ചൂഷണരഹിതമാകണം ശിശുക്ഷേമം–4
ദത്തെടുക്കൽ ഏജൻസികളിൽ മതിയായ കുട്ടികളെ ലഭ്യമല്ലാത്തത് ദത്തെടുക്കാൻ ആഗ്രഹിക്കുന്ന ദമ്പതികളെ നിരാശരാക്കുന്നു. അതുകൊണ്ടുതന്നെ ദത്തടുക്കുന്നതിനുള്ള അപേക്ഷകൾ സ്വീകരിക്കാൻ ഇന്ത്യയിൽ പലയിടങ്ങളിലും സെൻട്രൽ അഡോപ്ഷൻ റിസോഴ്സ് അഥോറിറ്റി ഏജൻസി കാലതാമസമെടുക്കുന്നു. മതിയായ കുട്ടികളില്ലെന്നാണ് ഇതിനുകാരണമായി ഏജൻസി പറയുന്നത്. ഈവർഷം 600 ഓളം കുട്ടികളെയാണ് ദത്തെടുക്കാൻ അപേക്ഷ ലഭിച്ചത്. എന്നാൽ ദത്തിലൂടെ കൈമാറാൻ അർഹതയുള്ള കുട്ടികൾ 120 മാത്രമാണുള്ളത്.

മക്കൾ വിദേശത്തുള്ള പ്രായമായ മാതാപിതാക്കൾ തങ്ങളെ സംരക്ഷിക്കാനും കരുതലിനുമായി കുട്ടികളെ ദത്തെടുക്കാനായി താത്പര്യം പ്രകടിപ്പിക്കുന്നു. സ്വന്തമായ ഒരു കുഞ്ഞുള്ളപ്പോൾ മറ്റൊരു കുട്ടിയെ ദത്തെടുക്കാൻ തയാറാവുന്നവരെയും ഇപ്പോൾ കാണാം. ദത്തെടുക്കൽ നടപടിക്രമങ്ങളിലെ നൂലാമാലകൾ കാരണം ദത്തെടുക്കുന്നവരുടെ എണ്ണം കുറവായിരുന്നു. ഈ വർഷം സെപ്റ്റംബർ വരെയുള്ള കണക്കിൽ 78 കുട്ടികളെയാണ് ദത്തെടുത്തിരിക്കുന്നത്. 30 പെൺകുട്ടികളെയും 38 ആൺകുട്ടികളെയും ദത്ത് കൈമാറി. സംസ്‌ഥാനത്തിന്റെ പുറത്തേക്ക് 10 കുട്ടികളെയാണ് ദത്ത് നൽകിയിരിക്കുന്നത്. 2015 ഓഗസ്റ്റ് മുതൽ ദത്തെടുക്കൽ അപേക്ഷ ഓൺലൈനിൽ വഴിയാക്കിയതോടെ അപേക്ഷകരുടെ എണ്ണം വർധിച്ചിട്ടുണ്ട്.



കഴിഞ്ഞ വർഷം 148 കുഞ്ഞുങ്ങളെയാണു ദത്തെടുത്തിട്ടുള്ളത്. രാജ്യത്തിനകത്ത് 63 ആൺകുഞ്ഞുങ്ങളേയും 70 പെൺകുഞ്ഞുങ്ങളേയും ദത്തെടുത്തപ്പോൾ രാജ്യത്തിനു പുറത്തേക്കുകൊണ്ടുപോയത് രണ്ട് ആൺകുഞ്ഞുങ്ങളേയും 13 പെൺകുഞ്ഞുങ്ങളേയുമാണ്. 2014ൽ 183, 2013ൽ 199, 2012ൽ 207 എന്നിങ്ങനെയാണ് ദത്തെടുക്കൽ റിപ്പോർട്ട് ചെയ്തത്.നിയമം ലംഘിച്ച് നടത്തുന്ന അനധികൃത ദത്തെടുക്കലും തകൃതിയായി നടക്കുന്നുണ്ട്. നിയമത്തിന്റെ വഴിയിലൂടെയുള്ള ദത്തെടുക്കൽ ഒരുഭാഗത്ത് കുറഞ്ഞുവരുമ്പോൾ മറ്റൊരുഭാഗത്ത് അനധികൃതദത്ത് ഇടപാട് തഴച്ചുവളരുന്നുണ്ട്.

ആശുപത്രികളിൽ മാത്രമല്ല, വീടുകളിലും ആരുമറിയാതെ കുട്ടികളെ പണത്തിനായി കൈമാറുന്നുണ്ടെന്നാണ് ശിശുക്ഷേമപ്രവർത്തകർ സാക്ഷ്യപ്പെടുത്തുന്നത്. എല്ലാ അനാഥകുട്ടികൾക്കും ഒരു ഫാമിലി ആവിശ്യമാണ്. അവരുടെ സുരക്ഷിതത്വം, സന്തോഷകരമായ ജീവിതം എന്നിവയ്ക്ക് ചൂഷണരഹിതമായ ദത്തെടുക്കൽ സംവിധാനം കാര്യക്ഷമമാക്കണം. കുട്ടികളുടെ സുരക്ഷിതത്വമാണ് അവരുടെ ഏതു ക്ഷേമപ്രവൃത്തികളുടെയും അടിസ്‌ഥാനമായി ഭരണകൂടം കാണുന്നത്. കുട്ടികളുടെ സംരക്ഷണം സമൂഹത്തിന്റെ കടമയാണ്. കുടുംബങ്ങൾ കുറച്ചുസമയം അവർക്കായി നീക്കിവച്ചാൽ വരും തലമുറകൾക്കായിരിക്കും അതിന്റെ പ്രയോജനം. അനാഥത്വമാണ് ഏറ്റവും വലിയ ദുരന്തമെന്നു പറഞ്ഞത് അഗതികളുടെ അമ്മയായ മദർ തെരേസയായിരുന്നു. ഭക്ഷണവും സംരക്ഷണവും മാത്രം നൽകിയാൽ പരിഹരിക്കാവുന്നതല്ല അനാഥരുടെ പ്രശ്നം.


