കരുത്തൻ റെഡിഗോ
ഡസ്റ്ററും ടെറാനോയും പോലെ, സണ്ണിയും സ്കാലയും പോലെ. സഹോദര മോഡലുകളാണ് ക്വിഡും റെഡിഗോയും. റെനോ ക്വിഡിന്‍റെ ഡാറ്റ്സണ്‍ വകഭേദം.

എസ്യുവി ലുക്കുമായി എത്തി വിപണി കീഴടക്കിയ റെനോ ക്വിഡിന്‍റെ എൻജിനും പ്ലാറ്റ്ഫോമുമെല്ലാമാണ് റെഡിഗോയ്ക്കും ഉപയോഗിക്കുന്നത്. റെഡിഗോയ്ക്ക് പക്ഷേ, ഒരു ടോൾ ബോയ് ഹാച്ച്ബാക്ക് രൂപമാണ്. ക്വിഡിനെക്കാൾ വിലയും കുറവ്. കോംപാക്ട് ഹാച്ച്ബാക്ക് വിപണിയിൽ മാരുതി ആൾട്ടോയോടും ഹ്യുണ്ടായി ഇയോണിനോടുമാണ് ഈ സഹോദര മോഡലുകളുടെ മത്സരം. ക്വിഡിന്‍റേതുപോലെ കൂടുതൽ കരുത്തുറ്റ ഒരു ലിറ്റർ എൻജിനുമായി ഈ മത്സരം കൊഴുപ്പിക്കുകയാണ് ഇപ്പോൾ റെഡിഗോ. ഒരു ലിറ്റർ എൻജിനുള്ള റെനോ ക്വിഡിനെ അടുത്തറിയാം.

രൂപകൽപ്പന

പിൻഭാഗത്ത് ഒരു ലിറ്റർ ബാഡ്ജ് ഉണ്ടെന്നത് ഒഴികെ 800 സിസി റെഡിഗോയുമായി ഒരു ലിറ്റർ വകഭേദത്തിന് വ്യത്യാസമില്ല. മാരുതി വാഗണ്‍ ആറിനെപ്പോലെ ടോൾ ബോയ് രൂപകൽപ്പനയാണ് റെഡിഗോയ്ക്ക്. ക്രോസ് ഓവറിന്‍റെ തലയെടുപ്പുണ്ട്. മുൻഭാഗത്തെക്കാൾ രൂപഭംഗി പിൻഭാഗത്തിനാണ്.

ക്വിഡിന്‍റേതുപോലെ സിഎംഎഫ് എ പ്ലാറ്റ്ഫോമിലാണ് റെഡിഗോയും നിർമിച്ചിരിക്കുന്നത്. എന്നാൽ ബോഡി അളവുകളിൽ ഇവ തമ്മിൽ ചെറിയ വ്യത്യാസമുണ്ട്. നീളം, വീതി എന്നിവ ക്വിഡിനാണ് കൂടുതൽ . എന്നാൽ കൂടുതൽ ഉയരം റെഡിഗോയ്ക്കുണ്ട്. എൻട്രി ലെവൽ ഹാച്ച്ബാക്കുകളിൽ തന്നെ ഏറ്റവും ഉയരമുള്ളത് റെഡിഗോയ്ക്കാണ്. കൂട്ടത്തിലേയ്ക്കും ചെറുതാണ് മാരുതി ആൾട്ടോ 800.

എതിരാളികളെ അപേക്ഷിച്ച് കൂടുതലുണ്ട് ഗ്രൗണ്ട് ക്ലിയറൻസ്. വലിയ ഹന്പുകളെയും പേടികൂടാതെ മറികടക്കാൻ 185 മില്ലിമീറ്റർ ഗ്രൗണ്ട് ക്ലിയറൻസ് ( ക്വിഡിന് 180 മില്ലിമീറ്റർ) സഹായിക്കുന്നു. എൻട്രി ലെവൽ ഹാച്ച്ബാക്ക് വിഭാഗത്തിൽ ആദ്യമായി എൽഇഡി ഡേ ടൈം റണ്ണിംഗ് ലാംപുകൾ റെഡിഗോ നൽകുന്നു . ഹെഡ്ലാംപ് ഓണാക്കുന്പോൾ ഡേ ടൈം റണ്ണിംഗ് ലാംപുകൾ സ്വയം ഓഫാകും. എൽഇഡികൾക്ക് അൽപ്പം കൂടി പ്രകാശതീവ്രത വേണ്ടിയിരുന്നു.

