നോന്പിന്‍റെ ആത്മാവ് നഷ്ടപ്പെടുത്തരുത്

ആത്മശുദ്ധീകരണത്തിനും ഹൃദയവിമലീകരണത്തിനും വഴിതുറക്കുന്ന മഹത്തായ ഒരു ആരാധനയാണ് നോന്പ്. ഇത് വിശ്വാസികളുടെ വിധേയത്വബോധം വളർത്തുകയും ദൈവസാമീപ്യം ശക്തമാക്കുകയും ചെയ്യും. നോന്പിലൂടെ സ്വർഗപ്രവേശം എളുപ്പമാകുന്നതാണ്. പക്ഷെ നോന്പിന്‍റെ ആത്മാവ് നഷ്ടപ്പെടാതിരിക്കാൻ ബദ്ധശ്രദ്ധനാവേണ്ടതുണ്ട്.

ദൈവഭക്തിയിലൂടെ മാത്രമേ ആത്മസംസ്കരണം സാധ്യമാവുകയുള്ളൂ. മനസും ശരീരവും പാകപ്പെടുന്നതുപോലെ ഉള്ളവനും ഇല്ലാത്തവനും തമ്മിലുള്ള അന്തരവും വ്യക്തമാകും. പട്ടിണിപ്പാവങ്ങളെയും അർധപട്ടിണിക്കാരെയും സ്വന്തം തൊഴിൽ ശാലകളിലെ ജീവനക്കാരെയും സഹായിക്കാനും സമാശ്വസിപ്പിക്കാനും നോന്പ് ഹേതുവാകണം. നാവിനെയും, കണ്ണിനെയും, ലൈംഗിക തൃഷ്ണകളെയും സൂക്ഷിക്കണം. സർവോപരി അഹങ്കാരം, അസൂയ, പരദൂഷണം, ഏഷണി, കളവ് തുടങ്ങിയ ദുർവിചാരങ്ങളെയെല്ലാം നിയന്ത്രിക്കുന്നവനു മാത്രമേ നോന്പിന്‍റെ ആത്മാവും മൂല്യവും സംരക്ഷിക്കാനും മുറുകെ പിടിക്കാനും സാധ്യമാവുകയുള്ളു. അല്ലാത്തവൻ വെറുതെ പട്ടിണികിടക്കുക മാത്രമേ ഉണ്ടാവുകയുള്ളു.

നോന്പുകാരൻ പള്ളിയിൽ പോയി ജമാ അത്ത് നിസ്കാരങ്ങളിൽ പങ്കെടുക്കണം. പ്രവാചകൻ മുഹമ്മദ് നബിയും അനുചരന്മാരും ഇക്കാര്യത്തിൽ വലിയ നിഷ്കർഷ പുലർത്തിപ്പോന്നിരുന്നു. വിശുദ്ധ ഗ്രന്ഥമായ ഖുർആൻ അവതരിച്ച മാസം കൂടിയാണ് റംസാൻ. മസ്ജിദുകളിലും വീടുകളിലും ഖുർആൻ പാരായണം പതിവാക്കുകയും ആവർത്തിക്കുകയും വേണം. ദൈവവചനം ഓതിക്കേൾക്കുന്പോൾ തിരുനബി (സ) വികാരതരളിതനാകുകയും അവിടുത്തെ കണ്ണുകൾ നിറയുകയും ചെയ്യുമായിരുന്നു. ഓരോ മനുഷ്യരുടെയും ഉത്തരവാദിത്വങ്ങളാണ് തിരുവചനങ്ങളിലുള്ളത്.

ബന്ധുക്കളോടും അയൽക്കാരോടും ഒൗദാര്യം കാണിക്കാനും നന്മപുലർത്താനും ശത്രുതാ മനോഭാവം കൈവെടിയുവാനും നോന്പ് നിർദേശിക്കുന്നു. ദൈവത്തിന്‍റെ സഹായങ്ങൾക്കും അനുഗ്രഹങ്ങൾക്കും പാപമോചനവുമായി നിരന്തരം പ്രാർഥിക്കാനുള്ള അവസരമാണ് നോന്പ് മാസം. പാപങ്ങളെ കരിച്ചുകളയാനും മനുഷ്യസമൂഹത്തിനുള്ള സേവനങ്ങളിൽ ഏർപ്പെട്ടിരിക്കുന്ന രോഗികൾക്ക് സാന്ത്വനം പകരുന്നവരെ സഹായിക്കാനും ഈ മാസം നാം തെരഞ്ഞെടുക്കണം.

മുഹമ്മദ് ശരീഫ് നിസാമി (എസ്എസ്എഫ് മലപ്പുറം ജില്ലാ പ്രസിഡന്‍റ്)

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.