നാടും വീടുമൊരുങ്ങി; ടോമച്ചനെ വരവേൽക്കാൻ

ഉഴുന്നാലിൽ കുടുംബാംഗങ്ങൾ റോസാപ്പൂക്കൾ നൽകി ഇന്നു രാത്രി എട്ടിന് ജൻമഭവനത്തിൽ അച്ചനെ സ്വീകരിക്കും. രാമപുരത്തെ ജന്മവീട്ടിൽ അന്പതിലേറെ കുടുംബാംഗങ്ങളാണ് ഒത്തുചേരുക. മാതൃ ഇടവക രാമപുരം സെന്‍റ് അഗസ്റ്റിൻസ് പള്ളിയിൽ വൈകുന്നേരം അർപ്പിക്കുന്ന കൃതജ്ഞതാ ബലിക്കും തുടർന്ന് ഇടവകയുടെ സ്വീകരണ സമ്മേളനത്തിനുംശേഷമാണ് ഫാ. ടോം ജൻമഗൃഹത്തിലെത്തുക. വീട്ടിൽ കുടുംബാംഗങ്ങൾ അച്ചനോടൊപ്പം നന്ദി പറഞ്ഞു പ്രാർഥിക്കും. ടോമച്ചനെ സലേഷ്യൻ സഭാ പ്രതിനിധികൾ അനുഗമിക്കും.അമ്മയുടെ വിയോഗവേളയിലാണ് അവസാനം ടോമച്ചൻ നാട്ടിലും വീട്ടിലുമെത്തി മടങ്ങിയത്.

ആഹ്ലാദ നിറവിൽ രാമപുരം

ചരിത്രം പള്ളിയുറങ്ങുന്ന രാമപുരം ഗ്രാമവും സെന്‍റ് അഗസ്റ്റിൻസ് ഇടവകയും ആഹ്ലാദ നിറവിലാണ്. വികാരി റവ. ഡോ. ജോർജ് ഞാറക്കുന്നേലിന്‍റെ നേതൃത്വത്തിൽ വിപുലമായ ഒരുക്കങ്ങളാണ് ഇടവകപ്പള്ളിയിൽ പൂർത്തിയാക്കിയിരിക്കുന്നത്. കൊടിതോരണങ്ങൾ, പേപ്പൽ പതാക, മുത്തുക്കുട, വാദ്യമേളം തുടങ്ങി ഒരുക്കങ്ങളുടെ തിരക്കിലാണ് ഇടവക. മാതൃദീപ്തി, മിഷൻലീഗ് അംഗങ്ങൾ വിപുലമായ തയാറെടുപ്പിലാണെന്നും ചടങ്ങിൽ നാടൊന്നാകെ പങ്കുചേരുമെന്നും വികാരി റവ. ഡോ. ജോർജ് ഞാറക്കുന്നേൽ പറഞ്ഞു.

ഞായറാഴ്ച വൈകുന്നേരം അഞ്ചിന് ഉഴുന്നാലിലച്ചൻ രാമപുരം ജംഗ്ഷനിലെത്തും. ബാല്യം മുതൽ ആത്മീയ പരിശീലനവും സ്കൂൾ പഠനവും നടത്തിയ രാമപുരത്ത് ഇന്നും ടോം അച്ചൻ അറിയുന്ന, അച്ചനെ അറിയുന്ന ദേശവാസികളാണുള്ളത്. ജാതിമത ഭേദമന്യെ നാടൊന്നാകെ സ്വീകരണത്തിൽ പങ്കുചേരും. ആറിന് സെന്‍റ് അഗസ്റ്റിൻസ് പള്ളിയിൽ മാർ ജേക്കബ് മുരിക്കന്‍റെ മുഖ്യകാർമികത്വത്തിൽ വിശുദ്ധ കുർബാന. തുടർന്ന് പാരീഷ് ഹാളിൽ നടക്കുന്ന സമ്മേളനത്തിൽ മാർ ജേക്കബ് മുരിക്കൻ, വികാരി റവ.ഡോ. ജോർജ് ഞാറക്കുന്നേൽ, റവ.ഡോ. അഗസ്റ്റിൻ കൂട്ടിയാനി, വിൻസെന്‍റ് കുരിശുംമൂട്ടിൽ, ജോണ്‍ കച്ചിറമറ്റം എന്നിവർ പ്രസംഗിക്കും. ഫാ. ടോം മറുപടിപ്രസംഗം നടത്തും.

ചൊവ്വാഴ്ച സംസ്ഥാന സർക്കാരിന്‍റെ ആദരം

ഫാ. ടോം ഉഴുന്നാലിലിന് ചൊവ്വാഴ്ച സംസ്ഥാന സർക്കാരിന്‍റെ വരവേൽപ്. തിരുവനന്തപുരത്ത് വൈകുന്നേരം അഞ്ചിന് മുഖ്യമന്ത്രി പിണറായി വിജയൻ അദ്ദേഹത്തെ സ്വകരിക്കും. മന്ത്രിസഭാഗങ്ങളും ചീഫ് സെക്രട്ടറിയും ഉൾപ്പെടെ സർക്കാരിന്‍റെ വിവിധ മേഖലകളിൽനിന്നുള്ളവരും വിരുന്നിൽ പങ്കെടുക്കും. പൊതുസമ്മേളനത്തിനൊപ്പം ക്ലിഫ് ഹൗസിൽ മുഖ്യമന്ത്രി വിരുന്നും നൽകും. നാളെ രാവിലെ 11.30ന് തിരുവനന്തപുരം മേജർ ആർച്ച് ബിഷപ്സ് ഹൗസിൽ സീറോ മലങ്കര മേജർ ആർച്ച് ബിഷപ് കർദിനാൾ മാർ ബസേലിയോസ് ക്ലീമിസ് കാതോലിക്കാ ബാവ, കെസിബിസി പ്രസിഡന്‍റ് ആർച്ച് ബിഷപ് ഡോ. സൂസ പാക്യം എന്നിവരെ സന്ദർശിക്കും.

ബുധനാഴ്ച വൈകുന്നേരം നാലിന് തൃശൂർ ആർച്ച് ബിഷപ്സ് ഹൗസിൽ സ്വീകരണത്തിനുശേഷം അഞ്ചിന് മണ്ണുത്തി ഡോണ്‍ ബോസ്കോ ഭവനിൽ വിശുദ്ധ കുർബാന. തുടർന്ന് ബംഗളൂരു സലേഷ്യൻ പ്രൊവിൻഷ്യൽ ഹൗസിലേക്കു പോകുന്ന ഫാ. ടോം അവിടെ വിശ്രമിക്കും.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.