ഇന്‍റീരിയറിൽ അൽപ്പം മാറ്റമുണ്ട്. ഗ്രേയ്ക്ക് പകരം ബ്ലാക്ക് നിറത്തിലാണ് ഡാഷ്ബോർഡും സീറ്റ് കവറും. വളരെ ലളിതമാണ് റെഡിഗോയുടെ ഡാഷ്ബോർഡ്. യുഎസ്ബി , ഓക്സിലറി ഇൻപുട്ട്, സിഡി എന്നിവയിലൂടെ ഇതിൽ പാട്ട് കേൾക്കാം. എഫ്എം റേഡിയോയുമുണ്ട്. പവർ വിൻഡോ സ്വിച്ചുകൾ ഗീയർലിവറിനു മുന്നിലാണ് നൽകിയിരിക്കുന്നത്. ഉപയോഗിച്ച് ശീലമാകും വരെ ഇത് കൈകാര്യം ചെയ്യുക അത്ര സുഖകരമല്ല. റിമോട്ട് സെൻട്രൽ ലോക്കിംഗ് ഒരു ലിറ്റർ ക്വിഡിന് അധികമായുള്ള ഫീച്ചറാണ്.

പൊക്കം കൂടിയവർക്കും സുഖകരമായി യാത്ര ചെയ്യാവുന്ന വിധം ഉയരം കൂടിയ ഇന്‍റീരിയറാണ് റെഡിഗോയുടെ. ഹെഡ് ലെഗ് റൂം ആവശ്യത്തിലേറെയുണ്ട്.
സീറ്റുകൾ മെലിഞ്ഞതാണെങ്കിലും പിൻഭാഗത്തിനു നല്ല സപ്പോർട്ട് ലഭിക്കുന്നുണ്ട്. തുടകൾക്കും വേണ്ടത്ര താങ്ങ് കിട്ടുന്നു. പിൻസീറ്റിൽ രണ്ട് മുതിർന്നവർക്ക് സുഖകരമായി ഇരിക്കാം. മൂന്നാമതൊരാളെകൂടി ഇരുത്തണമെങ്കിൽ മറ്റു യാത്രക്കാർ കാര്യമായി ഒതുങ്ങിക്കൊടുക്കണം. ഇന്‍റീരിയർ നിലവാരം ആൾട്ടോയെക്കാൾ മെച്ചമാണ്. ഇക്കാര്യത്തിൽ ഏറ്റവും മികവുള്ളത് ഹ്യുണ്ടായി ഇയോണിനാണ്.

വലിയ അനലോഗ് സ്പീഡോമീറ്ററും ചെറിയൊരു ഡിജിറ്റൽ ഡിസ്പ്ലേയും പിന്നെ സ്ഥിരം ഇൻഡിക്കേറ്ററുകളും അടങ്ങന്നതാണ് ഇൻസ്ട്രമെന്‍റ് ക്ലസ്റ്റർ . ടാക്കോ മീറ്റർ, ഓഡോ മീറ്റർ, ഫ്യുവൽ ലെവൽ ഇൻഡിക്കേറ്റർ, ശരാശരി മൈലേജ്, ടാങ്കിലെ ഇന്ധനം ഉപയോഗിച്ച് ഓടാവുന്ന ദൂരം, ഗീയർഷിഫ്ട് ഇൻഡിക്കേറ്റർ എന്നിങ്ങനെ ഒരുപാട് വിവരങ്ങൾ ചെറിയ ഡിജിറ്റൽ ഡിസ്പ്ലേയിൽ ഉൾക്കൊള്ളിച്ചിട്ടുണ്ട്.


ലഗേജ് സ്പേസിന്‍റെ കാര്യത്തിൽ ക്വിഡാണ് ഒന്നാം സ്ഥാനത്ത്. രണ്ടാം സ്ഥാനം റെഡിഗോയ്ക്കുണ്ട്, 222 ലിറ്റർ. നാല് പേരുടെ ലഗേജ് വയ്ക്കാൻ ഇത് ധാരാളം മതി. സുരക്ഷയുടെ കാര്യത്തിൽ കൂടുതലൊന്നും റെഡിഗോയും നൽകുന്നില്ല, ഈ വിഭാഗത്തിൽപെട്ട മറ്റു മോഡലുകളെപ്പോലെ ഡ്രൈവർ എയർബാഗ് മാത്രമുണ്ട്. എബിഎസ് ഇല്ല.

