ഉ​ദി​ച്ചു​യ​ർ​ന്ന് ധ​വാ​ൻ; കു​തി​ച്ചു​പാ​ഞ്ഞ് സ​ണ്‍​റൈ​സേ​ഴ്സ്

ഉദിച്ചുയർന്ന് ധവാൻ; കുതിച്ചുപാഞ്ഞ് സണ്‍റൈസേഴ്സ്

ഹൈദരാബാദ്: ഐപിഎലിൽ മുൻ ചാന്പ്യന്‍മാരുടെ പോരാട്ടത്തിൽ സണ്‍റൈസേഴ്സ് ഹൈദരാബാദിന് ഒമ്പതു വിക്കറ്റ് വിജയം. ശിഖർ ധവാന്‍റെ വെടിക്കെട്ട് ബാറ്റിംഗിന്‍റെ കരുത്തിലാണ് സണ്‍റൈസേഴ്സ് വിജയം സ്വന്തമാക്കിയത്.

ആദ്യം ബാറ്റ്ചെയ്ത രാജസ്ഥാൻ റോയൽസ് ഉയർത്തിയ 126 റണ്‍സ് വിജയലക്ഷ്യം സണ്‍റൈസേഴ്സ് 15.5 ഓവറിൽ ഒരു വിക്കറ്റ് നഷ്ടത്തിൽ മറികടന്നു. അർധസെഞ്ചുറി കുറിച്ച ധവാൻ 57 പന്തിൽ 77 റണ്‍സുമായി പുറത്താകാതെനിന്നു.

13 ബൗണ്ടറികളും ഒരു സിക്സറും ധവാൻ പായിച്ചു. നായകൻ കെയ്ൻ വില്യംസണ്‍ (35 പന്തിൽ 36 റണ്‍സ്) ധവാനു മികച്ച പിന്തുണ നൽകി. പിരിയാത്ത രണ്ടാം വിക്കറ്റില്‍ ഇരുവരും ചേര്‍ന്ന് 121 റണ്‍സ് അടിച്ചുകൂട്ടി. വൃദ്ധിമാൻ സാഹ(5)യാണ് പുറത്തായ സണ്‍റൈസേഴ്സ് ബാറ്റ്സ്മാൻ.

നേരത്തെ, സണ്‍റൈസേഴ്സ് ഹൈദരാബാദ് ബൗളിംഗിനു മുന്നിൽ തകർന്ന രാജസ്ഥാന് നിശ്ചിത ഓവറിൽ ഒന്പതു വിക്കറ്റ് നഷ്ടത്തിൽ 125 റണ്‍സ് മാത്രമാണ് നേടാൻ കഴിഞ്ഞത്. 49 റണ്‍സ് നേടിയ മലയാളി താരം സഞ്ജു സാംസണാണ് രാജസ്ഥാൻ ടോപ് സ്കോറർ. 42 പന്ത് നേരിട്ട സഞ്ജു അഞ്ചു ബൗണ്ടറികൾ പായിച്ചു.

മറ്റാർക്കും റോയൽസ് നിരയിൽ മികച്ച പ്രകടനത്തിനു കഴിഞ്ഞില്ല. സഞ്ജുവിനു പുറമേ അജിങ്ക്യ രഹാനെ (13), രാഹുൽ ത്രിപതി (17), ശ്രേയസ് ഗോപാൽ (18) എന്നിവർ മാത്രമാണ് റോയൽസ് ഇന്നിംഗ്സിൽ രണ്ടക്കം കണ്ടത്. ഇതോടെ ഒരുഘട്ടത്തിൽ 92/3 എന്ന നിലയിലായിരുന്ന രാജസ്ഥാൻ 125/9 എന്ന നിലയിലേക്കു ചുരുങ്ങി.

സണ്‍റൈസേഴ്സിനായി ഷക്കിബ് അൽ ഹസൻ, സിദ്ധാർഥ് കൗൾ എന്നിവർ രണ്ടു വിക്കറ്റ് വീതം നേടി. ഭുവനേശ്വർ കുമാർ, റാഷിദ് ഖാൻ, സ്റ്റാൻലേക്ക് എന്നിവർ ഓരോ വിക്കറ്റ് നേടി.