മരണത്തിനു പിന്നിലെ അവ്യക്‌തതകൾ
ഞെട്ടിക്കുന്ന വാർത്തകളാണല്ലോ ഇന്നു ലോകത്തു നടമാടിക്കൊണ്ടിരിക്കുന്നത്. ചിലപ്പോൾ ആ ഞെട്ടൽ പടർന്നു പന്തലിക്കുകയും ചെയ്യാറുണ്ട്. അതു സമൂഹത്തിൽ പ്രശസ്തരായവരെക്കുറിച്ചാണെങ്കിൽ പിന്നെ പറയാനുമില്ല. അത്തരം വാർത്തകളിലേക്കിതാ അവ്യക്‌തമായ മറ്റൊരു വാർത്തകൂടി.

ഇതു നിസാര വ്യക്‌തിയോ, നമ്മുടെ നാട്ടുകാരിയോ അല്ല. മുൻ ഉസ്ബെക്കിസ്‌ഥാൻ പ്രസിഡന്റും കോടീശ്വരനുമായിരുന്ന ഇസ്ലാം കരിമോവിന്റെ മൂത്തമകൾ ഗുൽനാറ കരിമോവിനെക്കുറിച്ചാണ് വാർത്ത പ്രചരിക്കുന്നത്. തന്റെ പിതാവിനെപ്പോലെ തന്നെ സാമ്പത്തികമായി മുൻപന്തിയിൽ തന്നെയായിരുന്നു ഗുൽനാറ കരിമോവയും. ഉസ്ബെക്കിസ്‌ഥാനിലെ ഒരു വലിയ കോടീശ്വരി തന്നെയായിരുന്നു ഇവർ.

നവംബർ അഞ്ചിന് ഈ 44 വയസുകാരി വിഷം ഉളളിൽ ചെന്നു മരിച്ചെന്ന ഞെട്ടിക്കുന്ന വാർത്തയാണു പുറത്തുവന്നിരിക്കുന്നത്. സെൻട്രൽ ഏഷ്യൻ ന്യൂസാണ് ഈ വാർത്ത ലോകത്തെ അറിച്ചത്. എത്രത്തോളം വിശ്വസനീയമാണ് ഈ വാർത്ത എന്നതാണ് ഇപ്പോൾ ഗൗരവമായി നിലനിൽക്കുന്നത്. ഇവർ എവിടെയാണെന്നോ എന്തു ചെയ്യുന്നുവെന്നോ കൃത്യമായ വിവരങ്ങളില്ല. അതിനാൽ തന്നെ ഇത്തരത്തിലുളള വാർത്തയുടെ പ്രാധാന്യം സമൂഹമാധ്യത്തിൽ വലിയ സ്വാധീനമാണ് ചെലുത്തിയിരിക്കുന്നത്. ഗുൽനാറ മരിച്ചതായും അവരുടെ സംസ്കാര ചടങ്ങുകൾക്കു ശേഷം ശവകുടീരം നിർമിക്കാതിരിക്കാൻ അവിടം ഇടിച്ചു നിരപ്പാക്കിയെന്നുമുളള അതിശക്‌തമായ വാർത്തകളാണ് ചാനൽ പുറത്തുവിട്ടിരിക്കുന്നത.് ഇവരുടെ സംസ്കാരചടങ്ങുകളിൽ പങ്കെടുത്ത ഒരാളെ ഉദ്ധരിച്ചാണ് വാർത്ത പുറത്തുവിട്ടിരിക്കുന്നതെന്നാണ് ചാനലിന്റെ വാദം. ഏതു വാർത്തയും പോലെ തന്നെ ഉസ്ബെക്കിസ്‌ഥാനെയും ഈ സംഭവം പിടിച്ചു കുലുക്കിയിരിക്കുകയാണ്.

ഗുൽനാറയെ അഴിമതിയുടെ പേരിൽ 2013 മുതൽ വീട്ടുതടങ്കലിൽ പാർപ്പിച്ചിരിക്കുകയാണെന്നും ഇത് തികച്ചും അനൗദ്യോഗികമായ നടപടിയായിരുന്നെന്നും പല മാധ്യമങ്ങളും വ്യക്‌തമാക്കിയിരുന്നു. എന്നാൽ ഇതു രാഷ്ട്രിയപ്രേരിതമാണെന്നും ഇവരെ തകർക്കുവാനുളള ലക്ഷ്യമാണ് ഇതിനു പിന്നിലെന്നും ഗുൽനാറയുമായി ബന്ധപ്പെട്ട വൃത്തങ്ങൾ സൂചിപ്പിക്കുന്നു. കുറച്ചു മാസങ്ങൾക്കു മുമ്പ് മാനസികാരോഗ്യ ആശുപത്രിയിൽ കഴിയുകയായിരുന്നു, ഇസ്രയേലിൽ ഒളിച്ചു താമസിക്കുകയാണ് തുടങ്ങിയ വാർത്തകളും പുറത്തുവന്നിരുന്നു. ഇവരുടെ മരണവാർത്തയെക്കുറിച്ച് ഉസ്ബെക്ക് അധികൃതർ വ്യക്‌തമായ പരാമർശങ്ങളൊന്നും ഇതുവരെ നടത്തിയിട്ടില്ല.



