നോക്കിയയുടെ പുത്തൻ മോഡലുകളുമായി വിപണിയിൽ സാന്നിധ്യമുറപ്പിക്കാൻ എച്ച്എംഡി ഗ്ലോബൽ ഒരുങ്ങുന്നു.
മൂന്നു സ്മാർട്ട്ഫോണുകളും ഒരു ഫീച്ചർഫോണും ഏപ്രില് നാലിനു അവതരിപ്പിക്കുമെന്നാണ് റിപ്പോർട്ടുകൾ. നോക്കിയ 7 പ്ലസ്, നോക്കിയ 6 (2018), പുത്തൻ ഫ്ളാഗ്ഷിപ് മോഡലായ നോക്കിയ 8 സിറോക്കോ എന്നിവയും ഫീച്ചർ ഫോണായ നോക്കിയ 8110യുമാണ് നാളെ ഇന്ത്യൻ വിപണിയിൽ എത്തുന്നത്.
നോക്കിയ ആരാധകർ ഏറെ പ്രതീക്ഷയോടെ കാത്തിരിക്കുന്ന മോഡലാണ് നോക്കിയ 7 പ്ലസ്. ആമസോണ് എക്സ്ക്ലൂസിവ് ആയി എത്തുമെന്നു പ്രതീക്ഷിക്കുന്ന ഈ മോഡലിന് 20,000 മുതൽ 25,000 രൂപവരെയാകും വില.
മികച്ച ഫീച്ചറുകളാണ് നോക്കിയ 7 പ്ലസിന്റെ ആകർഷണം. മെറ്റൽ യൂണിബോഡി ഡിസൈനിൽ എത്തുന്ന ഫോണിന് 6 ഇഞ്ച് ഐപിഎസ് എൽസിഡി ഡിസ്പ്ലേ (ഫുൾ എച്ച്ഡി, 18:9 റേഷ്യോ, കോർണിംഗ് ഗോറില്ല ഗ്ലാസ് 3) ആയിരിക്കും.
ക്വാൽകോം സ്നാപ്ഡ്രാഗണ് 660 ചിപ്സെറ്റ് (ഒക്ടാകോർ, 2.2 ജിഗാഹെർട്സ്), 4 ജിബി റാം, 64 ജിബി മെമ്മറി (കാർഡ് വഴി 256 ജിബി വരെ), 12 എംപി പ്ലസ് 13 എംപി ഡ്യുവൽ കാമറ, 2എക്സ് ഒപ്ടിക്കൽ സൂം, 30 എഫ്പിഎസ് 4കെ വീഡിയോ, 16 എംപി സെൽഫി കാമറ, 3800 എംഎഎച്ച് ബാറ്ററി, ആൻഡ്രോയ്ഡ് 8.0 ഓറിയോ തുടങ്ങിയ ഫീച്ചറുകളും ഫോണിലുണ്ടാകും.
അടുത്തയിടെ വിപണിയിലെത്തിയ വിവോ വി9, ഒപ്പോ എഫ്7 , മോട്ടോ എക്സ്4 തുടങ്ങിയ മോഡലുകളിൽനിന്ന് നോക്കിയ 7 പ്ലസിന് കടുത്ത മത്സരമാണ് നേരിടേണ്ടിവരിക.