അപര്യാപ്തതകളുടെ നടുവിൽ

അനാഥത്വത്തിന്റെ ഇരുട്ടിൽ കഴിഞ്ഞിരുന്ന പെൺകുട്ടി ബാലമന്ദിരത്തിലെ ജീവനക്കാരൻ ലൈംഗികചൂഷണത്തിനായി ഇരയാക്കിയപ്പോൾ അവിടുന്നു ഒളിച്ചോടിയതാണ്. എന്നാൽ എങ്ങോട്ടുപോകുമെന്നറിയാതെ പാലക്കാട് റെയിൽവേ സ്റ്റേഷനിൽ നിൽക്കുമ്പോഴാണ് വീട്ടുജോലിക്കാരെ നൽകുന്ന ഏജന്റിന്റെ കണ്ണിൽപ്പെടുന്നത്. അങ്ങനെ കുറെക്കാലം വീടുകളിൽ ജോലിക്കു മാറി മാറി നിന്നു. തുച്ഛമായ കൂലിയിലും ദേഹോപദ്രവത്തിലും ലൈംഗിക ചൂഷണശ്രമത്തിന്റെയും നടുവിലായിരുന്നു ജീവിതം. വീട്ടുജോലിക്കിടെ ഉടമയുടെ ലൈംഗിക അതിക്രമത്തിനു പോലീസിൽ പരാതിപ്പെട്ടെങ്കിലും പഴുതുകളിൽ അയാൾ ജാമ്യമെടുത്തു. വീണ്ടുമെത്തി ഭീഷണിപ്പെടുത്തി. തിരിച്ചു ബാലമന്ദിരത്തിൽ തന്നെ പോകാൻ ഭയം. അരക്ഷിതാവസ്ഥയുടെ നാളുകൾ. പെൺകുട്ടികൾക്കായുള്ള സർക്കാർ ചിൽഡ്രൻസ് ഹോമുകളുടെ അപര്യാപത്്തകൾ തെരുവിലിറങ്ങേണ്ടി വരുന്ന ഇതുപോലെയുള്ള പെൺകുട്ടികളുടെ ജീവിതം ചോദ്യചിഹ്നമാക്കുന്നു.



സംസ്‌ഥാനത്ത് തന്നെ രണ്ടെണ്ണം മാത്രമാണ് പെൺകുട്ടികൾക്കായുള്ള സർക്കാർ ചിൽഡ്രൻസ് ഹോമുകളുള്ളത്. കോഴിക്കോടും എറണാകുളത്തും. അതിക്രമങ്ങൾക്കിരയായ കുട്ടികളെ രക്ഷപ്പെടുത്തിയാൽ കേസ് തീരുംവരെയെങ്കിലും താമസിപ്പിക്കാൻ കുട്ടികൾ ഏറ്റവും കൂടുതലുള്ള മലപ്പുറം ജില്ലയിൽ പോലും സുരക്ഷിതകേന്ദ്രമില്ല. ലൈംഗികഅതിക്രമങ്ങളിൽപ്പെടുന്ന പെൺകുട്ടികളെ താമസിപ്പിക്കാൻ ഇടമില്ലാതെ വരുന്നത് ഗുരുതരപ്രതിസന്ധിയാണ് ഉണ്ടാക്കുന്നത്. വീട്ടിൽ വച്ച് ലൈംഗികഅതിക്രമങ്ങൾക്ക് ഇരയായ കുട്ടികളെ സംരക്ഷണ കേന്ദ്രത്തിൽ ഇടമില്ലാതെ തുടർന്നു വീട്ടിലേക്ക് തന്നെ തിരിച്ചയച്ച സംഭവങ്ങളുമുണ്ട്. കേസിലെ പ്രതികൾ ബന്ധുക്കൾ തന്നെയായാൽ കുട്ടികളെ സമ്മർദത്തിനാക്കാൻ ഇടയുണ്ട്. ജില്ലയിൽ പെൺകുട്ടികൾക്കായി ആകെയുള്ള നിർഭയഹോമിൽ സൗകര്യം 25 പേർക്കാണ്. എന്നാൽ പലപ്പോഴും താമസിപ്പിക്കുന്നത് 40 ധികം പേരെയാണ്. പിന്നെയുള്ളതു കോഴിക്കോട് വെള്ളിമാടുകുന്നിലെ കേന്ദ്രമാണ്.

കാക്കനാട് ചിൽഡ്രൻഹോമിൽ അനുവദിച്ചതിലധികം പേർ താമസിക്കുന്നുണ്ടെന്നു പരാതി വന്നിരുന്നു. തനിക്ക് പഠിക്കാനാവുന്നില്ലെന്നും കാണിച്ച് പീഡനക്കേസിലെ പെൺകുട്ടി തന്നെ ഹൈക്കോടതി ചീഫ് ജസ്റ്റിസിന് കത്തയച്ചിരുന്നു. പെൺകുട്ടികൾക്കു നേരെയുള്ള അതിക്രമങ്ങൾ കേരളത്തിൽ കൂടിവരുന്നതിന്റെ കണക്കുകൾ പ്രകാരം സംസ്‌ഥാനത്ത് കുട്ടികൾ ഒട്ടും സുരക്ഷിതരല്ല എന്നാണ് തെളിയിക്കുന്നതാണ്.

(തുടരും..)

രഞ്ജിത് ജോൺ