എൻജിൻ ഡ്രൈവ്

റെനോ ക്വിഡിൽ ഉപയോഗിക്കുന്ന 999 സിസി, മൂന്ന് സിലിണ്ടർ പെട്രോൾ എൻജിനാണ് റെഡിഗോയുടെ ബോണറ്റിനടിയിലുമുള്ളത്. 67 ബിഎച്ച്പി91 എൻഎം ആണ് എൻജിൻ ശേഷി. റെഡിഗോയുടെ 800 സിസി എൻജിനെ അപേക്ഷിച്ച് 13 ബിഎച്ച്പി19 എൻഎം അധികം. അഞ്ച് സ്പീഡ് മാന്വൽ ഗീയർബോക്സാണിതിന്. ലിറ്ററിന് 22.50 കിലോമീറ്റർ മൈലേജ് കന്പനി വാഗ്ദാനം ചെയ്യുന്നു.

ഇനി റെഡിഗോ സ്റ്റാർട്ട് ചെയ്ത് നോക്കാം. 800 സിസി എൻജിനെ അപേക്ഷിച്ച് ഐഡ്ലിംഗിൽ വിറയൽ കുറവുണ്ട്. ക്വിഡിലേതുപോലെ ഫസ്റ്റ് ഗീയറിനു സമീപത്താണ് റിവേഴ്സ് ഗീയർ . ഗീയർനോബിനു താഴെയുള്ള വലയം വലിച്ചുയർത്തി പിടിച്ച് വേണം റിവേഴ്സ് ഗീയർ ഇടാൻ. കുറഞ്ഞ ആർപിഎമ്മിൽ കൂടുതൽ ടോർക്ക് ലഭിക്കുന്നതിനാൽ ഗീയർ മാറ്റം കുറവ് മതി. മണിക്കൂറിൽ 40 കിമീ വേഗത്തിൽ നാലാം ഗീയറിൽ കൊണ്ടുനടക്കാം. സെക്കൻഡ് ഗീയറിൽ തന്നെ കയറ്റം വലിക്കുന്നുണ്ട്. 185 മില്ലിമീറ്റർ എന്ന ഉയർന്ന ഗ്രൗണ്ട് ക്ലിയറൻസ് മഴക്കാലത്ത് പൊട്ടിപ്പൊളിഞ്ഞ റോഡുകളിലൂടെയുള്ള യാത്രയ്ക്ക് അനുകൂലഘടകമാണ്.

അവസാനവാക്ക്

വിലക്കുറവുള്ള ചെറിയ കാർ നോക്കുന്നവർക്ക് പരിഗണിക്കാവുന്ന നല്ല മോഡൽ. പൊക്കമുള്ളവരെയും റെഡിഗോ തൃപ്തിപ്പെടുത്തും. കരുത്ത് കുറവാണെന്ന പരാതി ഒരു ലിറ്റർ എൻജിനുള്ള ഡാറ്റ്സണ്‍ പരിഹരിക്കുന്നു. ടച്ച് സ്ക്രീൻ ഇൻഫോടെയ്ൻമെന്‍റ് പോലുള്ള നിലവാരം കൂടിയ ഫീച്ചറുകൾ വേണ്ടവർ ക്വിഡ് പരിഗണിക്കുക.

വില

ക്വിഡിനെ അപേക്ഷിച്ച് 42,000 രൂപയോളം കുറവാണ് റെഡിഗോയുടെ വില. സമാന 800 സിസി റെഡിഗോ വകഭേദത്തെക്കാൾ 23,000 രൂപ അധികം കൊടുത്താൽ മതി, ഒരു ലിറ്റർ എൻജിനുള്ള റെഡിഗോയ്ക്ക്. കൊച്ചി എക്സ്ഷോറൂം വിലയും ഫീച്ചറുകളും
ടി ഓപ്ഷൻ 3.70 ലക്ഷം രൂപ

എസി, പവർ സ്റ്റിയരിംഗ്, ഡിജിറ്റൽ ടാക്കോ മീറ്റർ, പവർ വിൻഡോ, മൾട്ടി ഇൻഫർമേഷൻ ഡിസ്പ്ലേ, സെൻട്രൽ ലോക്കിംഗ്, റിമോട്ട് കീ, സിഡി പ്ലേയർ, ആന്‍റിന, ഇമ്മൊബിലൈസർ എന്നിവ പ്രധാന ഫീച്ചറുകൾ .

എസ് 3.85 ലക്ഷം രൂപ
ഡേ ടൈം റണ്ണിംഗ് ലാംപുകൾ, ഡ്രൈവർ എയർബാഗ് എന്നീ ഫീച്ചറുകൾ ഇതിന് അധികമായുണ്ട്.

ടെസ്റ്റ് ഡ്രൈവ് വാഹനത്തിന് കടപ്പാട് : ഇവിഎം ഓട്ടോമോട്ടീവ് ഇന്ത്യ, തെള്ളകം പി.ഒ, കോട്ടയം.
ഫോണ്‍ : 81118 80755, 04813240111.

ഐപ് കുര്യൻ