്ക്രീൻ റേഷ്യോയിൽ 5.9 ഇഞ്ച് ഫുൾ വ്യൂ ഡിസ്പ്ലേ നൽകുന്ന ഫോണ്. മെറ്റൽ യൂണിബോഡി, സ്നാപ്ഡ്രാഗണ് 625 പ്രോസസർ, 4000 എംഎഎച്ച് ബാറ്ററി ബാക്കപ്പ്, 12 എംപി റിയർ കാമറയും 5 എംപി സെൽഫി കാമറയും... പോരാത്തതിന് ഫിംഗർപ്രിന്റ് സ്കാനറും. റെഡ്മി നോട്ട് 5-ന്റെ ഫീച്ചറുകളാണ് മുകളിൽ വായിച്ചത്. 3 ജിബി റാം/ 32 ജിബി മെമ്മറി വേരിയന്റിന്റെ വില 9,999 രൂപ.
വീഡിയോ സ്ട്രീമിംഗ്, ഹെവി ഗെയിംസ് എന്നിവയ്ക്കെല്ലാം തീർത്തും അനുയോജ്യമാണ് ഈ മോഡൽ. മികച്ച ഡിസ്പ്ലേയും കോംപാക്ട് ഡിസൈനും ഇതിനെ കൂടുതൽ പ്രിയങ്കരമാക്കുന്നു. എംഐ യൂസർ ഇന്റർഫേസോടെ ആൻഡ്രോയ്ഡ് ഓറിയോ 8.1 ആണ് ഓപ്പറേറ്റിംഗ് സിസ്റ്റം. കാമറകൾ മികച്ച റിസൽറ്റ് നൽകുന്നതായി ഉപയോക്താക്കൾ സാക്ഷ്യപ്പെടുത്തുന്നുണ്ട്.
ഹോണർ 7സി
സ്ക്രീൻ വലിപ്പവും ആസ്പെക്ട് റേഷ്യോയും റെഡ്മി നോട്ട് 5നു തുല്യമാണ് ഹോണറിന്റെ 7സി മോഡലിന്. ക്വാൽകോം സ്നാപ്ഡ്രാഗണ് 450 പ്രോസസർ, ആൻഡ്രോയ്ഡ് ഓറിയോ (ഇഎംയുഐ അടക്കം), 3000 എംഎഎച്ച് ബാറ്ററി, 13 എംപി + 2 എംപി ഡ്യുവൽ റിയർ കാമറ, 8 എംപി ഫ്രണ്ട് കാമറ, ഫിംഗർപ്രിന്റ് സ്കാനർ, ഫേസ് അണ്ലോക്ക് ഫീച്ചർ എന്നിങ്ങനെയാണ് മറ്റു ഫീച്ചറുകൾ.
കാമറയും ഡിസ്പ്ലേയും മികച്ചതാണെന്നാണ് ഉപയോഗിച്ചവരുടെ വിലയിരുത്തൽ. ഗെയിമിംഗിന് കൂടുതൽ അനുയോജ്യം. ബാറ്ററി 12 മണിക്കൂർവരെ നിൽക്കും. 3 ജിബി/ 32 ജിബി മോഡലിന് 9,999 രൂപയാണ് വില.
റെഡ്മി 5 എ
ലോകത്ത് ഏറ്റവും കൂടുതൽ വില്പനയുള്ള സ്മാർട്ട്ഫോണുകളിൽ മുൻനിരയിലാണ് റെഡ്മി 5എയുടെ സ്ഥാനം. മുന്പുകണ്ട രണ്ടു മോഡലുകളേക്കാൾ വില കുറവാണ് എന്നതാണ് ആദ്യത്തെ ആകർഷണം. ഫീച്ചറുകൾ എങ്ങനെ എന്നു നോക്കാം. 5 ഇഞ്ച് എച്ച്ഡി ഡിസ്പ്ലേ, 16:9 ആസ്പെക്ട് റേഷ്യോ, സ്നാപ്ഡ്രാഗണ് 425 പ്രോസസർ, ആൻഡ്രോയ്ഡ് 7.1 നൂഗാ (യൂസർ ഇന്റർഫേസ് 9.1), 3000 എംഎഎച്ച് ബാറ്ററി, 13 എംപി റിയർ, 5 എംപി ഫ്രണ്ട് കാമറകൾ, ഫിംഗർപ്രിന്റ് സെൻസർ എന്നിവ ഈ മോഡലിലുണ്ട്.
