ഫാ. ടോം ഉഴുന്നാലിലിന്‍റെ മോചനത്തിൽ ആശ്വാസം: കർദിനാൾ മാർ ക്ലീമിസ് ബാവ

തിരുവനന്തപുരം: ഫാ. ടോം ഉഴുന്നാലിൽ മോചിതനായതിൽ സന്തോഷിക്കുന്നുവെന്ന് സിബിസിഐ പ്രസിഡന്‍റും മലങ്കര കത്തോലിക്കാസഭാ മേജർ ആർച്ച്ബിഷപ്പുമായ കർദിനാൾ മാർ ബസേലിയോസ് ക്ലീമിസ് കാതോലിക്കാബാവ.

ഫാ. ടോം ഉഴുന്നാലിലിന്‍റെ മോചനത്തിൽ ഇടപെടാനായി സിബിസിഐയുടെ നേതൃത്വത്തിൽ പ്രധാനമന്ത്രി നരേന്ദ്ര മോദിയെ ഉൾപ്പെടെ പലതവണ സമീപിച്ചിരുന്നു. കേന്ദ്രസർക്കാർ ഈ വിഷയത്തിൽ അനുഭാവപൂർവവും ക്രമാനുഗതവുമായ ഇടപെടൽ നടത്തിക്കൊണ്ടിരിക്കുകയായിരുന്നു. ആ ഇടപെടലുകൾക്കു സിബിസിഐയുടെ പേരിൽ കേന്ദ്രസർക്കാരിനോടു പ്രത്യേക നന്ദി അറിയിക്കുന്നതായി കർദിനാൾ ദീപികയോടു പറഞ്ഞു. മാധ്യമങ്ങൾ, രാഷ്‌ട്രീയ പാർട്ടികൾ, അനേകം മനുഷ്യസ്നേഹികൾ, സാമൂഹികസംഘടനാ പ്രവർത്തകർ എന്നിവർ നടത്തിയ സ്നേഹപൂർണമായ ഇടപെടലുകൾക്കും പ്രാർഥനയ്ക്കും പ്രത്യേകം നന്ദി അറിയിക്കുന്നു.

വ്യത്യസ്ത തലങ്ങളിലുള്ള കൂട്ടായ്മകൾ നടത്തിയ അനുഭാവറാലികളും നന്ദിയോടെ സ്മരിക്കുകയാണ്. ഫാ. ടോമിന്‍റെ കുടുംബാംഗങ്ങളെ സന്തോഷം അറിയിക്കുകയും അവർക്കായി പ്രാർഥിക്കുകയും ചെയ്യുന്നു. ഫ്രാൻസിസ് മാർപാപ്പയും വത്തിക്കാനും എടുത്തിട്ടുള്ള ഗുണപരമായ ഇടപെടലുകൾക്കും ഭാരതസഭയോടു കാട്ടിയ സ്നേഹത്തിനും നന്ദി അറിയിക്കുന്നു. കേരള സർക്കാരും മുഖ്യമന്ത്രിമാരും ജനപ്രതിനിധികളും നടത്തിയ ഇടപെടലുകൾക്കും നന്ദി അറിയിക്കുകയാണെന്ന് കർദിനാൾ പറഞ്ഞു.

മോചനത്തിനായി പ്രവർത്തിച്ചവർക്കു നന്ദി: ആർച്ച്ബിഷപ് ഡോ. എം. സൂസപാക്യം

തിരുവനന്തപുരം: ഫാ. ടോം ഉഴുന്നാലിലിന്‍റെ മോചനത്തിനായി പ്രവർത്തിച്ചവർക്ക് നന്ദി അറിയിക്കുന്നതായി കെസിബിസി അധ്യക്ഷനും തിരുവനന്തപുരം ലത്തീൻ അതിരൂപത ആർച്ച്ബിഷപ്പുമായ ഡോ.എം. സൂസപാക്യം. ഫാ. ടോം ഉഴുന്നാലിലിന്‍റെ മോചനത്തിനായി കേന്ദ്രസർക്കാരിന്‍റെ പ്രത്യേക താത്പര്യവും വിദേശകാര്യമന്ത്രി സുഷമാ സ്വരാജിന്‍റെ ഇടപെടലും ഉണ്ടായിരുന്നു. കേരള കത്തോലിക്കാ സഭയുടെ സന്തോഷം അറിയിക്കുന്നതായി ആർച്ച്ബിഷപ് പറഞ്ഞു.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.