1972 ജൂലൈ എട്ടിന് റഷ്യയിലെ ഫെർഗാന എന്ന സ്‌ഥലത്തായിരുന്നു ഗുൽനാറ കരിമോവിന്റെ ജനനം. ഉസ്ബെക്കിസ്താൻ പ്രസിഡന്റായിരുന്ന ഇസ്ലാം കരിമോവിന്റെയും ടാറ്റിയാന കരിമോവിന്റെയും മൂത്തമകളായിരുന്നു ഗുൽനാറ. നടാലിയ പെട്രോണ കുച്മിയായിരുന്നു ഇസ്ലാമിന്റെ ആദ്യ ഭാര്യ. ഇതിൽ പീറ്റർ എന്ന മകനുണ്ട്. ഇവരുമായുളള വിവാഹമോചനത്തിനു ശേഷം 1967ൽ ഇസ്ലാം ടാറ്റിയാനയെ വിവാഹം കഴിച്ചു. ഇതിൽ ഗുൽനാറയും ലോലയുമാണ് മക്കൾ. ഇസ്ലാം കരിമോവ് മസ്തിഷ്ക സംബന്ധമായ രോഗത്തിന്റെ പിടിയിൽ അകപ്പെട്ട് ഈ വർഷം സെപ്റ്റംബർ രണ്ടിനായിരുന്നു മരണമടഞ്ഞത്.

കുറഞ്ഞ സമയത്തിനുളളിൽ എല്ലാ മേഖലകളിലും തന്നെ തന്റേതായ വ്യക്‌തിമുദ്രപതിപ്പിക്കാൻ ഗുൽനാറയ്ക്ക് സാധിച്ചു. പ്രതാപകാലത്ത് സാമ്പത്തിക–സാമൂഹിക–കലാമേഖലകളിലെല്ലാം തന്റേതായ സാനിധ്യ മറിയിച്ച താരമായിരുന്നു ഇവർ. 1988ൽ താഷ്കന്റിലെ യൂത്ത് മാത്തമാറ്റിക്സ് അക്കാദമിയിൽ നിന്നു ബിരുദം നേടി. 1989 മുതൽ 1994 വരെയുളള കാലഘട്ടത്തിൽ താഷ്കന്റ് സംസ്‌ഥാന യൂണിവേഴ്സിറ്റിയിൽ നിന്നു ഇന്റർനാഷണൽ എക്കണോമിക്സിൽ ബിരുദം നേടി.


കൂടാതെ 1992ൽ നൃൂയോർക്കിലെ ഫാഷൻ ഇൻസ്റ്റിറ്റ്യൂട്ടിൽ നിന്നു ആഭരണ നിർമാണ പഠനവും പൂർത്തിയാക്കി. 1998, 2000–2003 തുടങ്ങിയ കാലഘട്ടങ്ങളിൽ ഉസ്ബെക്കിസ്‌ഥാനു വേണ്ടി നൃൂയോർക്കിൽ ഉപദേഷ്‌ടാവായി സേവനം അനുഷ്ഠിച്ചിരുന്നു. തുടർന്ന് ഉസ്ബെക്കിസ്‌ഥാൻ എംബസിയുടെ ഉപദേഷ്‌ടാവും വിദേശകാര്യ സെക്രട്ടറിയായും 2003–2008 വർഷങ്ങളിൽ ഇവർ പ്രവർത്തിച്ചിട്ടുണ്ട്. 2010 ജനുവരിയിൽ ഉസ്ബെക്കിസ്‌ഥാൻ സ്‌ഥാനപതിയായി സ്പെയിനിലും സേവനമനുഷ്ഠിച്ചു.