ഹെവി ഡ്യൂട്ടി ഗെയിമിംഗിന് അനുയോജ്യമല്ലെങ്കിലും വീഡിയോ സ്ട്രീമിംഗ് ഭംഗിയായി ചെയ്യാം. ബാറ്ററി ഒരുദിവസം നിലനിൽക്കും. ബജറ്റ് അല്പം താഴ്ന്ന നിലയിലാണെങ്കിൽ തീർച്ചയായും ഈ മോഡലിലേക്കു പോകാം. 2 ജിബി/ 16 ജിബി മോഡലിന് 4,999 രൂപയും 3 ജിബി/ 32 ജിബി മോഡലിന് 6,999 രൂപയുമാണ് വില.
മോട്ടോ ജി5എസ്
5.2 ഇഞ്ച് ഫുൾ എച്ച്ഡി ഡിസ്പ്ലേയോടെയാണ് മോട്ടോ ജി5 സീരീസ് വരുന്നത്. കോർണിംഗ് ഗോറില്ല ഗ്ലാസ് 3 പ്രൊട്ടക്ഷൻ, സ്നാപ്ഡ്രാഗണ് 430 പ്രോസസർ, 3000 എംഎഎച്ച് ബാറ്ററി, 4 ജിബി റാം, 32 ജിബി സ്റ്റോറേജ്, 16 എംപി, 5 എംപി കാമറകൾ എന്നിങ്ങനെ ഫീച്ചറുകളുള്ള മോട്ടോ ജി5എസ് മുടക്കുന്ന തുകയ്ക്കുള്ള മൂല്യം ഉറപ്പുനൽകുന്നു. എൽഇഡി ഫ്ളാഷ് അടക്കമുള്ളതാണ് കാമറ. ജി6 സീരീസ് വിപണിയിലെത്തിയെങ്കിലും ജി5-നോടുള്ള പ്രിയം കുറയുന്നില്ല. 4ജിബി/32 ജിബി മോഡലിന് 9,399 രൂപയാണ് വില.
ഒപ്പോ റിയൽമി 1
മികച്ച നിലവാരത്തിലുള്ള നിർമാണവും കുറഞ്ഞ ഭാരവുമാണ് റിയൽമി 1-ന്റെ ആദ്യം കണ്ണിൽപ്പെടുന്ന സവിശേഷത. 6 ഇഞ്ച് ഫുൾ എച്ച്ഡി ഡിസ്പ്ലേ, 18:9 സ്ക്രീൻ ആസ്പെക്ട് റേഷ്യോ, ഹീലിയോ പി60 പ്രോസസർ, ആൻഡ്രോയ്ഡ് 8.0 ഓറിയോ (കളേഴ്സ് ഒഎസ് 5.1 ഇന്റർഫേസ്), 3410 എംഎഎച്ച് ബാറ്ററി, 13 എംപി- 8എംപി കാമറകൾ എന്നിവയാണ് മറ്റു ഫീച്ചറുകൾ. ഇതിൽ ഫിംഗർപ്രിന്റ് സ്കാനർ ഇല്ലെങ്കിലും ഫ്രണ്ട് കാമറയിലൂടെ ഫേഷ്യൽ റെക്കഗ്നിഷൻ സാധ്യമാണ്. ഇത് വളരെ നന്നായി പ്രവർത്തിക്കുന്നുണ്ടെന്ന് ഉപയോക്താക്കൾ പറയുന്നു. 3ജിബി റാം, 32 ജിബി മെമ്മറി മോഡലിന് 9,999 രൂപയാണ് വില.
റെഡ്മി വൈ2
ഷവോമിയിൽനിന്നുതന്നെയാണ് അടുത്ത മോഡലും വരുന്നത്. മെറ്റാലിക് ഫിനിഷുള്ള പ്ലാസ്റ്റിക് ബോഡിയാണ് വൈ2-വിന്േറത്. സ്നാപ്ഡ്രാഗണ് 625 പ്രോസസർ, ആൻഡ്രോയ്ഡ് 8.0 ഓറിയോ (എംഐ യൂസർ ഇന്റർഫേസ് 9.5), 3080 എംഎഎച്ച് ബാറ്ററി, 5.9 ഇഞ്ച് എച്ച്ഡി ഡിസ്പ്ലേ, 18: 9 സ്ക്രീൻ റേഷ്യോ എന്നീ സവിശേഷതകളുണ്ട്. 16 എംപി ഫ്രണ്ട് കാമറയുണ്ട് എന്നത് സെൽഫി പ്രേമികൾക്ക് സഹായകമാകും. 12+5 എംപി ഡ്യുവൽ കാമറയാണ് പിന്നിൽ. സോഷ്യൽ മീഡിയ ആപ്പുകൾ ഉപയോഗിക്കുന്നവർക്ക് ഏറെ സൗകര്യപ്രദമാണ് ഈ മോഡലെന്ന് റിവ്യൂകളിൽ പറയുന്നു.
3 ജിബി/ 32 ജിബി മോഡലിന്റെ വില 9,999 രൂപ.