ഹാർവാഡ് യൂണിവേഴ്സിറ്റിയിൽ നിന്നു ബിരുദാനന്തരബിരുദം നേടിയ ഇവർ നിരവധി ധർമാശ്രമങ്ങൾ വഴിയായി സാമൂഹ്യപ്രവർത്തനങ്ങളിലും കർമനിരതയായിരുന്നു. പൊതുവായ വികസനം, സ്ത്രീകളുടെ ക്ഷേമം, രോഗനിവാരണ പ്രവർത്തനങ്ങൾ പ്രത്യേകിച്ചും കാൻസർ ബാധിതർക്കു വേണ്ടിയുളള പദ്ധതികൾ തുടങ്ങിയവയിൽ ഇവർ പ്രത്യേകം ശ്രദ്ധപതിപ്പിച്ചിരുന്നു. കൂടാതെ കുട്ടികളിലെ കലാവാസനകൾ വളർത്തുന്നതിനും അവർക്ക് ആവശ്യമായ സഹായങ്ങൾ ചെയ്യാനും ഗുൽനാറ മുൻകൈയെടുത്തിരുന്നു. ഇത്തരം പ്രവർത്തനങ്ങളിലൂടെ ലോകത്തിന്റെ മുൻനിരയിലേക്ക് നിരവധിപ്പേരാണ് എത്തിച്ചേർന്നത്. ഉസ്ബെക്കിസ്‌ഥാനിലെ രാഷ്ട്രീയ വളർച്ചയ്ക്ക് അർപ്പണ ബോധത്തോടെയായിരുന്നു ഇവരുടെ പ്രവർത്തനം. എല്ലാ മേഖലകൾക്കും ആവശ്യത്തിനുളള പരിഗണന ഇവർ നൽകിയിരുന്നു. 2006ൽ ആയിരുന്നു ഗുൽനാറ കരിമോവ് തന്റെ ആദ്യത്തെ മ്യൂസിക്കൽ ആൽബം പുറത്തിറക്കിയത്. തനിക്ക് കിട്ടിയ തനതായ വാസനയിലൂടെ തന്നെ ആൽബത്തിൽ ഇവർ ഗാനം ആലപിച്ചു. ഇതിനു ശേഷം ഉസ്ബെക്കിസ്‌ഥാനിലുളള ഇവരുടെ ജനപ്രീതി വർദ്ധിച്ചു. ഇതിനൊപ്പം തന്നെ മോഡലിംഗും ആഭരണ നിർമണത്തിലെ വൈഭവവും കാത്തുപരിപാലിക്കുവാൻ ഇവർക്കു സാധിച്ചു.

ബിരുദവും ബിരുദാനന്തര ബിരുദവും അവാർഡുകളും വാരിക്കൂട്ടിയ ഇവർ ബിസിനസ് മേഖലയിലും മികച്ച പ്രകടനമായിരുന്നു കാഴ്ചവച്ചത്. തൊട്ടതിനെ മുഴുവൻ പൊന്നാക്കിക്കൊണ്ടായിരുന്നു ബിസിനസിലെ ഗുൽനാറയുടെ വളർച്ച. ജൂഡോ ബ്ലാക്ക് ബെൽറ്റായ ഇവർ വിദേശ നയതന്ത്രജ്‌ഞ, സാമൂഹ്യ പ്രവർത്തക, ഫാഷൻ ഡിസൈനർ, മോഡൽ, പോപ്പ് സ്റ്റാർ തുടങ്ങിയ മേഖലകളിലും കഴിവു തെളിയിച്ചിട്ടുണ്ട്.

1991ൽ മൻസൂർ മസൂദിയുമായി ഗുൽനാറയുടെ വിവാഹം നടന്നു. അമേരിക്കൻ ബിസിനസുകാരനായ ഇദ്ദേഹം അഫ്ഗാനിസ്‌ഥാൻ–ഉസ്ബെക്ക് സ്വദേശിയായിരുന്നു. 1992ൽ ഇവർക്ക് ഇസ്ലാം എന്ന മകനും 1998ൽ ഇമൻ എന്ന മകളുമുണ്ടായി.

2001ഓടെ വിവാഹബന്ധത്തിൽ പാളിച്ചകൾ അനുഭവപ്പെട്ടതോടെ ഗുൽനാറ തന്റെ മക്കളുമായി അമേരിക്ക വിട്ട് ഉസ്ബേക്കിസ്‌ഥാനിലേക്കു മാറി താമസിച്ചു. തുടർന്ന് വിവാഹ മോചനവും നേടി. മറ്റു മേഖലകളിൽ കൈവരിച്ച വിജയം ഇവർക്ക് വിവാഹ ജീവിതത്തിൽ നേടാനായില്ല. എന്നാൽ മരണത്തിന്റെ കാര്യത്തിലും വ്യക്‌തതയില്ലാത്ത കഥകളാണ് ഇവരുടെ പേരിൽ പ്രചരിക്കുന്നത്.